ရန်ကုန်တိုင်း ၂၀၂၆ ခုနှစ်၊ ဇန်နဝါရီလ ၅ ရက် မှ ဇန်ဝါရီလ ၁၁ ရက်အထိ မိုးလေဝသအခြေအနေ

ပင်လယ်ပြင်မှ ထူးခြားသည့်မိုးလေဝသအခြေအနေများ 

·          အိန္ဒိယသမုဒ္ဒရာတောင်ပိုင်းတွင်ဖြစ်ပေါ်လျှက်ရှိသည့် ဆိုင်ကလုန်းမုန်တိုင်း GRANT၊ လေဖိအားနည်းရပ်ဝန်း-Depression 11U တို့၏အရှိန်ကြောင့် ဘင်္ဂလားပင်လယ်အော်တောင်ပိုင်း အထက် ၅.၈ ကီလိုမီတာအမြင့် (ပေ ၁၉,၀၀၀) မှာ အထက်လေပွေလှိုင်းတခုဖြစ်ပေါ်လျှက်ရှိပါတယ်။ အဆိုပါလေပွေလှိုင်းသည် ဇန်နဝါရီ ၁၀ ရက်အထိဆက်လက်တည်ရှိနိုင်ပြီး အားပိုကောင်းလာနိုင်သည့်အခြေအနေမရှိပါ။ 

·          ဘင်္ဂလားပင်လယ်အော်တောင်ပိုင်းတွင်ဖြစ်ပေါ်လျှက်ရှိသည့် လေပွေလှိုင်း(INVEST-90B) သည် အနောက်ဘက်-သီရိလင်္ကာကျွန်းနှင့် အိန္ဒိယနိုင်ငံတောင်ပိုင်းတို့သို့ ဆက်လက်ရွေ့လျားနိုင်ပြီး အိန္ဒိယနိုင်ငံတောင်ပိုင်းနှင့် သီရိလင်္ကာကျွန်း အရှေ့ပိုင်းတို့တွင် မိုးရေချိန်များနိုင်/မိုးသည်းထန်နိုင်ပြီး မြန်မာနိုင်ငံတွင် တိမ်အနည်းငယ်ဖြစ်ထွန်းကာ မြောက်ပိုင်းဒေသအချို့တွင် မိုးအနည်းငယ်မျှသာ ရွာသွန်းနိုင်ပါတယ်။ 

ယခု ၁ ပတ်အတွင်း ရန်ကုန်တိုင်းတွင်မိုးရွာသွန်းနိုင်မည့်အခြေအနေ 

·          အမြင့်ပေ ၂၀,၀၀၀ အထက်တွင် တိမ်မြင့်(High-clouds)အနည်းငယ်(60% ခန့်)ဖြစ်ထွန်းပြီးမိုးအုံ့နေနိုင်ပါတယ်။ မိုးရွာနိုင်သည့်အခြေအနေမရှိပါ၊ 

·          တိမ်အမြင့်များဖြစ်ထွန်းမှုရှိသော်လည်း မြောက်၊ အနောက်မြောက်နှင့် အရှေ့မြောက်အရပ်များမှ လေအေးများဆက်လက်တိုးဝင်နေဦးမှာဖြစ်လို့ နံနက်အစောပိုင်းအချိန်များမှာ ဆက်လက်၍ အေးနေပါဦးမယ်။ 

အပူချိန်၊ လေတိုက်နှုန်း၊ လေထုစိုထိုင်းဆနှင့် လေထုညစ်ညမ်းမှုအခြေအနေ 

·          ယခု ၁ ပတ်အတွင်း - ရန်ကုန်တိုင်းတောင်ပိုင်းဒေသများဖြစ်သည့် ကျောက်တန်း၊ ဝါးဘလောက်သောက်၊ ခရမ်း၊ သုံးခွ စသည့်မြို့နယ်များတွင် အမြင့်ဆုံးအပူချိန် ၃၀°C နှင့် အနိမ့်ဆုံးအပူချိန် ၁၇°C ရှိနိုင်ပါမယ်။ 

·          ရန်ကုန်မြို့တွင်းမြို့နယ်များဖြစ်တဲ့ ဗိုလ်တထောင်၊ ကျောက်တံတား၊ ကမာရွတ်၊ သင်္ဃန်းကျွန်း၊ လှိုင်၊ တာမွေ၊ မြောက်ဥက္ကလာ၊ မရမ်းကုန်း၊ ဒဂုံမြို့သစ်မြို့နယ်များ မှာ အမြင့်ဆုံးအပူချိန် ၃၀°C နှင့် အနိမ့်ဆုံးအပူချိန် ၁၈°C ရှိနေပြီး ဆောင်းရာသီရဲ့ အအေးဓါတ်ဆက်လက်ရရှိနေပါဦးမယ်။ 

·          ရန်ကုန်မြောက်ပိုင်း၊ အနောက်ပိုင်းနဲ့ အရှေ့ပိုင်းမြို့နယ်တွေမှာလည်း အမြင့်ဆုံးအပူချိန် ၃၀°C နှင့် အနိမ့်ဆုံးအပူချိန် ၁၈°C ရှိနေနိုင်ပါတယ်။ 

·          ရန်ကုန်တိုင်းမြောက်ပိုင်းအစွန်က တိုက်ကြီး၊ မှော်ဘီ၊ ဖေါင်ကြီး၊ လှည်းကူး စတဲ့ မြို့နယ်တွေမှာ အမြင့်ဆုံးအပူချိန် ၃၀°C နှင့် အနိမ့်ဆုံးအပူချိန် ၁၇°C ရှိနိုင်ပြီး ရန်ကုန်တိုင်းတခုလုံးအနေနဲ့ ယခု ၁ ပါတ်အတွင်းမှာ နေ့အပူချိန် ၃၀°C ဝန်းကျင်နဲ့ အနိမ့်ဆုံးအပူချိန် ၁၇°C -၁၈°C ရှိနေနိုင်ပြီး ဆက်၍ အေးနေပါဦးမယ်။ 

·          ရန်ကုန်မြို့တွင်း လေထုညစ်ညမ်းမှုအညွှန်းကိန်းက 165 အထိ မြင့်တက်နေတာကြောင့် အသက်ရှုလမ်းကြောင်းဆိုင်ရာ ရောဂါအခံရှိသူများ သတိထားရမည့် level ဖြစ်ပါတယ်။ 

·          ရန်ကုန်တိုင်းရဲ့ လေထုစိုထိုင်းဆအခြေအနေသည် နေ့လည်ပိုင်းအချိန်များမှာ ၃၀% မှ ၄၀% ဝန်းကျင်ရှိနေပြီး၊ ညပိုင်းနဲ့ မနက်အစောပိုင်းအချိန်တွေမှာ 80% အထက်မှာ ရှိနိုင်ပါတယ်။ 

ရန်ကုန်မြောက်ပိုင်းမြို့နယ်များမှာ မြေအောက်အနက် ၄၀ စင်တီမီတာအထိ မြေဆီလွှာစိုထိုင်းဆ ၄% နဲ့ မြေအောက်အနက် ၄၀ မှ ၁၀၀ စင်တီမီတာမှ မြေဆီလွှာစိုထိုင်းဆ ၁၇% ရှိနေပါမယ်။ ရန်ကုန်တိုင်းတောင်ပိုင်း ကမ်းရိုးတန်အနီးမှမြို့နယ်များမှာတော့ မြေအောက်အနက် ၄၀ စင်တီမီတာအထိ မြေဆီလွှာစိုထိုင်းဆ ၂၁% နဲ့ မြေအောက်အနက် ၄၀ မှ ၁၀၀ စင်တီမီတာမှ မြေဆီလွှာစိုထိုင်းဆ ၅၀% ရှိနေပါမယ်။ 

------ 

Win Naing 

Administration Team, 

MMWEATHER, 

ငါးကန်များတွင် မနက်ပိုင်းအစာကျွေးရာတွင် သတိပြုရန် 

မနက်ပိုင်း(၈)နာရီအချိန်တွင် ငါးမွေးကန်၏ ရေအပူချိန်ကို တိုင်းတာပါက 23 °C နှင့် 24 °C တွ့ရှိရပြီး 25 °C မကျော်လွန်တာကို တွေ့ရှိရပါသည်။ ငါးမွေးတောင်သူများသည် သမာရိုးကျအတိုင်း မနက်ပိုင်း (၉)နာရီတွင် အစာကျွေးခြင်းကို ဆောင်ရွက်ကြသဖြင့် အဆိုပါအချိန်တွင် ငါးမွေးကန်ရေအပူချိန်သည် 25°C နှင့် 26°C လောက်တွင်ရှိနေပြီး ငါးများအစာစားခြင်းနည်းပါးလာသည်ကို ကြုံတွေ့ရပါမည်။ အစာကြွင်းအစာကျန်များလာပါက ကန်အောက်ခြေညစ်ညမ်းလာစေပြီး၊ ကန်အတွင်းအမိုးနီးယားကို ဖြစ်ပေါ်လာတတ်ပါသည်။ ထို့ကြောင့် အစာအလေ့ အဘွင့်များခြင်းအပြင် ကန်အတွင်းအမိုးနီးယားကို ဖြစ်ပေါ်လာစေသဖြင့် ကန်ရေ အပူချိန် တိုင်းတာပြီးမှ အစာကျွေးခြင်းကို ဆောင်ရွက်သင့်ပါကြောင်း တင်ပြအပ်ပါသည်။ ငါးများအတွက် အစာစားခြင်းအကောင်းဆုံးကန်ရေ အပူချိန်မှာ 27°C, 28°C, 29 °C တို့ဖြစ်ပါသည်။ 

----------     

ထွက်တိုး Telegram Channel ဝင်ရန် နှိပ်ပါ - https://t.me/htwettoe      

စိုက်ပျိုးရေးနှင့် ပတ်သတ်သော အခက်အခဲများကို တိုင်ပင်ဆွေးနွေး အကြံဥာဏ်ရယူလိုပါက ထွက်တိုး တောင်သူအကြံပေးဖုန်း- ၀၉၉၇၇၉၁၀၀၀၀ ကို ဆက်သွယ်နိုင်ပါတယ် သို့မဟုတ် ထွက်တိုးကို follow, Like, Share နှင့် Download လုပ်ထားပြီး -http://download.htwettoe.com/ ထွက်တိုးမေးဖြေကဏ္ဍတွင်ဝင်ရောက်မေးမြန်း နိုင်ပါ ကြောင်းသတင်းကောင်းပါလိုက်ပါတယ်။