ဖရဲသီးနှံအထွက်နှုန်း ကောင်းစွာ ရရှိရန်နှင့် အရည်အသွေး ပြည့်မှီသော အသီးကိုရရန် ပေါင်းမြက် နှိမ်နင်းခြင်းသည် အရေးပါသည်။ အပင်ငယ် အဆင့်တွင် ပေါင်းပင်များကို နှိမ်နင်းခြင်းသည် အကျိုးသက်ရောက်မှု အရှိဆုံးနှင့် အလွယ်ဆုံး နည်းလမ်း ပင်ဖြစ်သည်။ လက်ဖြင့် ပေါင်းနှိမ်နင်းခြင်းသည် ထိရောက်မှု အရှိဆုံးနှင့် အပင်ကို ပျက်ဆီး ဆုံးရှုံးမှု အနည်းဆုံး ပင်ဖြစ်သည်။ ပေါင်းမြက်များကို အပင်ကြီးထွားမှု နောက်ပိုင်းမှ နှိမ်နင်းလျှင် ပေါင်းပင် အမြစ်များ ကြီးထွား သန်စွမ်းနေသောကြောင့် နှိမ်နင်းရာတွင် ခက်ခဲပြီး သီးနှံပင်ကိုပါ ထိခိုက် ပျက်စီးနိုင်သည်။ သို့ရာတွင် လက်ဖြင့် ပေါင်းနှိမ်နင်းခြင်းသည် အလုပ်သမား များစွာ လိုအပ်သောကြောင့် ကုန်ကျစရိတ်ကို ပိုစေသည်။

စက်ဖြင့် ပေါင်းနှိမ်နင်းခြင်းသည် ပေါင်းပင်ငယ်လေးများမှ လွဲ၍ ပေါင်းပင်အကြီးများကို အလွယ်တကူ ရှင်းလင်းပေးနိုင်သည်။ သို့သော် နွယ်မျိုးနွယ်ဝင် အပင်များရှိသည့် စိုက်ခင်းတွင် စက်ကို အသုံးပြုပါက နွယ်ပင်များက စက်၏ဘီးများကို ညှိနိုင်သောကြောင့် ပေါင်းမနှိမ်နင်းသင့်ပါ။

ဖရဲခင်းတွင် ရှိသော ပေါင်းမြက်များကို ဓါတုဆေးဖြင့် နှိမ်နင်းခြင်း

ပေါင်းသတ်ဆေးဖြန်းရာမှာ သတိထားစရာ

htwettoeimg ဓာတုနည်းဖြင့် ပေါင်းနှိမ်နှင်းခြင်း
ဓါတုဆေးကို အသုံးပြု၍ ကာကွယ် နှိမ်နင်းရာတွင် ပေါင်းသတ်ဆေးများကို အသုံးပြုမှုနှင့် ခံနိုင်ရည်ရှိမှုသည် ဖရဲမျိုးပေါ် မူတည်၍ ကွဲပြားသည်။ အပင်မစိုက်ခင် စိုက်ခင်းထဲရှိ ပေါင်းပင်များကို ရွေးချယ်မဲ့ ပေါင်းသတ်ဆေး သုံး၍ ကြိုတင် နှိမ်နင်းနိုင်သည်။ အကယ်၍ အပင်များကို ရွှေ့ပြောင်း စိုက်ပျိုးမည်ဆိုပါက အပင်မစိုက်ခင် ပေါင်းသတ်ဆေး အသုံးပြုနိုင်ပါသည်။ တိုက်ရိုက် စိုက်ပျိုးသည့် စိုက်ခင်းများတွင် မိမိစိုက်ပျိုးသည့် သီးနှံပင် မပေါက်သေးခင် ပေါင်းပင်များရှိပါက ပေါင်းသတ်ဆေးများကို အသုံးပြု၍ ကာကွယ် နှိမ်နင်းနိုင်သည်။ ပေါင်းမြတ်များ ဆိုးဝါးစွာ ကျရောက်ပါက မျိုးညှောင့် မပေါက်ခင် ရွေးချယ် ပေါင်းသတ်ဆေးကို အသုံးပြု၍ ကာကွယ် နှိမ်နင်းနိုင်သည်။ စိုက်ခင်းထဲတွင် ပေါင်းသတ်ဆေး ဖျန်းသည့်အခါ မကျွမ်းကျင်ပါက မိမိစိုက်ပျိုးသည့် သီးနှံပင်များကိုပါ ထိမိ၍ သေစေနိုင်သည်။

ဈေးကွက်တွင် အလွယ်တကူ ရနိုင်သော ပေါင်းသတ်ဆေးများကို ဝယ်ယူ အသုံးပြုသည့်အခါ မြန်မာ ဘာသာဖြင့် ရေးထားသော လမ်းညွှန်ချက်များအတိုင်း ဂရုတစိုက် လိုက်နာဖို့ လိုအပ်ပါသည်။ ပေါင်းသတ်ဆေး ဖျန်းသည့်အခါ စနစ်တကျ မဆောင်ရွက်ပါက သီးနှံ အပင်ငယ်များကို ထိခိုက် သေစေနိုင်သည်။

ဆေးဖျန်းသည့်အခါ ဆေးထုပ်ပေါ်တွင် မြန်မာဘာသာဖြင့် ရေးထားသော ဆေးနှုန်းထား၊ ပေါင်းသတ်ဆေး ဖျန်းရမည့်အချိန်၊ သီးနှံမရိတ်သိမ်းခင် စောင့်ဆိုင်းရမည့်ရက်တို့ကို လိုက်နာရန် လိုအပ်ပါသည်။

ဖရဲစိုက်ခင်းတွင် ကျရောက်သော ပေါင်းမြက်များကို နှိမ်နှင်းရန် အပင်စိုက်ပြီး (၁၀) ရက်အကြာတွင် ရေ (၄) ဂါလံဝင် ဆေးဖျန်းပုံးတစ်ပုံးကို ကွီဇလိုဖော့-ပီ-အီသိုင်း (Quizalofop-P-Ethyl 2-4) စားပွဲတင်ဇွန်း (၂-၄) ဇွန်း တစ်ဧကလျှင် ဆေးဖျန်းပုံး ၄-၅ပုံးကို ဖျော်၍ အသုံးပြုနိုင်သည်။
အပင်ပေါက်ပြီးနောက် ပေါင်းသတ်ဆေးကို အသုံးပြုမည်ဆိုပါက ဆေးဖျန်းသူသည် လေငြိမ်သည့် အနေအထားတွင် ဖရဲပင်များကို ပေါင်းသတ်ဆေး မထိစေရန် သေချာ ဂရုတစိုက် ဖျန်းရမည်။

Weed Management for Watermelon

Learning Series

ဖရဲစိုက်ခင်းမှာ ပေါင်းဘယ်လိုရှင်းမလဲ