သဘာဝပစ္စည်းများဖြင့် မြေဖုံးခြင်း၏ အကျိုးကျေးဇူးများ

မြေဆီလွှာကို သဘာဝပစ္စည်းများဖြင့် ဖုံးအုပ်ထားခြင်းဖြင့် လုပ်သမားအသုံးပြုမှုကို သက်သာစေပြီး မြေဆီလွှာအရည်အသွေးကို သိသိသာသာ မြှင့်တင်ပေးနိုင်ပါသည်။ မြေဖုံးစနစ် အသုံးပြုခြင်းဖြင့် အောက်ပါအကျိုးကျေးဇူးများ ရရှိနိုင်ပါသည် - 

🌱 ၁။ ပေါင်းပင်များကို သဘာဝအတိုင်း နှိမ်နင်းပေးခြင်း။

သဘာဝပစ္စည်းများဖြင့် ထူထူထပ်ထပ်အနေအထား မြေဖုံးထားခြင်းသည် နေရောင်ခြည် မြေဆီလွှာအထိ ဝင်ရောက်မှု ပိတ်ဆို့သဖြင့် ပေါင်းပင်မျိုးစေ့ပေါက်ရန် ခက်ခဲစေသည်။ ပေါင်းနှိမ်နင်းရန် လိုအပ်မှု လျော့နည်းစေပြီး ဓာတုပစ္စည်းများမလိုအပ်ဘဲ ပေါင်းပင်ကို ထိထိရောက်ရောက်ဟန့်တားနိုင်သည်။

💧 2. မြေဆီလွှာ အစိုဓာတ်ကို ထိန်းသိမ်းပေးခြင်း။

မြေဖုံးစနစ်သည် ရေငွေ့ပျံခြင်းကို လျှော့ချပေးပြီး မြေဆီလွှာကို ကြာရှည် စိုစွတ်နေစေရန် ကူညီပေးသည်။ ဆိုလိုသည်မှာ အကြိမ်ရေနည်းနည်းသာ ရေလောင်းရန် လိုအပ်ပြီး ခြောက်သွေ့သော ရာသီတွင် အပင်များ ပိုမိုခံနိုင်ရည်ရှိစေသည်။

 🌡️ 3. မြေဆီလွှာအပူချိန်ကို ထိန်းညှိပေးခြင်း။ 

မြေဖုံးခြင်းသည် နွေရာသီတွင် အမြစ်များကို အေးမြစေပြီး ဆောင်းရာသီတွင် အနွေးဓာတ်ရရှိစေကာ အပင်များအပေါ် ရာသီဥတုဖိစီးမှုဒဏ်ကို လျှော့ချပေးသည့် အကာအကွယ်တစ်ခုအနေဖြင့် လုပ်ဆောင်သည်။

🌿 4. မြေဆီလွှာကျန်းမာရေးကို ကောင်းမွန်စေခြင်း။

သဘာဝမြေဖုံးပစ္စည်းများ (ကောက်ရိုး၊ မြေဆွေး၊ အရွက်များ သို့မဟုတ် သစ်ခေါက်အသေးလေးများ) သည် အချိန်ကြာလာသည်နှင့်အမျှ ပြိုကွဲသွားပြီး မြေဆီလွှာကို အာဟာရဖြည့်တင်းပေးသည်။ မြေဆီလွှာဖွဲ့စည်းမှုကို ပိုမိုကောင်းမွန်စေသည့် အော်ဂဲနစ်ပစ္စည်းများကို ပေါင်းထည့်ပေးပါသည်။

🪱 ၅။ တီကောင်နှင့် အခြားအကျိုးပြုအဏုဇီဝပိုးမွှားများကို အားပေးခြင်း။

မြေဖုံးခြင်းလုပ်ကိုင်သော ဥယျာဉ်၊ ခြံများတွင် အကျိုးပြုအဏုဇီဝများ ပိုမိုပေါက်ပွားစေသည်။ တီကောင်နှင့် အကျိုးပြုအဏုဇီဝများသည် အေးမြစိုစွတ်သော၊ အာဟာရကြွယ်ဝသော မြေဆီလွှာတွင် ရှင်သန်ပေါက်ဖွားကြသည်။

💥 6. မြေဆီလွှာတိုက်စားမှု နှင့် မြေကြပ်မှု မဖြစ်စေခြင်း 

မိုးသည်းထန်စွာရွာသွန်းခြင်းနှင့် လေတိုက်ခြင်းမှ မြေဆီလွှာမျက်နှာပြင် တိုက်စားမှုကို ကာကွယ်ပေးပြီး ကျန်းမာသော မြေဆီလွှာကို ထိန်းသိမ်းပေးထားသည်။ 

🦠 7. အပင်ရောဂါ ကျရောက်မှုကို လျော့နည်းစေခြင်း။

မြေဆီလွှာနှင့် အပင်ကိုယ်ထည်ကြားတွင် အတားအဆီးတစ်ခုအဖြစ် လုပ်ဆောင်ခြင်းဖြင့် ရေလောင်းချိန် သို့မဟုတ် မိုးရွာချိန်တို့တွင် မြေဆောင်ရောဂါများ အပင်မျက်နှာပြင်ပေါ်သို့ လွှင့်ထွက်လာမှု/ ကျရောက်လာမှုကို ဟန့်တားပေးပါသည်။

🧪 ၈။ ဓာတုကင်းစင်သော မြေဆီလွှာအဖြစ် စီမံခန့်ခွဲနိုင်ခြင်း

အော်ဂဲနစ်စိုက်ပျိုးရေးနည်းစနစ်အတွက် မြေဆီလွှာအာဟာရဓာတ်နှင့် မြေဆီလွှာကျန်းမာရေးကို ထိန်းထားနိုင်ရန် ဓာတုဓာတ်မြေသြဇာများ သို့မဟုတ် ဓာတုဆေးများ မလိုအပ်ပါ။ မြေဖုံးစနစ်ကို အသုံးပြုခြင်းဖြင့် ဓာတုကင်းစင်သော စိုက်ပျိုးနည်းစနစ်ကို ဖော်ဆောင်နိုင်ပါသည်။

အကောင်းဆုံး အော်ဂဲနစ် မြေဖုံးပစ္စည်းများ

• ကောက်ရိုး သို့မဟုတ် မြက်ခြောက် (ပေါင်းစေ့ကင်းစင်သော)

• မြေဆွေး

• အရွက်များ။

• ညှပ်ထားသော မြက်များ (ပါးလွှာသောအလွှာများ)

• သစ်သားအခေါက်လေးများ သို့မဟုတ် လွှစာများ

• ထင်းရှူးပင် (အက်ဆစ်နှစ်သက်သော အပင်များအတွက်) 

အကြံပြုချက်- စိုက်ပျိုးပင်၏ပင်စည်မှ အနည်းငယ်ခွာပြီး အထူ ၅ - ၁၀ စင်တီမီတာ အထူဖြင့် မြေဖုံးနိုင်ပါသည်။

ဘာသာပြန်သူ - နွယ်အေး

Source: organic-consumers-association

စိုက်ပျိုးရေး၊ မွေးမြူရေးနှင့် ပတ်သတ်သော အခက်အခဲများကို တိုင်ပင်ဆွေးနွေး အကြံဥာဏ်ရယူလိုပါက ထွက်တိုး တောင်သူအကြံပေးဖုန်း- ၀၉၉၇၇၉၁၀၀၀၀ ကို ဆက်သွယ်နိုင်ပါသည်။

------