မကွေးတိုင်း ဇွန်လ ၁၈ ရက် မှ ဇွန်လ ၂၄ ရက်အထိ မိုးလေဝသအခြေအနေ

ဘင်္ဂလားဒေ့ရှ်နှင့်အိန္ဒိယနယ်စပ်ကုန်းတွင်း (ကုန်းမြေပေါ်)တွင် ဆက်လက်ဖြစ်ပေါ်နေတဲ့ အထက်လေပွေလှိုင်းသည် ၁၇ ရက်နေ့ နံနက်ပိုင်းက လေဖိအားနည်းရပ်ဝန်းအဖြစ် ပိုမိုအားကောင်းလာပြီး တောင်ဘက်သို့ ဆက်လက်ရွေ့လျားနိုင်ကြောင်း ခန့်မှန်းထားပါတယ်။  

• အဲ့ဒီလေဖိအားနည်းရပ်ဝန်းအရှိန်ကြောင့် အနောက်တောင်မုတ်သုံလေအားကောင်းနေပြီး၊ ရခိုင်ရိုးမကိုဖြတ်ကျော်တိုက်ခတ်လာသည့် မုတ်သုံလေစီးကြောင်းနှင့်ပါလာသည့် မိုးတိမ်များသည် - 
• မကွေးတိုင်းအနောက်ခြမ်းမှ ရခိုင်ရိုးမနှင့်ကပ်လျှက်ရှိသည့် ဂန့်ဂေါ၊ ထီးလင်း၊ ကျောက်ထု၊ ဆော၊ စေတုတ္တရာ၊ ငဖဲ မြို့နယ်များနှင့် 
• မကွေးတိုင်းအရှေ့တောင်ဘက်မှ တောင်တွင်းကြီး၊ သရက် စသည့်မြို့နယ်များတွင် မိုးပိုနိုင်(မိုးအသင့်အတင့်မှ မိုးများနိုင်)ပြီး၊ 
• မကွေး၊ မင်းဘူး၊ ရေနံချောင်း၊ ချောက် စသည်မြို့နယ်များတွင် မိုးရွာသွန်းမှုလျော့နည်း (မိုးအနည်းငယ်သာ ရွာနိုင်)ပါတယ်။ 

မကွေးတိုင်းအတွင်းမှ ရခိုင်ရိုးမနှင့်ကပ်လျက် မြို့နယ်များတွင် ဇွန်လ လကုန်ပိုင်းအချိန်များမှာ မိုးများနိုင်တာလဲ တွေ့ရပါတယ် - (နောက်တစ်ပတ် ခန့်မှန်းချက်မှာ အသေးစိတ်ထပ်မံ၍ ဖော်ပြပေးပါမယ်)။ ဇွန်လ ၂၂ ရက်နောက်ပိုင်းတွင် နေသာချိန်/နေပွင့်ချိန် အနည်းငယ်ပိုလာနိုင်ပါမယ်။။ 

မကွေးတိုင်းအတွင်း တောင်ဘက်မှ တိုက်ခတ်လာသည့်လေတိုက်နှုန်း တစ်နာရီ ၅ မိုင်မှ ၂၅ မိုင်ခန့်အထိရှိနိုင်ပြီး၊ 

နေ့အပူချိန် အမြင့်ဆုံး ၃၀°C နှင့် အနိမ့်ဆုံး ညအပူချိန် ၂၅°C ခန့် ရှိနိုင်ပါမယ်။  

မိုးရွာသွန်းမှုလျော့နည်းနေမည့် မကွေး၊ မင်းဘူး၊ ရေနံချောင်း၊ ချောက် စသည်မြို့နယ်များတွင် လေထုစိုထိုင်းဆ ၆၀% မှ ၇၀% အထိရှိနေနိုင်ပြီး မိုးပိုသည့်မြို့နယ်/ခရိုင်များတွင် လေထုစိုထိုင်းဆ ၉၀% မှ ၁၀၀% အထိရှိနေနိုင်ကာ လေငြိမ်သည့်အချိန်များတွင် ခံစားရသည့်အပူချိန် ၃၆°C အထိရှိနိုင်ပါမယ်။ မကွေးတိုင်း၏ လေထုညစ်ညမ်းမှုအခြေအနေ "GOOD"(ကောင်း) နေပြီး ဇွန်လ လကုန်အထိ အန္တရာယ်ရှိနိုင်သည့် အခြေအနေမရှိပါ။ 

Win Naing 

Administration Team, 

MMWEATHER, 

https://www.mmweather.org/home 

မကွေးတိုင်းဒေသကြီးအတွင်း မိုးစပါးစိုက်ပျိုးတောင်သူများအတွက် စိုက်ပျိုးရေးအကြံပေးချက် 

မကွေးတိုင်းဒေသကြီးအတွင်း မိုးစပါးစိုက်ပျိုးတောင်သူများသတိထားကာကွယ်ရမည့် စပါးရွက်လိပ်အိမ်ပိုးသည် စပါးပင်ငယ်များ၏ အရွက်များကို ကိုက်ဖြတ်ပြီး ရွက်ပြတ်များဖြင့် ဖျာလိပ်ပုံသဏ္ဍာန်အိမ်များ ပြုလုပ်ကာ စပါးရွက်၏ အစိမ်းရောင် တစ်သျှူးသားများကို ခြစ်ယူပြီးစားသောက်တတ်ကြပါတယ်။ ကာကွယ်နှိမ်နင်းနည်းလမ်းများမှာ - 

• စပါးပင် စိပ်စိပ်မစိုက်ရ။ (ကြဲကြဲစိုက်ခြင်းဖြင့် လေဝင်လေထွက်ကောင်းစေပါတယ်။) 
• ခိုအောင်းရာ ပေါင်းမြက်များကိုရှင်းလင်းပေးပါ။ 
• ပိုးစတင်ကျရောက်ပါက ရေထုတ်ပေးပါ။ 
• နိုင်ထရိုဂျင်မြေသြဇာ အလွန်အကျွံကျေးခြင်းမှ ရှောင်ကြဥ်ပီး N:P:K မြေသြဇာများကို စနစ်တကျအချိုးကျသုံးစွဲပေးပါ။ 
• ဓာတုဆေးအနေနဲ့ Cartap Hydrochloride နှင့် Carbosulfan ပါဝင်သော ဆေးများအား တစ်ပတ်ခြား တစ်ကြိမ်စီ ပက်ဖျန်းပေးပါ။ 

ငါး၊ ပုစွန်ကန်များ ရေကြည်နှုန်းတာတိုင်းခြင်း အကြံပြုချက် 

မွေးကန်များ ရေကြည်နှုန်းတိုင်းတာရာတွင် secchi disk ကိရိယာကို ကန်အတွင်းသို့ ချလိုက်ပါ။ စက်ဝန်းပြားရှိ အဖြူ နှင့်အမဲရောင် ကို ရေးရေးလေးမြင်ရချိန်တွင် ၊ မိမိကိုင်ထားသော သစ်သားပြားမှ ကန်ရေမျက်နှာပြင်ထိနေသော နေရာအမှတ်အသားကိုကြည့်လိုက်ပါ။ 

အဆိုပါအမှတ်အသားသည် မိမိကန်၏ ရေ ကြည်နှုန်း အမှတ်ဖြစ်ပါသည်။ 

ရေကြည်နှုန်း ၁၀ လက်မ ထက်နည်းနေလျှင် အစာကျွေးခြင်းကို ရပ်တန့်ရမည်။ 

ပုံမှန်အစာကျွေးခြင်းကို (၁၀ - ၁၄ လက်မ) ရေကြည်နှုန်းဖြစ်လျှင် ပြုလုပ်နိုင်သည်။ 

ရေကြည်နှုန်း ၂၃လက်မ အထက်ဖြင့်တက်နေပါက အစာကျွေးနှုန်းကို နဂိုထက်ပို၍မြှင့်တင်ပေးရမည်။ 

---------------   

မိုးလေဝသအဖွဲ့ဝင်ရန် - https://htwettoe.com/organization/12   

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို   

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်.   

သီးနှံပေါက်စျေးကြည့်ရှုနည်း_ https://htwettoe.com/post/50437