နိဒါန်း

ပန်းဂေါ်ဖီ သည် ဂေါ်ဖီထုပ် ကဲ့သို့ အအေး ကြိုက် သော်လည်း ဂေါ်ဖီ ထုပ်ထက် အပူ ဒဏ်ခံ နိုင်သည်။ အေးပြီး အစိုဓာတ်အမြဲ ရရန် လိုသည်။ အကယ်၍ ရာသီဥတု ခြောက်သွေ့ နေလျှင် ပန်းဂေါ်ဖီ အပွင့် ဖြစ်မလာ နိုင်ပါ။ ထို့ကြောင့် ပန်းဂေါ်ဖီစိုက်လျှင် မြေ အမျိုးအစား ထက် ရာသီ ဥတုက ပိုမို အရေးကြီး သည်။ မြန်မာ နိုင်ငံတွင်း ပန်းဂေါ်ဖီ စိုက်ရာသီမှာ မတ်လမှအောက်တိုဘာလ အတွင်း စိုက်ပျိုး ကြသည်။ ရှမ်းပြည်နယ် တောင်ပိုင်းမှ တောင်တန်း ဒေသတွင် မိုးရာသီ ကာလအတွင်း စိုက်ပျိုး ဖြစ်ထွန်းပြီး မြေပြန့် ဒေသများတွင် ဆောင်းရာသီကာလ တွင်သာ စိုက်ပျိုးဖြစ်ထွန်းနိုင်သည်။ မိုးရာသီကာလတွင် ရှမ်း(တောင်)၊ ရှမ်း(မြောက်)မှ ပန်းဂေါ်ဖီကို အဓိက အားထား စားသုံးကြသည်။

မျိုး

ယခုအခါ နိုင်ငံခြားမှ ပန်းဂေါ်ဖီ စပ်မျိုးများ ဝင်ရောက်လာ သောကြောင့် ယခင် စိုက်ပျိုး နေသော ဒေသမျိုး များမှာ ဆက်လက်မစိုက်ပျိုးတော့ပဲ ပျောက်ကွယ်သွားသည်။ စပ်မျိုးများကို သက်တမ်းအလိုက် သက်လျင်မျိုးတွင် ၉၀ ရက်သား၊သက်လတ်မျိုးတွင် ၁၀၀ ရက်သားနှင့် သက်ကြီးမျိုးတွင် ၁၂၀ ရက်သားဟူ၍ ဆွတ်ခူးရ မည့်ရက်ကို သတ်မှတ်ထားသည်။ အမည်အားဖြင့် အမျိုးမျိုးကွဲပြားသည်။ ယခုအခါ အပူဒဏ်ပိုမိုခံနိုင်သော သက်တမ်း ၉၀ အောက် သက်လျင်မျိုးများ နိုင်ငံခြားမှစတင်ဝင်ရောက်လျက်ရှိသည်။

ပျိုးထောင်ခြင်း

အကျယ် သုံးပေ၊ အမြင့် ခြောက်ပေ လက်မခန့်ရှိ ပျိုးဘောင်တွင်းသို့ သဘာ၀ မြေဆွေးနှင့် အောက်ခံမြေ ဆတူ ရောစပ်၍ မြေကိုမှုန့်ညက်နေစေရန် ပြုပြင်ပေးရပါမည်။ ဘောင်ပေါ်တွင် လေးလက်မခြား၊ မြောင်းငယ် များကို နှစ်လက်မ အနက်ရအောင် ဆွဲပါ။ မျိုးစေ့များ ခပ်ပါးပါးချ၍ မြေပြန်ဖုံးပေးရမည်။ တစ်ဧကစာအတွက် မျိုးစေ့ ၁၀၀ ဂရမ်ပျိုးထောင်ပါ။ ပျိုးဘောင် ကို နေ့စဉ် ရေခပ်ပါးပါးလောင်းပေးရမည်။ တောင်ပေါ်ဒေသတွင် မတ်လမှ အောက်တိုဘာလကြား ပျိုးထောင်ပါက ပျိုးဘောင်ကို အပင်ပေါက်မစုံမီ မိုးကာပေးရန်လိုအပ်ပြီး မြေပြန့်တွင် အောက်တိုဘာလ၊ နိုဝင်ဘာလတို့၌ ပျိုးထောင်ပါက အပင်ပေါက်မစုံမီ ကောက်ရိုးပါးပါးအုပ်ထားပေးရမည်။ အညှောင့်ပေါက်ပြီး ၁၂ ရက်ကြာလျှင် ကြားပေါင်းလိုက်ပေးပါ။ ပျိုးသက် ၂၀ ရက်ခန့်တွင် ယူရီးယားမြေသြဇာကို ရေဖျော်လောင်း ပေးပါ။ ထို့နောက် ရေဝအောင်လောင်းပေးရမည်။ ပျိုးဘောင်အစိုဓာတ်မပြတ်စေရန် လိုအပ်သကဲ့သို့ အစိုဓာတ် များလွန်း၍ မှိုနှင့်အခြားရောဂါမဝင်စေရန်လည်း ဂရုစိုက်ပေးရပါမည်။ ပျိုးသက် ၁၄-၂၁ ရက်တွင် ပျိုးပင် တစ်ပင်နှင့် တစ်ပင်ကြပ်နေပါက သားခွဲရန်လိုအပ်ပြီး အချိုးညီ(၂၀ : ၂၀ : ၂၀)ရွက်ဖျန်းမြေသြဇာ နှစ်ကြိမ် ပက်ဖျန်းပေးပါ။

မြေပြုပြင်ခြင်း

စိုက်ခင်းမြေကို ညက်သည်ထိ ထယ်ထိုးခြင်း၊ ထွန်မွှေခြင်းဆောင်ရွက်ထားရပါမည်။ ပေါင်းမြက် အမှိုက်၊ ကျောက်ခဲများကောက်ပစ်ပါ။ မိုးများသောဒေသများတွင် မြေအချဉ်အငန်ဓာတ် ၆ ဒသမ ၅ ဝန်းကျင် ထိန်း ထားနိုင်ရန်ထုံးထည့်ပေးရပါမည်။ မြေခံအဖြစ် စိုက်ကျင်းအတွင်းသို့ သဘာဝမြေဆွေးနှင့် တီစူပါရောမွှေ ထည့်ပေးရပါမည်။ အပင်ရွှေ့စိုက်ချိန် မိုးပြတ်ပါက ရေလောင်းပေးရန် လိုအပ်သည်။ ရေသွင်း၊ ရေထုတ် မြောင်းများ ပြုလုပ်ပေးထားရပါမည်။ မြေသြဇာကျွေးရာတွင် ပန်းဂေါ်ဖီအစိမ်းတွင် အသုံးပြုသည့် နှုန်းထား အတိုင်းကျွေးနိုင်ပါသည်။

စိုက်ပျိုးခြင်း

ပျိုးပင် ၂၁ ရက်သားတွင် အစာနှင့်ရေဖြတ်ပြီး ပျိုးပင်(၂၅-၃၀)ရက်တွင် စိုက်ခင်းသို့ ရွှေ့စိုက်ပါ။ ညနေစောင်းအချိန်၌ စိုက်ကျင်းထဲသို့ရေလောင်းထည့်၍ ရေခံပြီး ရွှေ့စိုက်ပါ။ တစ်ပင်နှင့် တစ်ပင် (၁ ဒသမ ၅ - ၂)ပေနှင့် တန်းကြား(၂ - ၂ဒသမ ၅)ပေထားစိုက်ပါ။

အပင်ပြုစုခြင်း

ရွှေ့စိုက်ပြီး (၁၀-၁၅)ရက်ရလျှင် ခါးဆွခြင်းကို ပြုလုပ်ပေးရသည်။ ကြားပေါင်းလိုက်ခြင်းဖြင့် ဓာတ် မြေသြဇာနှင့် မြေသားသမ သွားစေပါသည်။ ရေကို တစ်ပတ်တစ်ကြိမ်၊ သို့မဟုတ် နှစ်ပတ်လျှင် တစ်ကြိမ်ကျ သွင်းပေးရန် လိုအပ်ပါသည်။ ပန်းဂေါ်ဖီတွင် စိန်ကွက်ဖလံ၊ ပိုးနဂါးများ ဆိုးရွားစွာကျရောက်တတ်၍ တမာ ပိုးသတ်ဆေးဖြင့် ကာကွယ်နှိမ်နင်းပါ။

ခူးဆွတ်ရိတ်သိမ်းခြင်း

အပွင့်ကောင်းစွာ ပွင့်နေချိန်တွင် နေရောင်ခြည်တိုက်ရိုက်ထိတွေ့ပါက ပန်းပွင့်အရည်အသွေးကျဆင်း တတ်၍ အပွင့်အချင်း (၂-၃)လက်မအရွယ်တွင် အပြင်ရွက်များကို စည်းပေးရပါသည်။ သက်တမ်းကိုလိုက်၍ ရွှေ့စိုက်ပြီး (၆၀-၇၅)ရက်ကြာလျှင် ပန်းပွင့်ကိုစတင်ခုတ်နိုင်ပါသည်။ အဝေးသို့ တင်ပို့ရောင်းချမည်ဆိုပါက အရွက်ကို (၂-၃)ရွက်ချန်ထား၍သိမ်းရပါသည်။ မိုးရာသီနှင့် ဆောင်းဦးတွင် တောင်ပေါ်ဒေသများမှ ထွက်ရှိ၍ မြေလတ်၊ မြေပြန့်ဒေသများသို့ တင်ပို့ရောင်းချနိုင်သည်။ ဆောင်းနှောင်း တွင် မြေပြန့်ဒေသများမှ ထွက်ရှိသည်။

မျိုးစေ့ထုတ်ယူခြင်း

ဒေသမျိုးများမှသာ ရွေးချယ်၍ မျိုးစေ့ထုတ်ယူသင့်ပါသည်။ နိုင်ငံခြားစပ်မျိုးများမှ မျိုးမခံသင့်ပါ။ မျိုးစေ့ ထုတ်စိုက်ခင်းအနီးအနားတွင် အခြားပန်းဂေါ်ဖီစိုက်ခင်းမရှိရပါ။ အပင်ငယ်ဘဝမှ ပန်းပွင့်စတင်သည်ထိ မျိုး လက္ခဏာ မမှန်မကန်သော အပင်များကို စစ်ဆေးပြီး ဖယ်ထုတ်နုတ်ပစ်ရပါမည်။ ရောဂါကင်းပြီး ရွေးချယ် ထားသော မျိုးပင်ကို မြေလုံးမပျက်ယူစိုက်ရပါမည်။ အပင်အကွာအဝေး(၂-၂)ပေ စိုက်ကာ၊ အပင်အသား မကျမီ ရေပိုလောင်းပေးရမည်။ နေပူလွန်း၊ ဆီးနှင်းကျလွန်းပါက အရိပ်လုပ်ပေးရမည်။ ပန်းဂေါ်ဖီပန်းဖူးမှ အသီးကိုင်းများ ရှည်ထွက်လာပါက သန်မာသော အသီးကိုင်းကိုသာ ရွေးချယ်မျိုးစေ့ခံယူပါ။ မျိုးသီးများ ရင့်မှည့်ပါက ရိတ်သိမ်းအခြောက်ခံချွေလှေ့သန့်စင်ပြီး လေလုံသောပုံးများဖြင့်သိုလှောင်ပါ။ တစ်ပင်မှ မျိုးစေ့ ၁၄ ဂရမ်ခန့်ထွက်ရှိပါသည်။

ကျမ်းကိုး- ဟင်းသီးဟင်းရွက်စိုက်ပျိုးခြင်း လမ်းညွှန် (စားနပ်ရိက္ခာဖူလုံမှုပူးပေါင်းဆောင်ရွက်ရေးအဖွဲ့)

Cultivation Methods for Cauliflower

Learning Series

ပန်းဂေါ်ဖီ စိုက်ပျိုးနည်း