ကြက်မွေးမြူရေးတွင် အထွေထွေသိသင့်သည့်အချက်များ

(၁) အပူရှပ်ခြင်း

·      ကြက်များကိုလှောင်ထားသောအချိန်များတွင်နေပူမိခြင်းကြောင့်လည်းကောင်း၊ ကြက်ဥတင်းသည် နေပူမိခြင်းကြောင့်လည်းကောင်း၊ ကြက်များ အပူရှပ်ခြင်းများဖြစ်တတ်ပါသည်။

·      စဖြစ်ခါစတွင် ကြက်များအမောက်ပြာနှမ်းခြင်း၊ စအိုကျုံ့လိုက်ပွလိုက်ဖြစ်ခြင်း၊ ခေါင်းငိုက်စိုက်ကျကာ ခေါင်းမထောင်တော့ခြင်း၊ ပျော့ခွေသွားပြီး မကြာမှီသေဆုံးခြင်းများဖြစ်ပါသည်။

·      ထိုသို့လက္ခဏာများတွေ့ပါက ကြက်များကိုအရိပ်အောက်သို့ရွေ့ပြီး ရေတိုက်ပေးခြင်း၊ ယပ်ခပ်ပေးခြင်း၊ အဝတ်ကိုရေဆွတ်ပြီး ခေါင်းနှင့်ကိုယ်လုံးရှိ အမွေးများကို ပြောင်းပြန်လှန်ပြီးတိုက်ပေးခြင်း၊ ခြေထောက် ရေစိမ်ပေးခြင်း များပြုလုပ်ပေးရမည်။

  (၂) ကြက်ကျောက်ရောဂါ

·      အရပ်ခေါ် နှင်းသီးခြင်းဖြစ်သည်။

·      အလွန်ပျော့သော ဗိုင်းရပ်(စ) တမျိုးကြောင့် ဖြစ်ပွားရသည်။

·      အသက် ၁-၃ လ ကြက်ကလေးများတွင် အများဆုံးတွေ့ရတတ်သည်။

·      ဆောင်းရာသီတွင် ပိုတွေ့ရတတ်သည်။

·      ခြင်ကိုက်ခြင်း၊ ကြက်အချင်းချင်းခွပ်ရာမှလည်း ဖြစ်တတ်သည်။

·      ကြက်များ၏အမွေးမရှိသည့်နေရာများဖြစ်သည့် မျက်စိဝန်းကျင်၊နှုတ်သီးအရင်းများတွင် ထိပ်မဲနေသော အဖုကလေးများဖြစ်ပေါ်သည်။ ပါးစပ်၏အတွင်းပိုင်းတွင်လည်း အဖြူဖတ်များဖြစ်တတ်သည်။ မျက်စိတွင်ဖြစ်ပါက မျက်စိမမြင်ရသဖြင့် အစာမစားနိုင်ခြင်း၊ ပါးစပ်တွင်ဖြစ်ပါကလည်း အစာမစားနိုင်ခြင်း တို့ကြောင့်တဖြည်းဖြည်းနှင့်သေဆုံးသွားတတ်ပါသည်။

·      ဖြစ်သည့်နေရာအဖုကလေးများကို အရက်ပျံတို့ပေးခြင်း၊ သံပုရာသီးဖြင့်ပွတ်ပေးခြင်း၊ အိုင်အိုဒင်းရည်( ဘီတာဒိုင်း နီညိုရောင်အရည်) သုတ်လိမ်းပေးနိုင်ပါသည်။

(၃) မျက်စိတွင်ပြည်ဖုများတည်ခြင်း

ကြက်ကလေးများ အသက် ၁လမှ၂လ အတွင်းတွင် အများဆုံးတွေ့ရသည်။

ဖြစ်ပွားရသည့်အကြောင်းရင်း

·      ကြက်ကလေးများ ပေါက်လာချိန်တွင် ကြက်မနှင့်ကြက်ကလေးများကို တောင်းထဲထည့်ကာ ရက်ရှည် ညသိပ်ခြင်း

·      ကြက်ကလေးများအိပ်သောနေရာသည် နိမ့်သဖြင့် ပါလိုက်သောချေးငွေ့များ ကြက်ကလေးများ၏ မျက်စိ ထဲ ကြာရှည်စွာ ဝင်ရောက်ခြင်း

·      ကြက်ခြံလေလုံသဖြင့် ညအိပ်စဥ်တွင် ချေးငွေ့မျက်စိထဲသို့ ရိုက်ခြင်း စသည်တို့ကြောင့် ကြာလာပါက ကြက်ကလေးမျက်လုံးတွင် မျက်ရည်များထွက်လာပါသည်။ ကြက်ကလးများမျက်စိစပ်သဖြင့် အတောင် ဖြင့် ပွတ်ရာမှ ဘက်တီးရီးယားပိုးများဝင်ရောက်လာကာ မျက်လုံးစတင်ယောင်လာကာကြာလာပါက မျက်စိတွင် အဖြူရောင်အဆံကြီး ဖြစ်လာခြင်းဖြစ်သည်။ ကြက်များလည်း တဖြည်းဖြည်းပိန်ပြီး နောက်ဆုံး တွင် သေဆုံးတတ်ပါသည်။

ကုသခြင်း

·      ကြက်ခြံကို အလင်းရောင်နှင့် လေဝင်လေထွက်ကောင်းအောင်ပြုလုပ်ပါ။

·      မျက်လုံးစတင်နာချိန် မျက်ရည်စထွက်ချိန်တွင် လူသုံးသော မျက်စဥ်းဆေးကို တနေ့ (၂) ကြိမ်ခပ်ပေး ပါ။

·      မျက်လုံးတွင်အဆံဖြစ်ပါက ညှစ်ထုတ်ပြီး မျက်စဥ်းဆေးခပ်ပေးပါ။

·      အောက်စီတက်ထရာဆေးလုံးကို မနက်တကြိမ်၊ ညနေတကြိမ် ၃ ရက်ဆက်တိုက်တိုက်ပေးပါ။

·      စိမ်းစိုသော အရွက်များကို များများကျွေးပါ။

·      ကြက်အိပ်စင်ကို မြှင့်တင်ပေးပါ။

---------

မွေးမြူရေးနှင့် ကုသရေးပညာရှင် - ဒေါက်တာစောထွန်းထွန်း

🔗 ဉာဏ်စမ်းဖြေဆိုရန် - https://htwettoe.com/post/60520

🔗 ဆော့ဝဲလ်ဒေါင်းရန် – https://download.htwettoe.com

🔗 ထွက်တိုးဆော့ဝဲလ်ရှိ မွေးမြူရေးဂရု – https://htwettoe.com/organization/4

🔗 FB မွေးမြူရေးတောင်သူများဂရု – https://www.facebook.com/groups/4200052776702483