ဧရာဝတီတိုင်း နိုဝင်ဘာ ၆ ရက်နေ့မှ နိုဝင်ဘာ ၁၂ ရက်အထိ မိုးလေဝသအခြေအနေ

ပင်လယ်ပြင်များမှ ထူးခြားသည့်မိုးလေဝသအခြေအနေများ 

·         ဘင်္ဂလားပင်လယ်အော်တွင် ဖြစ်ပေါ်နေသော လေဖိအားနည်းရပ်ဝန်းသည် Well-Marked LPA (သိသာထင်ရှားသောလေဖိအားနည်းရပ်ဝန်း)မှ အားလျော့ပြီး လေဖိအားနည်းရပ်ဝန်းဖြစ်လာကာ ဘင်္ဂလားဒေ့ရှ်ကမ်းခြေအနီးသို့ နောက် ၂၄ နာရီအတွင်း ရောက်ရှိမယ်လို့ အိန္ဒိယမိုးလေဝသဌာနက ထုတ်ပြန်ထားပါတယ်။ 

·         ဒီလေဖိအားနည်းရပ်ဝန်းကြောင့် မြန်မာနိုင်ငံအထက်ပိုင်းကချင်ပြည်နယ်၊ ချင်းပြည်နယ်နဲ့ စစ်ကိုင်းတိုင်းအထက်ပိုင်းဒေသအချို့မှာနေရာကွက်ပြီး မိုးသည်းထန်နိုင်၊ မိုးများနိုင်တာတွေ့ရပါတယ်။ နိုဝင်ဘာ ၆ ရက် ၇ ရက်နေ့နောက်ပိုင်းမှာ အဲ့ဒီဒေသတွေမှာ ၂၀၂၅ ခုနှစ်အတွင်းမိုးရွာသွန်းနိုင်မည့် အခြေအနေ ပြီးဆုံးသွားနိုင် မိုးရွာမှုရပ်တန့်ကာ ဆောင်းရာသီပီပီပြင်ပြင်ဖြစ်လာနိုင်ပါမယ်။ 

·         တောင်တရုတ်ပင်လယ်ကိုဝင်ရောက်လာတဲ့ တိုင်ဖွန်းမုန်တိုင်း KALMAEGI က နိုဝင်ဘာ ၆ ရက်နေ့နှောင်းပိုင်းမှစတင်ပြီး ၇ ရက်နေ့ ညပိုင်းအထိ ဗီယက်နမ်နိုင်ငံအလယ်ပိုင်းကမ်းခြေကို CATEGORY-2 တိုင်ဖွန်းမုန်တိုင်းအဆင့်ဖြင့် ဖြတ်ကျော်ဝင်ရောက်နိုင်ပါမယ်။ အဲ့ဒီနောက် ဗီယက်နမ်၊ လာအို၊ ထိုင်းနိုင်ငံတွေကို ဖြတ်ကျော်ပြီး ထိုင်းနိုင်ငံအနောက်မြောက်ပိုင်း PITSANULOK နှင့် TAK ခရိုင်များအထိ မုန်တိုင်းအကြွင်းအကျန်များရွေ့လျားရောက်ရှိနိုင်ကြောင်း တွေ့ရပါတယ်။ 

·         မုန်တိုင်းအကြွင်းအကျန်များဝင်ရောက်ခြင်းကြောင့် မြန်မာနိုင်ငံ၊ ကရင်ပြည်နယ်၊ မွန်ပြည်နယ်၊ ကယားပြည်နယ်၊ ရှမ်းပြည်နယ်အရှေ့ပိုင်းနှင့်တောင်ပိုင်း၊ ပဲခူးတိုင်းနဲ့ ရန်ကုန်တိုင်းတွေမှာ မိုးအသင့်အတင့်ရွာနိုင်ပြီး ကရင်ပြည်နယ် ဒေါနတောင်ကြောတလျှောက်၊ ဘုရားငုတ်တို၊ လှိုင်းဘွဲ့၊ ရှမ်းရွာသစ်၊ တာပေါင်ကျောက်တောင်၊ သင်္ဃန်းညီနောင် စတဲ့မြို့နယ်တွေမှာ မိုးသည်းထန်နိုင်/ မိုးများနိုင်ပါတယ်။ 

နိုဝင်ဘာ ၆ ရက် မှ နိုဝင်ဘာ ၁၂ ရက်အထိ၊ ၇ ရက်အတွင်း ဧရာဝတီတိုင်း မိုးရွာသွန်းနိုင်သည့်အခြေအနေ 

·         ဖျာပုံ၊ မော်လမြိုင်ကျွန်း၊ လပွတ္တာ ၃ မြို့နယ်တွင် ၇ ရက်အတွင်းမိုးရေချိန်ရရှိမှုအများဆုံး (၁.၅ လက်မ အထက်) ဖြစ်ပါမယ်။ 

·         မြန်အောင်၊ အင်္ဂပူ၊ ကျုံပျော်၊ ငပုတော၊ သာပေါင်းမြို့နယ်များတွင် ၇ ရက်အတွင်းမိုးရေချိန်ရရှိမှုအနည်းဆုံး(၁ လက်မအောက် - ၀.၅ လက်မ အထက်) ဖြစ်ပါမယ်။ 

·         ဘိုကလေး၊ ဒေးဒရဲ၊ ကျိုက်လတ်၊ မအူပင်၊ ဓနုဖြူ၊ ပန်းတနော်၊ ပုသိမ်၊ ဟင်္သာတ ခရိုင်/မြို့နယ်တို့တွင် ၇ ရက်အတွင်းမိုးရေချိန် ၁ လက်မအထက် (၁.၅ လက်မအောက်) ရွာသွန်းရရှိနိုင်ပါမယ်။ 

·         ဧရာဝတီတိုင်းတခုလုံး၏ ၇ ရက်အတွင်းပျမ်းမျှမိုးရေချိန် ၁.၂ လက်မ (30mm အထက်) ရှိနိုင်ပါမယ်။  

အပူချိန်၊ လေတိုက်နှုန်း၊ လေထုစိုထိုင်းဆနှင့် လေထုညစ်ညမ်းမှုအခြေအနေ 

·         ဧရာဝတီတိုင်းအတွင်း ယခု ၁ ပါတ် နိုဝင်ဘာ ၁၂ ရက်နေ့မှာ အမြင့်ဆုံးနေ့အပူချိန် ၃၄°C နဲ့ အနိမ့်ဆုံးညအပူချိန် ၂၄°C ရှိနိုင်ပြီး၊ ပင်လယ်ကမ်းရိုးတန်းအနီးက ခရိုင်/ မြို့နယ်တွေမှာ အမြင့်ဆုံးအပူချိန် ၃၁°C နဲ့ အနိမ့်ဆုံးအပူချိန် ၂၇°C ရှိနိုင်ပါတယ်။ 

·         ကမ်းရိုးတန်းအနီးက မြို့နယ်/ကျေးရွာတွေမှာ အမြင့်ဆုံးလေတိုက်နှုန်း တနာရီ ၁၆ မိုင်ခန့် ရှိနိုင်ပါတယ်။ 

·         ဧရာဝတီတိုင်းအတွင်း နေ့လည်ပိုင်းအချိန်တွေရဲ့ လေထုစိုထိုင်းဆ ၅၀% မှ ၆၀% အတွင်းမှာ ရှိနေနိုင်ပြီး နံနက်/ညအချိန်တွေမှာ လေထုစိုထိုင်းဆ ၉၀% မှ ၁၀၀% အထိ ရှိနိုင်ပါတယ်။ 

လေထုစိုထိုင်းဆများနေချိန်မှာ ခံစားရတဲ့အပူချိန် ၄၀°C အထိရှိနေနိင်ပါတယ်။ 

·         ဧရာဝတီတိုင်းအနောက်ဘက် တောင်ခြေဒေသများမှာ လေထုညစ်ညမ်းမှုအခြေအနေ (AQI value) က အများဆုံး 170 အထိရှိနိုင်တာကြောင့် လေထုညစ်ညမ်းမှုအသင့်အတင့် ရှိနေပြီး၊ အသက်ရှုလမ်းကြောင်းဆိုင်ရာကျန်းမာရေးအခံမကောင်းသူများအတွက် အန္တရာယ်ရှိနေပါတယ်။ 

Air quality index (marked as AQI) is developed by Environmental Protection Agency. Values over 300 represents hazardous air quality, between 200-300 very unhealthy, 150-200 unhealthy, 100-150 unhealthy for sensitive groups and below 100 or rather below 50 the air quality is good 

ဧရာဝတီတိုင်းအနောက်ဘက်နဲ့တောင်ဘက် ကမ်းနီးပင်လယ်ပြင်တွေမှာ လေတိုက်နှုန်းအမြင့်ဆုံး တနာရီ ၁၅ မိုင်ခန့်နဲ့ လှိုင်းအမြင့် ၂.၆ ပေခန့်ရှိနိုင်ပါတယ်။ 

ဧရာဝတီတိုင်းဒေသကြီးအတွင်း မိုးသည်းထန်စွာရွာပြီးနောက် 

မတ်ပဲစိုက်တောင်သူများထံသို့ အကြံပြုချက်... 

• မိုးသည်းထန်စွာရွာသွန်းပြီးနောက် စိုက်ခင်းများတွင် ရေဝပ်တာမျိုးရှိပါက ရေနုတ်မြောင်းလေးတွေအရင်ဖော်ပေးပါ။ 
• မိုးစဲသွားတဲ့အခါ ရာသီဥတုဒဏ်ခံလိုက်ရတဲ့ အပင်များပေါ်သို့တန်းပြီး မှိုသတ်ဆေး၊ ပိုးသတ်ဆေးဖျန်းခြင်းများ မလုပ်ဆောင်ပါနဲ့။ 
• ထိုအခြေအနေမှာ လိုအပ်တဲ့အာဟာရကိုဖြည့်ပေးနိုင်တဲ့ NPK+ အနည်းလိုရွက်ဖျန်းအားဆေး (သို့မဟုတ်) အီးအမ် EM ကိုဖျန်းပေးပါ။ 
• ဒါတွေလုပ်ဆောင်ပြီးမှသာ ရောဂါတစ်ချို့ကိုကြိုတင်ကာကွယ်နိုင်မယ့် ထိသေမှိုသတ်ဆေးထဲမှ Mancozeb, Chlorothalonil, Copper oxychloride အဆင်ပြေရာတစ်မျိုးကို ရွေးချယ်ဖျန်းပေးပါ။ 
• ပျိုးပင်ငယ် ခါးရိ၊ အမြစ်ပုပ်ခြင်းများဖြစ်ပေါ်ပါက မှိုသတ်ဆေးအနေနဲ့ Thiophanate methyl ကိုရွေးချယ်အသုံးပြုနိုင်ပါတယ်။  

ငါး/ပုစွန် ကန်များအတွက်အကြံပြုချက်  

· ယခုတစ်ပတ်အတွင်း နေရာကွက်၍ မိုးသည်းထန်ခြင်းများရှိနိုင်သဖြင့် ကန်ရေ၏ချဉ်ဖန်နှုန်းကျဆင်းခြင်း ၊ကန်ရေအပူချိန် ကျဆင်းခြင်းတို့ကြောင့် အစာကျွေးခြင်းကို လျော့ချသင့်ပါသည်။ 

· ငါးမွေးမြူထားသော ကန်တစ်ကန်၏ရေချဉ်ဖန်နှုန်းသည် (၇.၅)မှ (၈.၅)အတွင်းရှိပါက အကောင်းဆုံး အခြေအနေရှိပါသည်။ငါးကန်အတွင်းရှိ ကန်ရေသည် အက်စစ်ဓာတ် (၅.၅)နှင့်အောက်ရောက်နေပါက လည်းကောင်း၊ ထုံးဓါတ်ဘက် (၉.၅)အထက် ဖက်ရောက်နေပါကလည်းကောင်း တွေ့ရှိပါက ကန်အတွင်းရှိ ငါးများကျန်းမာရေးမကောင်းဖြစ်ခြင်းနှင့် အစာ စားခြင်းမရှိကြောင်းတွေ့ရှိရပါသည်။ 

 · ထို့ကြောင့် ငါးမွေးကန် ၏ရေချဉ်ဖန်နှုန်းကို (၃)ရက်တစ်ကြိမ် တိုင်းတာရန်ရန်နှင့် လိုအပ်ပါက နေ့စဉ်တိုင်းတာပေးသင့် ပါသည်။  

· ဆက်လက်ပြီး ရေလုပ်ငန်းနှင့် ပတ်သတ်ပြီး အကြံဉာဏ်များ ရယူလိုပါက ထွက်တိုးဆော့ဝဲလ်တွင်မေးမြန်းနိုင်ပါသည်။ 

-------------   

မိုးလေဝသအဖွဲ့ဝင်ရန် - https://htwettoe.com/organization/12   

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို   

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်.   

သီးနှံပေါက်စျေးကြည့်ရှုနည်း_ https://htwettoe.com/post/50437