အဇိုလာဆိုသည်မှာရေညှိများစွာထဲမှ ရေညှိတစ်မျိုးပင်ဖြစ်သည်။ အဇိုလာသည် လေထဲမှ နိုက်ထရိုဂျင်ဓါတ်ကို ဖမ်းယူနိုင် သည်။ လေထဲမှ နိုက်ထရိုဂျင်ကို ဖမ်းယူပြီး ယင်းတို့ကြီးထွားမှုအတွက် စားသုံးသည်။ ပိုလျှံသမျှကို သိုလှောင်ထားသည်။

ထို့နောက်သိုလှောင်ထားသည့်နိုက်ထရိုဂျင်ဓာတ်များကို မြေဆီလွှာတွင်းသို့ ပြန်၍ထုတ်လွှတ်ပေးသည်။ ဤနည်းဖြင့် မြေဆီလွှာတွင် နိုက်ထရိုဂျင်ဓါတ် ကြွယ်ဝစေပြီး ယင်းမြေတွင် စိုက်ပျိုးထားသော သီးနှံပင်များကို အကျိုးပြုသည်။

နိုင်ထရိုဂျင်ဓါတ်သည် သီးနှံပင်များ အောင်မြင်ဖြစ်ထွန်းရေးအတွက် လိုအပ်သော အဓိကဓါတ်သုံးမျိုးတွင် ပါဝင်ပါသည်။ နိုင်ထရိုဂျင်ဓါတ် သည် အပင်၊ အကိုင်း၊ အခက် နှင့် အရွက်များ သန်စွမ်းမှုကို အထူးအကျိုးပြုပြီး အဆံအသီးအနှံ အောင်မြင်ရေးကိုလည်း များစွာ အထောက်အကူပြုသည်။ နိုက်ထရိုဂျင်ဓါတ်ကို အဇိုလာ ဇီဝမြေသြဇာက ကောင်းစွာ ထုတ်လုပ်ပေးနိုင်သည်။

အဇိုလာထည့်ပေးသော စပါးခင်းများသည် စမ်းပြာရေညှိမှ ထုတ်ပေးသော နိုက်ထရိုဂျင်ဓါတ်ကို စားသုံးရ၍ အပင်ကောင်းစွာ ဖြစ်ထွန်းပြီး အသီးအနှံဖွံ့ဖြိုး၍ အထွက်တိုးသည်။

အဇိုလာ၏ အစွမ်းသတ္တိ နှင့် အကျိုးကျေးဇူး

၁။ အဇိုလာ ထည့်ပေးသော စပါးခင်းများသည် အဇိုလာထည့်မပေးသော စပါးခင်းများထက် တစ်ဧက စပါး (၂) တင်းမှ (၅)တင်း ခန့်ထိ ပိုမိုထွက်ရှိသည်။

၂။ လယ်တစ်ဧကတွင် အဇိုလာ ဇီဝမြေသြဇာ ထည့်သွင်းအသုံးပြုခြင်းဖြင့် စပါးပင်များ၏ ပင်စည်၊ ပင်ပွား၊ အရွက်များ ဖွံ့ဖြိုးသန်စွမ်း မှုကို ဖြစ်စေသည့် နိုက်ထရိုဂျင် (၆-၉) ပိဿာအထိ စပါးစိုက်ခင်းတွင် ရရှိနိုင်သည်။

၃။ ကျယ်ကျယ်ပြန့်ပြန့် အသုံးပြုပါက လယ်မြေများ၏ မြေဆီသြဇာပိုမိုကောင်းမွန်လာပြီး တစ်ဧကတွင် စပါးအထွက်နှုန်းကို (၁၅)မှ (၂၅) ရာခိုင်နှုန်းအထိ တိုးမြှင့်ထွက်ရှိစေသည်။

၄။ ဤသို့ စပါးစိုက်ပျိုးရာတွင် အကျိုးထူးသည့် အဇိုလာကို ဝယ်ယူရန်မလိုပါ။ ကိုယ်တိုင်မွေးမြူ ရရှိနိုင်သည်။ အဇိုလာ မွေးမြူရန်မှာ မခက်ခဲပါ။ စနစ်တကျမွေးဖို့သာ လိုသည်။

၅။ စပါးရိတ်သိမ်းပြီးသောအခါ အဇိုလာသည် ခြောက်သွေ့သွားပြီး ထိုလယ်မြေတွင် လက်ကျန်အဖြစ် အနည်းနှင့်အများ တည်ရှိခြင်း ဖြင့် လာမည့်နှစ်အတွက် အသင့်အတင့် အကျိုးပြုပါသည်။ ဆက်တိုက်အသုံးပြုပါက အကျိုးအများဆုံး ခံစားရရှိနိုင်သည်။

အဇိုလာမွေးမြူနည်း

၁။ အဇိုလာမျိုးကို မြန်မာ့စိုက်ပျိုးရေးလုပ်ငန်းမှ ရယူပါ။

၂။ ပွားများမှု ကောင်းမွန်ရန်အတွက် နေရောင်ခြည်ကောင်းစွာရပြီး အရိပ်မကျသည့် နေရာမျိုးတွင်ရွေးချယ်ရမည်။

၃။ မွေးမြူမည့်နေရာတွင် တိရိစ္ဆာန် အညစ်အကြေးများ၊ မြေဆွေးနှင့် သစ်ရွက်ဆွေးများ အနီးအနားတွင် မရှိစေရ။ သို့မှသာ မလိုအပ်သည့် အခြားရေညှိမျိုးများ ရောနှောပေါက်ရောက်လာမှုမှ ကာကွယ်နိုင်မည်။

မွေးမြူကန်တည်ဆောက်နည်း

၁။ ကန်အရွယ်အစားကို တစ်ပိုင်တစ်နိုင်အလွယ်တကူမွေးမြူအသုံးပြုနိုင်ရန် အလျား ၆- ပေ၊ အနံ ၃-ပေ၊ အနက် ၉-လက်မ ရှိသင့်သည်။

၂။ ယင်းကန်ငယ်ကလေးများကို ကွန်ကရစ်အုတ်ကန်ဖြင့် ဖြစ်စေ၊ အုတ်ချပ်များစီ၍ ပလပ်စတစ်တစ်ခင်း ကန်ဖြင့်ဖြစ်စေ၊ တွင်းတူးပြီး ပလပ်စတစ်ဖြင့်ခင်း၍ ပြုလုပ်သည့် ကန်ဖြစ်စေ၊ သင့်တော်သလို စီမံပြုလုပ်နိုင်သည်။

မွေးမြူနည်း

၁။ ကန်အတွင်းသို့ ကောင်းစွာနေပူလှန်းအခြောက်ခံထားသည့်နုံးမြေသန့်သန့် ၅-ပြည် ကို ဖြန့်ထည့်ရသည်။

၂။ ၎င်းနောက် တီစူပါဓါတ်မြေသြဇာ ပယ်နယ်စလင် ပုလင်း (၆) ပုလင်းနှင့် အိမ်သုံးဆား ပယ်နယ်စလင် (၁/၃) ပုံခန့် ကန်အတွင်းရှိ နုံးမြေထဲသို့ ထည့်ပေးရသည်။

၃။ အကယ်၍ မိုးရေချိန်လက်မ (၄၀)ကျော်သော ဒေသများတွင် မြေချဉ်နေပါက မြေချဉ်မှ မြေငံအဖြစ် သမလာစေရန် မဖောက်ထုံး ပယ်နယ်စလင် (၄) ပုလင်းမှ (၆) ပုလင်းအထိ ထည့်သွင်းပေးပါက ပို၍ဖြစ်ထွန်းသည်။

၄။ ထို့နောက် ကန်အတွင်းသို့ ရေကို အဝတ်စဖြင့် စစ်ပြီး ရေသန့် (၃)လက်မမှ (၆)လက်မ အထိ ဖြည့်သွင်းပေးရသည်။

၅။ ၎င်းနောက် အဇိုလာမျိုး (၁၅) ကျပ်သားခန့်ကို ကန်အတွင်းသို့ ညီညာစွာဖြန့်ဖြူးထည့်သွင်းပေးရသည်။

၆။ အလင်းရောင်နှင့် အပူချိန်ကောင်းစွာရရှိပါက ကန်အတွင်းတွင် (၁၀)ရက်မှ (၁၄)ရက် အကြာ၌ အဇိုလာများ အချပ်လိုက်ပြန့်ပွား လာမည်ဖြစ်သည်။

စုဆောင်းသိမ်းဆည်းနည်း

၁။ ပထမအကြိမ်တွင် ကန်ထဲရှိ အဇိုလာများ၏ (၃/၄)ပုံကို သိမ်းဆည်း၍ အခြောက်လှန်းရမည်။

၂။ ဒုတိယအကြိမ်တွင်လည်း ပထမအကြိမ်နည်းအတိုင်း ရိတ်သိမ်းပြီး အခြောက်လှန်းရသည်။

၃။ တတိယအကြိမ်တွင် တစ်ကန်လုံးရှိ အဇိုလာများနှင့် နုံးမြေများပါ သိမ်းဆည်း အခြောက်လှန်းရမည်။

၄။ သိမ်းဆည်းပြီးသော အဇိုလာများနှင့် ကန်အတွင်းမှ ရရှိသည့် နုံးမြေအားလုံးကို ရောမွှေပြီး စုပေါင်းသိမ်းဆည်း ထားရမည်။

၅။ ဤသို့ဖြင့် အဇိုလာ မွေးမြူကန်တစ်ကန်မှ စပါးစိုက်ခင်းများတွင် အသုံးပြုရန်အတွက် နုံးမြေရော အဇိုလာ ဇီဝမြေသြဇာ (၈) ပိဿာခန့်ကို ရရှိနိုင်ပါသည်။

သတိပြုရန်နှင့် သိမှတ်ရန် အချက်များ

၁။ အဇိုလာမွေးမြူရာတွင် မိမိမွေးမြူလိုသည့် နိုက်ထရိုဂျင်ဓါတ်ကို ရယူပေးနိုင်သည့် အဇိုလာမှအပ အခြားရေညှိမျိုးများ ပါဝင်မလာစေရန် သတိပြုရမည်။

၂။ အသုံးပြုမည့် နုံးမြေများကို (၂)ရက် (၃)ရက် ခန့် နေလှန်းပြီးမှ သုံးသင့်သည်။

၃။ ပိုးမွှားရောဂါနှင့် အခြားရေညှိများ မွေးမြူရေးကန်အတွင်း ရောနှောပါဝင်မလာစေရန် ရေကို အဝတ်ဖြင့် စစ်ထည့်ပေးနိုင်က ပိုကောင်း သည်။

၄။ မွေးမြူရေးကန်အတွင်းရှိ အဇိုလာများကို အန္တရာယ်ဖြစ်စေမည့် ပိုးများ ကျရောက်ခဲ့ပါက ပိုးသတ်ဆေးဖြင့် ပက်ဖျန်းပေးခြင်းဖြင့် ကာကွယ်နိုင်သည်။

၅။ မိမိမွေးမြူသည့် အဇိုလာမျိုးမဟုတ်သည့် အခြားရေညှိစိမ်းများ တွေ့ရှိပါက တစ်ရက်ခြား စစ်ဆေးပြီး ဂရုစိုက် ဖယ်ထုတ်ပေး သင့်သည်။

အသုံးပြုနည်း

၁။ အဇိုလာဇီဝမြေသြဇာမှာ စပါးပင်များ အပင်၊ ပင်စည်၊ ပင်ပွား၊ အရွက်များ ဖွံ့ဖြိုးသန်စွမ်းမှုအတွက် လိုအပ်သည့် နိုက်ထရိုဂျင်ဓါတ် ကို ထုတ်လုပ်ပေးနိုင်သဖြင့် စပါးစိုက်ခင်းများတွင် အခြားလိုအပ်သည့် အသီးအပွင့်နှင့် အနံ့အရဿာရှိမှုကို အားပေးသည့် တီစူပါ၊ ဖော့စ ဖိတ် ဓါတ်မြေသြဇာ၊ ပိုတက်ဓါတ်မြေသြဇာများနှင့် တွဲဖက်သုံးလျှင် ပို၍ အကျိုးရှိသည်။ လိုအပ်ပါက ပုလဲဓါတ်မြေသြဇာကိုလည်း ထည့် သွင်းအသုံးပြုသင့်သည်။

၂။ စပါးစိုက်ခင်းတွင် စိုက်ပျိုးပြီး (၇)ရက်မှ (၁၀)ရက်အကြာ ကောက်ပင်လှန်ချိန် တစ်ဧက အဇိုလာ (၃) ပိဿာခန့်ကို လယ်ကွက်၏ တည်နေပုံကြည့်ပြီး ပျံ့နှံ့စွာရောက်ရှိစေရန် စပါးတန်း (၅)တန်း ခြား ခန့်မှန်း၍ တန်းကြားအတွင်း ဖြန့်ဖြူးချပေးပါ။

မြန်မာ့စိုက်ပျိုးရေးလုပ်ငန်း

Azolla

Lessons

အဇိုလာ အစွမ်းသတ္တိနှင့် အကျိုးကျေးဇူးများ