ရန်ကုန်တိုင်း တစ်ပတ်စာမိုးလေဝသခန့်မှန်းချက်နှင့် စိုက်/မွေးအကြံပြုချက်

ရန်ကုန်တိုင်း အောက်တိုဘာလ ၆ ရက်မှ အောက်တိုဘာလ ၁၂ ရက်အထိ မိုးလေဝသအခြေအနေ 

တောင်တရုတ်ပင်လယ် မှ တိုင်ဖွန်းမုန်တိုင်း MATMO ကုန်းတွင်းဝင်ရောက်ခြင်းနှင့် ဘင်္ဂလားပင်လယ်အော်မှမုတ်သုံလေတို့ ဆက်စပ်ခြင်း 

·          တိုင်ဖွန်းမုန်တိုင်း MATMO သည် အောက်တိုဘာ ၅ ရက် ည တွင် ဟိုင်နန်ကျွန်းကိုဖြတ်ကျော်ပြီး ဗီယက်နမ်နိုင်ငံအရှေ့ဘက် တုံကင်ပင်လယ်ကွေ့သို့ ဝင်ရောက်ကာ အနောက်-အနောက်မြောက်ဘက်သို့ ဆက်လက်ရွေ့လျားပြီး အောက်တိုဘာ ၅ ရက် ညမှာပင် တရုတ်ပြည်အနောက်တောင်ဘက်ကမ်းခြေအား ဗီယက်နမ်နယ်စပ်အနီးမှ ကုန်းတွင်းကိုဖြတ်ကျော်ဝင်ရောက်နိုင်ပါမယ်။ 

·          ကုန်းတွင်းကိုတိုင်ဖွန်းမုန်တိုင်းအဖြစ် ဖြတ်ကျော်ဝင်ရောက်ပြီး အနောက်-အနောက်မြောက်ဘက်ကို ဆက်လက်ရွေ့လျားပြီးတဲ့နောက် မုန်တိုင်းအပြင်ဘက်မိုးတိမ်များပြန့်ကျဲထွက်လာခြင်းနဲ့ ဘင်္ဂလားပင်လယ်အော်ဘက်မှ အားကောင်းလာသောမုတ်သုံလေနှင့်အတူ ရွေ့လျားဝင်ရောက်လာသည့် မိုးတိမ်များထိတွေ့ရာမှ မြန်မာနိုင်ငံနေရာအနှံ့အပြားမှာ မိုးထစ်ချုန်းရွာသွန်းနိုင်သည့်အခြေအနေများ၊ နေရာကွက်၍ မိုးသည်းထန်နိုင်ခြင်းများဆက်လက်၍ ဖြစ်ပေါ်နေနိုင်ပါတယ်။ 

·          ဒီအခြေအနေက အောက်တိုဘာလ ၁၂ ရက်နေ့အထိ ဆက်လက်ရှိနေနိုင်ပြီး နေ့စဉ်မိုးရေချိန် ၀.၅ လက်မမှ ၁ လက်မ ဝန်းကျင် မိုးအနည်းငယ်မှ မိုးအသင့်အတင့် မွန်းလွဲ/ညနေပိုင်းတွေမှာရွာသွန်းရရှိနိုင်ပါတယ်။ 

·          ရခိုင်ပြည်နယ်၊ ရခိုင်ကမ်းရိုးတန်းတလျှောက် အထက်အမြင့် ပေ ၅၀၀၀ အထက်မှာ ဖြစ်ပေါ်လာနိုင်တဲ့ လေပွေလှိုင်းကြောင့် မိုးသည်းထန်ပြီး ရိုးမတောင်ကြောတလျှောက်မှာ မိုးများနိုင်ပါမယ်။ 

·          ရခိုင်ပြည်နယ်၊ ချင်းပြည်နယ်တွေအပြင် - မကွေးတိုင်းနှင့် ရခိုင်ပြည်နယ်၊ မကွေးတိုင်းနှင့် ချင်းပြည်နယ်၊ ပဲခူးတိုင်းအနောက်ခြမ်းနှင့် ရခိုင်ပြည်နယ်၊ ပဲခူးတိုင်းအရှေ့ခြမ်းနှင့် ကရင်ပြည်နယ် စသည့် ပြည်နယ်/တိုင်းနယ်နိမိတ်များထိစပ်ရာ တောင်ကုန်းထူထပ်တဲ့ဒေသများတွင် နေရာကွက်၍မိုးများနိုင်ကာ တောင်ကျချောင်းရေကြောင့် မြစ်/ချောင်းများရေလျှံခြင်း၊ ရုတ်တရက်ရေကြီးခြင်းများ ဖြစ်ပေါ်နိုင်ပါတယ်။ 

·          ရခိုင်ကမ်းရိုးတန်းနဲ့ မွန်-တနင်္သာရီကမ်းရိုးတန်းတွေမှာ မိုးသည်းထန်နိုင်ပြီး လေတိုက်နှုန်း တနာရီ ၁၅ မိုင်ခန့်နှင့် လှိုင်းအသင့်အတင့်ရှိနိုင်ပါတယ်။ 

·          ယခုရက်သတ္တပါတ် ၁ ပါတ်အပြီးမှာ အရှေ့လေအားကောင်းလာပြီး အနောက်လေအားလျော့ကာ မြောက်ဘက်မှလေအေးများလည်း တိုးဝင်လာတော့မှာမို့ မုတ်သုံအပြီးတိုင်ဆုတ်ခွာပြီး ၂၀၂၅ ခုနှစ် မိုးရာသီကုန်ဆုံးနိုင်မည့်ရက်က နီးကပ်နေပြီဖြစ်ပါတယ်။ 

ရန်ကုန်တိုင်းအတွင်း နေ့စဉ်ပျမ်းမျှ နှင့် ၇ ရက်အတွင်းရွာသွန်းရရှိနိုင်သည့် မိုးရေချိန် 

·          ယခုတပတ်အတွင်း ရန်ကုန်တိုင်းနေရာအနှံ့မှာ မိုးအနည်းငယ်မှ အသင့်အတင့်ရွာနိုင်ပြီး နေရာကွက်၍ မိုးများနိုင်တာရှိပါမယ်။ 

·          ခန့်မှန်း ၇ ရက် မိုးရေချိန် ၁ လက်မ မှ ၁.၅ လက်မခန့်ရှိနိုင်ပြီး နေ့စဉ် ပုံမှန်မိုးရေချိန်ခန့်မှန်း ၀.၃ လက်မ ဝန်းကျင်ခန့်ရှိပြီး ခေတ္တမိုးသည်းထန်တဲ့အခါ ၂၄ နာရီ မိုးရေချိန် ၁ လက်မ ကျော်နိုင်ပါမယ်။ 

အပူချိန်၊ လေတိုက်နှုန်း၊ လေထုစိုထိုင်းဆ၊ ပင်လယ်ပြင်အခြေအနေနှင့် လေထုညစ်ညမ်းမှုအခြေအနေများ 

·          ရန်ကုန်မြို့ရဲ့ အမြင့်ဆုံးနေ့အပူချိန် ၃၁°C နဲ့ အနိမ့်ဆုံးညအပူချိန် ၂၅°C ရှိနိုင်ပြီး၊ အောက်တိုဘာလ ၁၀ ရက်နေ့မှာ ခံစားရတဲ့အပူချိန်(Feels like temperature) ၄၀°C အထိရှိနိုင်ပါမယ်။ 

·          ယခု ၁ ပတ်အတွင်း တောင်/အနောက်တောင်နှင့်အရှေ့တောင်အရပ်တို့မှ လေတိုက်နှုန်း တနာရီ ၁၅ မိုင် ခန့်အထိ ရှိနိုင်ပြီး၊ ရန်ကုန်မြစ်ဝ၊ ကမ်းနီးပင်လယ်ပြင်မှာ လှိုင်းအမြင့်ဆုံး ၂ ပေ ခန့်ရှိနိုင်ပါတယ်။ 

·         ရန်ကုန်တိုင်းအတွင်း နေ့လည်/နေ့ခင်းအချိန်များမှာ လေထုစိုထိုင်းဆ ၇၀% ခန့်ရှိနိုင်ပြီး၊ နံနက်အစောပိုင်နှင့် ညပိုင်းအချိန်တွေမှာ လေထုစိုထိုင်းဆ ၉၀% မှ ၁၀၀% ရှိနိုင်ပါတယ်။ 

ယခု ၁ ပါတ်အတွင်း ရန်ကုန်တိုင်း၊ အနောက်ပိုင်းခရိုင်များတွင် လေထုညစ်ညမ်းမှုအညွှန်းကိန်းအမြင့်ဆုံး(AQI value) “45” ရှိနိုင်ပြီး အန္တရာယ်မရှိနိုင်သော အညွှန်းကိန်းအဆင့်ဖြစ်ပါတယ်။ 

Win Naing 

Administration Team, 

MMWEATHER, 

ရန်ကုန်တိုင်းဒေသကြီးအတွင်းရှိ မိုးစပါးရိတ်သိမ်းတော့မည့်တောင်သူများထံသို့ အကြံပြုချက်... 

• မိုးများနိုင်ချေရှိတာကြောင့် စပါးရိတ်သိမ်းကြတော့မယ့်တောင်သူများ၊ စပါးသိမ်းပြီးအခြောက်လှန်းရန် ပြင်ဆင်နေသောတောင်သူများ မိုးလေဝသကိုကြိုတင်စစ်ဆေးကြရန် အကြံပြုလိုက်ပါတယ်။ 
• စပါးခြွေလှေ့စက်ဖြင့် ရိတ်သိမ်းပြီးပါက မိုးလေဝသကြောင့်အခြောက်ခံဖို့အခက်အခဲရှိလျှင် အခြောက်ခံစက်ဖြင့် အစိုဓာတ် ၁၄ ရာခိုင်နှုန်းထိ အစိုဓာတ်လျော့ကျအောင်ပြုလုပ်ပါ။ 
• စပါးများကို အချိန်ကြာကြာစုပုံထားမည်ဆိုပါက စိုလိုက်၊ ခြောက်လိုက်ဖြစ်ပြီး အဆစ်ကျိုးစပါးများဖြစ်သွားကာ ဆန်ထွက်နှုန်းလျော့နိုင်တဲ့အတွက် သတိထားပြုလုပ်ကြရန် အကြံပြုလိုက်ပါတယ်ခင်ဗျာ။ 

ငါး/ပုစွန် ကန်များအတွက်အကြံပြုချက် 

ရုတ်တရက် မိုးရွာသွန်းသော အချိန်တွင် ကန်ရေ၏ချဉ်ဖန်နှုန်းကျဆင်းခြင်း၊ ကန်ရေအပူချိန် ကျဆင်းခြင်းတို့ကြောင့် အစာကျွေးခြင်းကို ခေတ္တရပ်ဆိုင်းထားကြရပါမည်။ နေ့ပွင့်ချိန်မှာ ပြန်ကျွေးနိုင်ပါသည်။ 

မိုးရွာပြီး နောက်တစ်နေ့တွင် ကန်ရေ၏ချဉ်ဖန်နှုန်းကို ပြန်လည် တိုင်းတာပြီး ကျဆင်းနေပါက တစ်ဧက လျှင် ထုံး (၁၅)ပိဿာ ပြန်လည်ထည့်သွင်းပေးသင့်ပါသည်။ 

ကန်ရေဩဇာဓါတ်လည်း ကျဆင်းပျောက်ဆုံးခြင်းများလည်း ကြုံတွေ့ရပါမည်။ ထို့ကြောင့် မိုးရွာသွန်း ပြီးနောက် ရေကြည်နှုန်း (၁၈)လက်မကျော်နေပါက ပုလဲနှင့်တီစူပါ မြေဩဇာများပြန်လည်ထည့်သွင်းပေးပါရန် အကြံပြုတင်ပြအပ်ပါသည်။ 

ဆက်လက်ပြီး ရေလုပ်ငန်းနှင့် ပတ်သတ်ပြီး အကြံဉာဏ်များ ရယူလိုပါက ထွက်တိုးဆော့ဝဲလ်တွင်မေးမြန်းနိုင်ပါသည်။ 

-------- 

စိုက်ပျိုးရေး၊ မွေးမြူရေးနှင့် ပတ်သတ်သော အခက်အခဲများကို တိုင်ပင်ဆွေးနွေး အကြံဥာဏ်ရယူလိုပါက ထွက်တိုး တောင်သူအကြံပေးဖုန်း- ၀၉၉၇၇၉၁၀၀၀၀ ကို ဆက်သွယ်နိုင်ပါသည်။