မျိုးစေ့အကြာင်း၊ မြေအကြောင်း၊ ရေအကြောင်း၊ နေအကြောင်း စသည်တို့ကို သိရှိပြီး လိုက်နာဆောင်ရွက်ကြဖို့ အထူးလိုအပ်ပါတယ်။ တစ်မျိုးမျိုးချို့ယွင်းနေရင် သီးနှံပင်ရဲ့ထုတ်လုပ်မှု စွမ်းအားလည်း အထိုက်အလျောက်လျှော့သွားမည်မှာ ဓမ္မတာသာဖြစ်သည်ကို သတိပြုစေချင်ပါတယ်။ ကမ္ဘာပေါ်ရှိ လူဦးရေသန်းပေါင်း ၇၀၀၀ ကျော် သို့မဟုတ် မြန်မာနိုင်ငံတွင်းရှိ လူဦးရေ သန်း ၅၀ကျော် ၆၀ အတွက် စားနပ်ရိက္ခာကို ကျွန်တော်တို့ တောင်သူကြီးများက မိမိတို့လုပ်အားဖြင့် မြေကြီးကို အခြေခံ၍ စိုက်မည့်မျိုးကိုအရင်းပြုပြီး နည်းပညာကို မှန်ကန်စွာသုံးစွဲ၍ ရာသီဥတုကို အန်တုကာ စိုက်ပျိုးထုတ်လုပ်ပေးဖို့ တာဝန်ယူကြရပါတယ်။၁။ မြေကွက်ကို ပြုပြင်ခြင်းမြေမျက်နှာပြင်ကို တစ်ကွက်ချင်းညီညာအောင် လုပ်ဆောင်ပါ။ ထွန်ချပြီး မြေညှိပါ။ အဲဒီလိုလုပ်ဆောင်ဖို့ မလွယ်ကူပါက မြေကွက်ကျယ်ရင် မြေမျက်နှာပြင်ညီရာတို့ကို ကန်သင်းဖြင့် ပိုင်းခြားပေးပါ။ မြေမျက်နှာပြင် မညီညာနိုင်ရင် ကွန်တိုခေါ်သော မျဉ်းကွေးနည်းသုံးပြီး စိုက်ပျိုးပါ။ ကွန်တိုနည်းနဲ့မရရင် လှေကားထစ်အကွက်ဖော်ပြီး စိုက်ပျိုးပါ။ ရေထုတ်မြောင်း၊ ရေသွင်းမြောင်းတို့ကို လိုအပ်သလို ဖောက်လုပ်ထားပါ။၂။ မျိုး၊ မျိုးကွဲရွေးချယ်ခြင်းမိမိမြေကွက်အလိုက် မျိုး၊ မျိုးကွဲကိုရွေးချယ်ပြီး စိုက်ပျိုးပါ။ “မျိုးစေ့မမှန်၊ ပင်မသန်၊ ဖူးတံငုံကင်း အသီးဖျင်း”ဟု ဆိုရိုးရှိပါတယ်။ခရမ်းချဉ်၊ ငရုတ်၊ ကြက်သွန်နီ စတဲ့ သီးနှံများကို ပျိုးထောင်ပြီးမှ စိုက်ပျိုးပါ။ ပြောင်းဖူး၊ နှံစားပြောင်း၊ ပဲ၊ ဝါ စတဲ့ သီးနှံများကို (အခွံမာနူးရုံ) ရေစိမ်ပြီးမှ စိုက်ပျိုးပါ။ (နံနက်ခင်းမှာ ရေစိမ်၊ ညနေမှာ စိုက်ပျိုး။ ညနေမှာရေစိမ်ပြီး နောက်နေ့မနက်မှာ စိုက်ပျိုးပါ) တချို့သီးနှံမျိုးကို မိုးခေါင်ဒဏ်ခံနိုင်အောင် လေ့ကျင့်ပေးပါ။ အစေ့ခွံရေနူးအောင်စိမ်၍ နေလှန်းရတယ်။ အဲဒီလို ရေစိမ်လိုက်၊ နေလှန်းလိုက် သုံးလေးကြိမ်လုပ်ပြီးမှ စိုက်ပျိုးရင် မိုးခေါင်ဒဏ်ကို ခံနိုင်တယ်။ (ဥပမာ - ဝါ၊ ပြောင်း၊ နှံစားပြောင်း စသည်များ)၃။ ထွန်ယက်ရေးနွားထယ်နဲ့ နှစ်စပ်၊ သုံးစပ်ရအောင် မိုးကြိုမှာဖြစ်စေ၊ မိုးနှောင်းမှာဖြစ်စေ ထယ်ထိုးထားပါ။ မြေမျက်နှာပြင် ညီညာနေရင်အလျား၊အနံ မရွေးဘဲ ထိုးနိုင်ပါတယ်။ ဒါပေမယ့် ကုန်စောင်းမြေ ဖြစ်နေပါက အဲဒီဆင်ခြေလျှောကို ကန့်လန့်ဖြတ်ပြီးထိုးပါ။ သိပ္ပံထယ်(မြေကြီးကိုလှန်ပေးသော နားရွက်ပါသည်) ကိုသုံးပြီး အနည်းဆုံး ရှစ်လက်မ၊ ၁၀ လက်မခန့်အထိ ထယ်စူးနက်စေရပါမယ်။ထယ်ခဲကြီးများကို ကြေညက်စေဖို့ ခုနစ်သွားထွန်ဖြင့် လေးစပ်၊ ငါးစပ် ထွန်ပေးပါ။ “ ခဲကြီးမှ ပဲသီးတယ်”ဆိုတဲ့ အယူအဆကိုလက်မခံကြဖို့ လိုပါတယ်။ စိုက်ပျိုးမယ့် သီးနှံအစေ့သေးသလောက် ထွန်ရေးညက်သင့်ပါတယ်။ ဒါပေမယ့် ပေါင်ဒါမှုန့်လိုတော့မညက်သင့်ဘူးပေါ့။ မြေစိုင်ခဲကလေးများရဲ့ အရွယ်မှာ တစ်လက်မရဲ့ ၅၀ ပုံရင်တစ်ပုံမှ ၁၂ ပုံခန့်ရှိရင် အကောင်းဆုံးဖြစ် ပါတယ်။ထယ်ရေး (ထယ်+ထွန်) ရှိတဲ့ မြေကွက်က ထယ်ရေးမရှိတဲ့ မြေကွက်ထက် မိုးရေကို နှစ်ဆပိုပြီး စုပ်ယူထားနိုင်တယ်။ မြေကွက်ကျယ်ဝန်းရင် ကန်သင်းရိုးနဲ့ကပ်ပြီး မြောင်း၊ ကျင်း တစ်ခုတူးထားပါ။ (ရေစုထားရန်)၄။ မြေဆီသြဇာဓာတ် ထည့်ခြင်းမိုးကောင်းသောက် ယာမြေတစ်ဧကကွက် တစ်ကွက်မှာ နွားချေးမြေသြဇာကို နွားလှည်းနဲ့ ၁၀ စီး (၂၀၀ ပိဿာ _ ၁၀ စီး) နှစ်စဉ်ထည့်ပေးရန် လိုအပ်ပါတယ်။ (နွားချေးမြေသြဇာဆိုရာမှာ မိမိအိမ်မှာ မွေးထားတဲ့ ကျွဲ၊ နွား၊ သိုး၊ ဆိတ်၊ ဝက်၊ ကြက်၊ ဘဲ စတဲ့တိရစ္ဆာန်မျိုးစုံရဲ့ ချေးများနဲ့ မီးဖိုဆောင်နဲ့ နွားစာကျင်းကထွက်သမျှ စွန့်ပစ်ပစ္စည်း အားလုံးကို ကျင်းတူးပြီး လှောင်ထားတဲ့ ပစ္စည်းများ ဖြစ်ပါတယ်။) အဲ့ဒီလောက်များပြားတဲ့ နွားချေးမြေသြဇာ မလုံလောက်ရင်လည်း မိမိမှာရှိတဲ့ အကွက်များထဲက သုံးပုံတစ်ပုံမြေကွက်မှာ မြစ်ဖုပါတဲ့ ပဲတစ်မျိုးမျိုးကို နှစ်စဉ် အကွက်ပြောင်းလဲ စိုက်ပျိုးပြီး ပန်းပွင့်ချိန်မှာ ထယ်နဲ့ထိုးပြီး မြေကြီးနဲ့ရောမွှေထားရပါမယ်။ အိမ်မွေးတိရစ္ဆာန်တို့ရဲ့ ကျင်ကြီး (ချေး) တို့ကို စနစ်တကျ စုဆောင်းထားရင် ကျွဲ၊ နွားတစ်ကောင် (သို့) မြင်းတစ်ကောင်(သို့) ဝက်ငါးကောင် (သို့) သိုး၊ ဆိတ် ခုနစ်ကောင် (သို့မဟုတ်) ကြက်အကောင် ၁၀၀၀တို့က တစ်နှစ်မှာ ချေးပိဿာ ၁၀၀၀-၁၅၀၀ခန့်စီ (နွားလှည်းငါးစီး၊ ခုနစ်စီးခန့်) ရရှိနိုင်ပါတယ်။- ဒေါက်တာချစ်မြန်မာတောင်သူကြီးများ ဂျာနယ်

How to Plant

Lessons

ယာသီးနှံ လက်တွေ့စိုက်ပျိုးနည်းလမ်းများ