➤ပိုးစာပင်စိုက်ပျိုးနည်းစနစ်များပိုးစာပင်ကို မြန်မာပြည်နေရာအနှံ့စိုက်ပျိုးနိုင်သော်လည်း ပိုးမွေးမြူရန် အသင့်တော်ဆုံးရာသီဥတုဖြစ်သည့် အပူလျော့တောင်ပေါ်ဒေသရာသီဥတုမျိုးတွင် စိုက်ပျိုးပါက ပိုမိုကောင်းမွန်ပါသည်။သဲနုန်းမြေကို အနှစ်သက်ဆုံးဖြစ်သည်။ အကောင်းဆုံး မြေအချဉ်၊ အငန်ဓါတ်မှာ ၆.၅ မှ ၇ အတွင်းဖြစ်သည်။ မြေအချဉ်ငန်ဓါတ် ၅.၅ ထက်လျော့နည်းပါက ထုံးထည့်ပေးရန်လိုအပ်သည်။အရွက်အထွက်နှုန်းကောင်းမွန်သည့် မြန်မာရွက်ကြီးမျိုး၊ BR-60 ထိုင်းမျိုးနှင့် အရည်အသွေးကောင်းမွန်သည့် S-28 ဗီယက်နမ်မျိုး၊ တရုတ်မျိုးများကို ရွေးချယ်စိုက်ပျိုးသင့်သည်။မေလမှဇွန်လအတွင်း ပိုးစာပင်များအပြီးစိုက်ပါ။ ၆ လမှ ၁နှစ်သားပျိုးပင်များအား စိုက်ပျိုးခြင်းသည် အပင်အသေအပျောက်နည်းပြီး ကိုင်းဖြတ်စိုက်ပျိုးခြင်းသည် အပင်အသေအပျောက်များစေနိုင်ပါသည်။ပင်ကြား၊ တန်းကြား ၅ ပေ x ၂ ပေ အပင်ဦးရေ (၄၃၅၆) ပင်၊ ၆ ပေ x ၂ ပေ အပင်ဦးရေ (၃၆၃၀) ပင်၊ ၃ ပေ x ၂ ပေ အပင်ဦးရေ (၇၂၆၀) ပင်ရှိ ခြုံပုတ်သဏ္ဍာန် စိုက်ပျိုးနည်းစနစ်သည် မြန်မာပြည်နှင့် သင့်လျော်ပါသည်။စိုက်ပျိုးမည့်စနစ်အလိုက် ၂ ပေ x ၂ ပေ စိုက်ကျင်းများတူး၍သော်လည်းကောင်း၊ ၁.၅ ပေ x ၁.၅ ပေ အနက် စိုက်မြောင်းများတူး၍သော်လည်းကောင်း စိုက်ကျင်းများတွင် နွားချေး (၁၀) ပြည်၊ ထုံး (သို့) ထုံးပြာ နို့ဆီဗူး (၂) ဗူးထည့်ပေးသင့်သည်။ပိုးစာပင်တစ်ဧကလျှင် ယူရီးယား (၁၁၂) ပေါင်၊ တီစူပါ (၅၆) ပေါင်၊ ပိုတက်ရှ် (၅၆) ပေါင်နှင့် နွားချေး (၁၀) တန်ခန့် ထည့်သွင်းပေးရမည်။ပေါင်းမြက်များအား မြေဩဇာမထည့်မီ (၁) ကြိမ်၊ ပိုးမမွေးမီ (၂) ကြိမ် ရှင်းလင်းပေးရမည်။ပိုးစာပင်စိုက်ပျိုးပြီး ထွက်ရှိလာသော ကိုင်းညွန့်များမှ အကောင်းဆုံး (၁ - ၃) ညွန့်ကို တစ်နှစ်သားအရွယ်ထိထားပြီး ဒုတိယနှစ်မိုးဦးရာသီတွင် မြေပြင်မှ (၉ - ၁၀) လက်မခန့်ခွာ၍ ကိုင်းဖြတ်ပုံသွင်းပေးရမည်။ ဇွန်၊ ဇူလိုင်လများတွင် မြေပြင်မှ (၉ - ၁၂) လက်မထိ အမြင့် (Base Cut) ဖြတ်ခြင်းတစ်ကြိမ်နှင့် ဒီဇင်ဘာ၊ ဇန်နဝါရီလများတွင် ထိပ်ဖျားကိုင်းဖြတ်ခြင်း (Topping) တစ်ကြိမ်၊ တစ်နှစ်လျှင်နှစ်ကြိမ် ကိုင်းဖြတ်ပုံသွင်းပေးရပါမည်။အရည်အသွေးကောင်းမွန်၍ အထွက်နှုန်းမြင့်မားသောပိုးအိမ်ရရှိရန် ဆောင်ရွက်ရမည့်အဓိကအချက်များ· အာဟာရပြည့်ဝသောပိုးစာရွက်ရရှိရေး· ပိုးမွေးမြူသည့်နည်းစနစ်မှန်ကန်ရေး· ပိုးရောဂါတားဆီးကာကွယ်နှိမ်နင်းရေးပိုးမွေးမြူနည်းစနစ်များပိုးဥမှအကောင်ပေါက်သည်အထိ (၁၀) ရက်မှ (၁၂) ရက်ခန့် အကောင်ဖောက်ရသည်။ ဥမှပေါက်ပြီး အကောင်ငယ်များအား ပိုးမွေးဗန်းတွင်ထည့်ပြီး ပိုးမွေးစင်ဖြင့်မွေးမြူရသည်။ ပိုးမွေးစင်အား သစ်သားဖြင့် အခိုင်အမာပြုလုပ်နိုင်သကဲ့သို့ ဒေသထွက် ဝါးဖြင့်လည်းပြုလုပ် အသုံးပြုနိုင်သည်။ ပိုးအိမ်လုံးရရှိစေရန်အတွက် မွေးမြူသည့်ပိုးသည် ပထမအဆင့်၊ ဒုတိယအဆင့်၊ တတိယအဆင့်၊ စတုတ္ထအဆင့်နှင့် ပဥ္စမအဆင့်ဟူ၍ အဆင့် (၅) ဆင့်ဖြင့် ကြီးထွားလာပြီးနောက် ပိုးအိမ်ဖွဲ့ပါသည်။ ဥမှပေါက်သည်မှ ပိုးအိမ်လုံးပြီးချိန်ထိ (၂၆ - ၂၈) ရက်ကြာမြင့်ပါသည်။➤ပိုးငယ်အဆင့်ဆင့်မွေးနည်းပိုးငယ်ပထမအဆင့်တွင် ပိုးစာပင်ထိပ်ပိုင်းဖျားညွန့် နီကျင်ကျင်အရွက်အောက်ရှိ (၁ - ၂) အရွက်များကို ခူးကျွေးရမည်။ ပိုးငယ်ဒုတိယအဆင့်ကို နီကျင်ကျင်အရွက်အောက် အမှတ် (၃ - ၄) အရွက်ကို ခူးကျွေးရမည်။ ပိုးငယ်တတိယအဆင့်ကို နီကျင်ကျင်အရွက် အောက်နံပါတ် (၅ - ၆) အရွက်ကို ခူးကျွေးရမည်။ နေ့စဉ် (၄) ကြိမ်မှ (၅) ကြိမ်ကျွေးရမည်။➤ပိုးကြီးအဆင့်မွေးမြူခြင်းပိုးစတုတ္ထနှင့် ပဥ္စမအဆင့်တွင် နီကျင်ကျင်အရွက်အောက်ရှိ နံပါတ် (၆) ၏ အောက်မှ အရွက်များကိုခူး၍ ကျွေးရမည်။ ၎င်းအဆင့်များ၌ နေ့စဉ် (၄) ကြိမ် ကျွေးရမည်။ ပဥ္စမအဆင့်၌ (၇) ရက်မှ (၉) ရက်ခန့် အစာစား၍ ပိုးအိမ်များစတင်ဖွဲ့သည်။➤ပိုးအိမ်ဖွဲ့ခြင်းဖယောင်းသားအရောင်ပေါက်၍ ပါးစပ်မှ ပိုးချည်မှုတ်နေသော ပိုးကောင်များကို ပိုးအိမ်ဖွဲ့ကိရိယာအတွင်းသို့ ကောက်ထည့်ပေးရမည်။ (၃) ရက်ခန့်ကြာလျှင် ပိုးအိမ်လုံးခြင်းပြီးဆုံးသည်။ ပိုးအိမ်ဖွဲ့နေစဉ် နေ့နှင့်ည အပူချိန် (၂၇ - ၂၈) ဒီဂရီစင်တီဂရိတ်နှင့် စိုထိုင်းဆ (၇၀ - ၇၅) ရာခိုင်နှုန်း အမြဲရှိရန်လိုသည်။➤ပိုးအိမ်များ ဖြုတ်သိမ်းခြင်းပိုးအိမ်ဖွဲ့ကိရိယာများမှ ပိုးအိမ်များကို ပိုးအိမ်ဖွဲ့ပြီး (၄) ရက်မှ (၇) ရက်အတွင်း အပြီးဖြုတ်သိမ်းရမည်။ (၄) ရက်ထက်စောပါက ပိုးချည်အထွက်နှုန်းကို လျော့နည်းစေနိုင်ပြီး (၇) ရက်ထက် နောက်ကျပါက ပိုးအိမ်လုံးမှ ဖလံများဖောက်ထွက်လာနိုင်သည်။ ဖြုတ်သိမ်းပြီး ပိုးအိမ်များ၏ အပေါ်ယံအမွှေးပွများကို ရှင်းလင်းဖယ်ရှားရမည်။➤ပိုးအိမ်ရောင်းခြင်းဖြုတ်သိမ်း၍ အမွေးပွများခွာပြီးပြီးခြင်း ပိုးအိမ်များကို ပိုးအိမ်အစိုအတိုင်း ရောင်းချနိုင်သကဲ့သို့ ပိုးအိမ်များကို နေပြင်းပြင်းတွင် (၃) ရက်ခန့်လှမ်းပြီး (သို့) မီးသွေးမီးဖိုဖြင့် အပူပေးပြီး အခြောက်အနေဖြင့်လည်း ရောင်းချနိုင်သည်။➤ပိုးစာသုတေသနခြံများ· မျိုးပိုးဥနှင့် ပိုးစာသုတေသနခြံ· ပိုးချည်စက်ရုံနှင့် ပိုးစာသုတေသနခြံ (ပြင်ဦးလွင်)· ပိုးချည်စက်ရုံနှင့် ပိုးစာသုတေသနခြံ (တီးတိန်)Credit - စိုက်ပျိုးရေးဦးစီးဌာန (ဝါနှင့်လျှော်မျှင်ထွက်သီးနှံဌာနခွဲ)

Mulberry

Lessons

ပိုးစာစိုက်ပျိုးရေးနှင့် ပိုးမွေးမြူရေး