ငှက်ပျောဖူး ဆိုသည်မှာ ငှက်ပျောပင် တစ်ပင်ရှိ ငှက်ပျောခိုင်၏ ထိပ်တွင်ရှိသော မရမ်းရောင်ရင့်ရင့် အဖူးဖြစ်ပါတယ်။ ပျမ်းမျှ ၁၀ လက်မလောက် ရှည်ပါတယ်။ ၎င်း ငှက်ပျောဖူးကို ခူးဆွတ်ရာမှာအစေးရည်များ ထွက်ကျလာလေ့ရှိပါတယ်။

လက်ပေါ်ကို ပေကျံသာအစေးရည်ကို ရေဖြင့်အလွယ်တကူဆေးကြောနိုင်သော်လည်းအဝတ်ပေါ်စွန်းထင်းမိပါကချွတ်ရခက်ပါတယ်။ ချို၍ဖန်သော အရသာရှိသည့် ငှက်ပျောဖူးကို ကြိုက်နှစ်သက်သူများက ငှက်ပျောဖူး၏ အပေါ်ခွံကိုခွာ၍ လိုအပ်သလို လှီးဖြတ်ပြီးနောက် ကြက်သား၊ မျှင်ငါးပိ၊ဆီအနည်းတို့ဖြင့်ချက်၍စားကြပါတယ်။ကြက်သွန်နီ၊ ကြက်သွန်ဖြူ၊ ခရမ်းချဉ်သီးတို့ဖြင့် ဆီပြန်ချက်စားကြပါတယ်။

ဆန်မှုန့်၊ ပဲမှုန့် တို့ဖြင့်ရော၍ ဘယာကြော်ကဲ့သို့ ကြော်စားကြပါတယ်။ ငှက်ပျောဖူးကို ပြုတ်၍ ပါးပါးလှီးကာ မျှင်ငါးပိ၊ မန်ကျည်းသီး မှည့်အရည် (သို့) သံပရာရည်၊ ငရုတ်သီးစိမ်း တို့ဖြင့် သုပ်စားကြပါတယ်။ ငှက်ပျောဖူးကို မြန်မာ့ ဆေးကျမ်းရှုထောင့်မှ ကြည့်ပါက ငှက်ပျောဖူးသည် ကြေညက်ခဲ၏။ အဆီမရှိဘဲ အေး၏။ လေ၊ သည်းခြေတို့ကို နိုင်၏။ သွေးအန် သွေးကျကိုနိုင်၏။

ခွန်အားကုန်ခမ်းသာ ရောဂါကိုနိုင်၏။ အပူကြောင့်ဖြစ်သော ရောဂါများကို ပျောက်ကင်းသက်သာစေ၏။ ဖန်သောအရာရှိပြီး ဆီနည်း၊ ဝမ်းချုပ်၊ လေချုပ်၊ သွေးချုပ်စေတတ်၏ဟု ပြောထားပါတယ်။ ငှက်ပျောဖူးကို ဆေးသိပ္ပံနည်းအရလေ့လာစမ်းစစ်ကြည့်ရာ ကျန်းမာရေးအရ ဆေးဖက်ဝင်ပုံကို အောက်ပါအတိုင်း လေ့လာ သိရှိရပါတယ်။

ကူးစက်ရောဂါ ဝေဒနာများကို ကုသပေးနိုင်ပါတယ်။
ငှက်ပျောဖူးထဲမှာ အီသနောဓာတ် ပါဝင်နေတာကြောင့်၊ ကူးစက်ရောဂါ ဘက်တီးရီးယားတွေ ကြီးထွားမှုမှ ကာကွယ်ပေးနိုင်ပါတယ်။ ဒါ့ပြင် ငှက်ဖျားရောဂါပိုး ကြီးထွားပြန့်ပွားမှုကို ကာကွယ်ပေးနိုင်ပါတယ်။

ဆီးချို၊ သွေးချိုနှင့် သွေးအားနည်း ရောဂါကို နိုင်ပါတယ်။
ဆီးချို၊ သွေးချို ရောဂါသည်များ အနေဖြင့် ငှက်ပျောဖူးကို ပြုတ်၍ သော်လည်းကောင်း၊ ကြော်၍ သော်လည်းကောင်း စားပေးခြင်းဖြင့် သွေးထဲက သကြားဓာတ် ပမာဏကို လျှော့ချပေးနိုင်ပါတယ်။ ဒါ့ပြင် ငှက်ပျောဖူးထဲမှာ သံဓာတ်နှင့် အမျှင်ဓာတ်တွေ ပေါ<ကယ်ဝတာကြောင့် သွေးနီဥ ထုတ်လူပ်မှုကို အားပေးနိုင်၍ သွေးအားနည်း ရောဂါရှိသူများ ငှက်ပျောဖူး စားပေးသင့်ပါတယ်။

နို့ထွက်အားကောင်း စေပါတယ်။
နို့တိုက် မိခင်များ နို့ထွက်အားကောင်းစေဖို့အတွက် ငှက်ပျောဖူး လတ်လတ်ဆတ်ဆတ်ကို အစေးတွေကုန်အောင် ရေစင်စင်ဆေးပြီးနောက် အဆင်ပြေသလို ချက်ပြုတ်ကြော်သုပ်၍ အမျိုးမျိုး စားသုံးပေးသင့်ပါတယ်။

ဖရီးရယ်ဒီကယ်လ်တွေကို လျှော့ချပေးနိုင်ပါတယ်။
ငှက်ပျောဖူးထဲမှာ ခန္ဓာကိုယ်အကျိုးပြု ဓာတ်တိုး ဆန့်ကျင်ပစ္စည်းတွေ ပိုင်ဆိုင်ထားတာကြောင့် ကင်ဆာရောဂါများနှင့် ဇရာအိုအကြို ရောဂါ ဖြစ်ခြင်းတို့ကို ကုသပေးနိုင်စွမ်းရှိပါတယ်။ ဤနည်းအားဖြင့် လူကိုဘေးဖြစ်စေတတ်သော ဖရီးရယ်ဒီကယ်လ်များ၏ အန္တရာယ်မှ လျှော့ချပေးနိုင်ပါတယ်။

ဓမ္မတာလွန်ခြင်းမှ ကာကွယ်ပေးနိုင်ပါတယ်။
ငှက်ပျောဖူးက သွေးချုပ်စေတတ်သော အာနိသင်ရှိတာကြောင့် ဓမ္မတာ ရာသီသွေးလွန်သူများ ငှက်ပျောဖူးကို ဆားနှင့် ပြုတ်၍ သောက်ပေးသင့်ပါတယ်။

ကိုယ်အလေးချိန်ကျလိုသူများကို အထောက်အပံ့ ဖြစ်စေပါတယ်။
ငှက်ပျောဖူးထဲမှာ အမျှင်ဓာတ်နှင့် အာဟာရပြုဓာတ်တွေ ပါရှိနေ၍ ကိုယ်အလေးချိန်ချလိုသူများ ငှက်ပျောဖူးကို သုပ်၍သော်လည်းကောင်း၊ ဟင်းချိုချက်၍ သော်လည်းကောင်း စားသုံးပေးနိုင်ပါတယ်။

ဗီတာမင်နှင့် သတ္တုဓာတ် ကြွယ်ဝပါတယ်။
ငှက်ပျောဖူးထဲမှာ ဗီတာမင် စီ၊ အေ၊ အီး၊ အမျှင်ဓာတ်နှင့် ပိုတက်စီယမ် စတဲ့ ဗီတာမင်နှင့် သတ္တုဓာတ်တွေ ပိုင်ဆိုင်ထားတာကြောင့် စားသုံးသူအတွက် အာဟာရ ဖြစ်စေပါတယ်။

သားအိမ် အားကောင်းစေပါတယ်။
သားအိမ်ရောဂါ အမျိုးမျိုးအတွက် ငှက်ပျောဖူးကို နနွင်းမှုန့်၊ ငရုတ်ကောင်းမှုန့်၊ ပင်စိမ်းပင်၏ အစေ့တို့ဖြင့် ပြုတ်သောက်ပေးပါ။ (ပင်စိမ်းပင်၏ အစေ့ကို ပရဆေးဆိုင်များတွင် ဝယ်ယူရရှိနိုင်ပါတယ်)

လေပွ လေတက်ခြင်းကို သက်သာစေပါတယ်။
ထူးထူးခြားခြား အနေဖြင့် ငှက်ပျောဖူးထဲမှာ ကြေညက်လွယ်သော အမျှင်ဓာတ်နှင့် ကြေညက်ခဲသော အမျှင်ဓာတ်နှစ်မျိုးစလုံးပါရှိ နေကြပါတယ်။ ကြေညက်လွယ်သော အမျှင်ဓာတ်က အစာချေစနစ်ကို သက်တောင့်သက်သာ ဖြစ်စေပြီး အစာချေရည်ဖြင့် ဓာတ်ပြုကာ အူနှင့် အစာချေ လမ်းကြောင်း တစ်လျှောက် ဂျယ်လီကဲ့သို ချောမွေ့မှု ဖြစ်စေပါတယ်။

ကြေညက်ခဲသော အမျှင်ဓာတ်က အစာချေရည်တွင် အလွယ်တကူ မပျော်ဝင်နိုင်တာကြောင့် နောက်ထပ် အစားများများစားချင်စိတ်ကို ချိုးနှိမ်ပေးပါတယ်။ ၎င်းအမျှင်ဓာတ် နှစ်မျိုးစလုံးက လူကို ဘေးဥပါဒ်မရှိတဲ့အပြင်၊ အစာချေ အင်္ဂါအဖွဲ့အစည်းကို အထောက်အပံ့ဖြစ်စေပါတယ်။

ကင်ဆာနှင့် နှလုံးရောဂါဖြစ်နိုင် ခြေအလားအလာ လျှော့ချပေးပါတယ်။
ငှက်ပျောဖူးထဲမှာ တန်းနင်၊ အက်ဆစ်၊ ဖလေဗိုနွိုက်၊ ဓာတ်တိုး ဆန့်ကျင် ပစ္စည်း စတဲ့ သက်စောင့်ဓာတ်ပေါင်းစုများ ပါရှိနေကြပြီး၊ ၎င်း ဓာတ်ပေါင်းစုများက ခန္ဓာကိုယ်ကို ဒုက္ခပေးနိုင်တဲ့ ဖရီးရယ်ဒီကယ်လ်များနှင့် အောက်စီဒေးတစ် ဖျက်ဆီးမှုတို့မှ ပြည့်ပြည်၀၀ ခုခံပေး ထားနိုင်တာကြောင့် ကင်ဆာရောဂါများနှင့် နှလုံးရောဂါဖြစ်ခြင်းကို ကာကွယ်ပေးနိုင်ပါတယ်။

အာရုံကြော ပြဿနာတွေကို ကောင်းကျိုးပြုပါတယ်။
သက်စောင့် ဓာတ်ပေါင်းစုများ ပါရှိတဲ့ ငှက်ပျောဖူးကို ပုံမှန် စားသုံးပေးခြင်းအားဖြင့် အယ်လ်ဇိုင်းမား - Alzheimer (ခေါ်) ဦးနှောက် ဇရာကြိုရောဂါနှင့် ပါကင်န်ဆဲန် - Parkinson (ခေါ်) ဇရာအို ခြေတုံ၊ လက်တုံ ရောဂါများ ဖြစ်မလာအောင် ကြိုတင်ကာကွယ်ရာ ရောက်ပါတယ်။

- ပေါက်ပေါက်

မြန်မာတောင်သူကြီးများ ဂျာနယ်

Crop Nutrition Articles for Banana

Learning Series

ဆေးဖက်ဝင် ငှက်ပျောဖူး