ဝက်များကို အသက်အရွယ်အလိုက် မွေးမြူပြုစုခြင်း

(၁) သားခွဲမှ၄လအထိ ဝက်ငယ်များကို မွေးမြူပြုစုခြင်း

·      သားခွဲဝက်တကောင်သည် တကိုယ်လုံး အရှင်အလေးချိန် အနည်းဆုံး (၆) ပိဿာရှိရန် လိုပါသည်။

·      သားခွဲဝက်သည် ဝက်မဲအုပ်စုဖြစ်စေ၊ ဝက်ဖြူအုပ်စုဖြစ်စေ အလျားရှည်ပြီး ခြေဆံလက်ဆံ အတော်သင့် ရှည်ပြီး အတော်သင့်တုတ်ခိုင်ရန် လိုပါသည်။

·      ဝက်ကလေးများအအေးမမိစေရန် အထူးဂရုစိုက်ပါ။ အထူးသဖြင့် ဝက်ကလေး အသက်၁လခွဲမှ (၂)လခွဲ အထိ မိုးရာသီနှင့်ဆောင်းရာသီများတွင် မလိုအပ်ဘဲ ရေမချိုးပေးပါနှင့်။

·      အသက် ၁လခွဲ (၆ပတ်) ရှိပါက ဝက်ဝမ်းကျကာကွယ်ဆေးကို မဖြစ်မနေထိုးပေးရမည်။

·      ဝက်ဝမ်းကျကာကွယ်ဆေး ထိုးပြီး နောက်ထပ်၂ပတ်(ဝက်အသက်၈ပတ်)တွင် ဝက်နားရွက်ပြာ ကာကွယ် ဆေးကို ထိုးပေးရမည်။

·      အထက်ပါကာကွယ်ဆေး (၂) မျိုးလုံးကို နောက်ထပ်(၆) လကြာတိုင်း တကြိမ်စီ ထပ်မံထိုးပေးရမည်။

·      ဝက်အသက်(၂)လပြည့်ပါက သံချဆေးထိုးကို (၁)ကြိမ်မဖြစ်မနေ ထိုးပေးပါ။

·      အစာအုပ်စု(၃) မျိုးစလုံး လိုအပ်သောပမာဏအတိုင်းပါစေရန် အောက်ပါအတိုင်း နေ့စဥ်ကျွေးပါ။

အထူးသတိထားသင့်သည့်အချက်များ

·      ဝက်ငယ် အသက် ၁လခွဲနှင့်အထက်ရှိပါက ဝက်ဝမ်းကျ နှင့် ဝက်နားရွက်ပြာ ကာကွယ်ဆေးကို မထိုးဘဲနေခြင်းသည် အလွန်အန္တရာယ်များပါသည်။

·      ဝက်ကလေး အသက် ၂ လနှင့်ကျော်ပါက သံချပေးခြင်းကို မလုပ်ဆောင်ပေးပါက ဝက်များ သံကောင်စွဲပြီး ကြီးထွားနှုန်းကို ထိခိုက်နိုင်သည့်အပြင် သေဆုံးသည်အထိဖြစ်တတ်ပါသည်။

·      အသက် ၂ လအောက်ဝက်ငယ်များကို အလွန်အေးသောအချိန်တွင် ရေချိုးပေးခြင်းကို မပြုလုပ်သင့်ပါ။

(၂) အသက်၄လမှ၆လ ဝက်လတ်ကို မွေးမြူပြုစုခြင်း

·      ဝက်များကို ရေချိုးပေးနိုင်သော်လည်း ရာသီဥတုသိပ်ပူသော အချိန်တွင် ရေမချိုးပေးရပါ။ နွေရာသီတွင်    မနက် ၉ နာရီမှ ညနေ ၆ နာရီအထိ ရေမချိုးပေးသင့်ပါ။

·      ရာသီဥတု သိပ်အေးသောအချိန်များတွင်လည်း ရေမပေးချိုးသင့်ပါ။ ဆောင်းရာသီ မနက်ပိုင်းတွင် ရေချိုးပေးလိုပါက မနက်၉နာရီကျော်မှ ပေးချိုးသင့်ပါသည်။ ညနေပိုင်းတွင် ရေပေးချိုးလိုပါက ၅နာရီထက် နောက်မကျစေဘဲ ပေးချိုးသင့်ပါသည်။

·      အသက်၄လမှ ၆လအတွင်းတွင် သံချဆေးထိုးဆေးကို ဒုတိယအကြိမ် ထပ်မံထိုးပေးရမည်။ ဒုတိယအကြိမ် သည် ပထမအကြိမ်နှင့် ၂လခွာပီးထိုးပေးရမည်။

·      အစာအုပ်စု(၃) စုလုံးလိုအပ်သည့်ပမာဏအတိုင်းနေ့စဥ်ကျွေးမွေးရမည်။

(၃) အသက် ၆လနှင့်အထက် ဝက်ကြီးများကို ပြုစုမွေးမြူခြင်း

·      အသက်(၂)လမှ ၆လအတွင်း သံချဆေးကို (၁) ကြိမ်ဖြစ်စေ၊ (၂) ကြိမ်ဖြစ်စေ ထိုးထားပြီးပါက ၆လကျော် သည့်ဝက်များကို သံချဆေးထိုးလိုပါက နောက်ဆုံးအကြိမ်ထိုးထားသည်မှ (၆)လ တကြိမ်ပြန်ထိုးပါ။ သို့သော် (၁)ကြိမ်မှမထိုးရ သေးပါက ၁ကြိမ်မဖြစ်မနေထိုးပေးပါ။

·      ရာသီဥတုသိပ်ပူသောအချိန်၊ရာသီဥတုသိပ်အေးသောအချိန်များတွင်ရေမချိုးပေးပါနှင့်။

·      အစာ (၃) အုပ်စု လိုအပ်သောပမာဏအတိုင်းပါအောင် နေ့စဥ်ကျွေးပါ။

ဝက်ကြီး၊ဝက်လတ်ဆိုင်ရာ အထူးသတိပြုသင့်သည့်အချက်များ

·      ရာသီဥတု ပူလွန်း၊အေးလွန်းသော အချိန်တွင်ရေမချိုးပေးသင့်ပါ။

( ဆက်ရန် - ဝက်ငယ်၊ဝက်လတ်၊ဝက်ကြီး၊ဇီးဝက်မ၊နို့ပေးဝက်မ၊ဝက်သိုးအတွက် အစာစပ်ပုံ၊ကျွေးပုံကို ဇယားနှင့် ဆက်လက်ဖော်ပြပေးမည်)

မွေးမြူရေးနှင့် ကုသရေးပညာရှင် - ဒေါက်တာစောထွန်းထွန်း

-----------

🔗 ဉာဏ်စမ်းဖြေဆိုရန် လင့် - https://htwettoe.com/post/59466

🔗 ဆော့ဝဲလ်ဒေါင်းရန် – https://download.htwettoe.com

🔗 ထွက်တိုးဆော့ဝဲလ်ရှိ မွေးမြူရေးဂရု – https://htwettoe.com/organization/4

🔗 FB မွေးမြူရေးတောင်သူများဂရု – https://www.facebook.com/groups/4200052776702483