ဧရာဝတီတိုင်း ဇွန်လ ၁၂ ရက် မှ ဇွန်လ ၁၈ ရက်အထိ မိုးလေဝသအခြေအနေ

တောင်တရုတ်ပင်လယ်ဘက်မှ ဟိုင်နန်ကျွန်းကိုဖြတ်ကျော်ပြီး တရုတ်ပြည်မ တောင်ဘက်ကမ်းရိုးတန်းအတိုင်းဆက်လက်ရွေ့လျားနိုင်သော အားကောင်းတဲ့အပူပိုင်းမုန်တိုင်း WUTIP(01W) နဲ့၊ ဘင်္ဂလားပင်လယ်အော်အနောက်မြောက်ပိုင်းမှာ ဇွန်လ ၁၁ ရက်နေ့က စတင်ဖြစ်ပေါ်လာတဲ့ အထက်လေပွေလှိုင်း(Upper Air Cyclonic Circulation)တို့ရဲ့ အရှိန်သက်ရောက်မှုတွေကြောင့် - 

ဧရာဝတီတိုင်းမှာ အများအားဖြင့် နေရာစိပ်စိပ်မိုးအသင့်အတင့်(၂၄ နာရီ မိုးရေချိန် 30mm အောက် = ၁.၂ လက်မအောက်)ရွာသွန်းနိုင်ပြီး - 

ဒေးဒရဲ၊ မအူပင်၊ ဓနုဖြူ၊ ညောင်တုန်း၊ ဆားမလောက်၊ ဟိုင်းကြီးကျွန်း၊ ပြင်စလူ၊ ငရုတ်ကောင်း၊ သာပေါင်း စတဲ့ မြို့နယ်တွေမှာ ၂၄ နာရီ မိုးရေချိန် 30mm အထက် = ၁.၂ လက်မအထက် မှ ၂.၄ လက်မအထိ(မိုးအသင့်အတင့်မှ မိုးများ)နိုင်ကြောင်း တွေ့ရပါတယ်။ 

မြို့နယ်တစ်ခုနဲ့တစ်ခု ၂၄ နာရီအတွင်း ရရှိတဲ့ မိုးရေချိန်ကွာခြားချက်ရှိနိုင်တဲ့ နေရာကွက်ပြီး မိုးများနိုင်သည့် မိုးလေဝသအခြေအနေက ဇွန်လ ၂၁ ရက်အထိ ရှိနေနိုင်ပါဦးမယ်။  

မိမိနေထိုင်ရာဒေသဝန်းကျင်၏ ၄ ရက် ကြိုတင်မိုးလေဝသအခြေအနေခန့်မှန်းချက်တွေကိုကြည့်ရန် https://www.mmweather.org/divisional-cities-weather/ayarwaddy-div 

အခုရက်သတ္တပါတ် ၁ ပါတ်အတွင်းမှာ တောင်ဘက်နှင့် အနောက်တောင်ဘက်အရပ်တို့မှ လေတိုက်နှုန်းအများဆုံး တနာရီ ၂၅ မိုင်အထိရှိနိုင်ပြီး ကမ်းရိုးတန်းအနီး လှိုင်းအမြင့် ၈ ပေခန့်အထိရှိနိုင်ပါတယ်။ 

ဧရာဝတီတိုင်းအတွင်း မိုးရွာသွန်းခြင်းဆက်လက်ရှိနေနိုင်ဦးမှာမို့ ယခုတပါတ်အတွင်းမှာလဲ လေထုစိုထိုင်းဆ ၉၀% အထက်မှာရှိနေဦးမှာဖြစ်ပြီး အမြင့်ဆုံးနေ့အပူချိန် ၃၀°C နဲ့ အနိမ့်ဆုံး ညအပူချိန် ၂၅°C ရှိနိုင်ပါမယ်။ 

Win Naing 

Administration Team, 

MMWEATHER, 

https://www.mmweather.org/home 

ဧရာဝတီတိုင်းဒေသကြီးရှိ မိုးစပါးစိုက်တောင်သူများထံသို့... 

စိုက်ပျိုးရေးဆိုင်ရာ အကြံပြုချက် 

• မြေဩဇာ မထည့်သွင်းခင် ပေါင်းနှိမ်နင်းခြင်းကိုလုပ်ဆောင်ပါ။ 
• ရွေးချယ်ပေါင်းသတ်ဆေးကို အသုံးပြုလိုပါက စပါးကြဲပြီး ၁၅ ရက်သားမှစတင်ပြီး ပေါင်းရွက် (၂-၄ရွက်) ထွက်ချိန်မှ စတင်ပြီးအသုံးပြုနိုင်ပါတယ်။ 
• ဆေးမဖျန်းခင်အချိန် မိုးရွာသွန်းနိုင်ချေရှိ၊မရှိ စစ်ဆေးပေးပါ။ 
• မည်သည့်ဆေးဖျန်းဖျန်း ဖျန်းပြီးအနည်းဆုံး ၄နာရီခန့်မိုးမရွာသွန်းလိုပါတယ်။ 
• လက်ရှိ ကျရောက်မှုများလာတာတွေ့ရတဲ့ စပါးကျိုင်းနက်(ကျိုင်းမဲ)နဲ့ပတ်သတ်ပြီး ကာကွယ်နှိမ်နင်းနည်းများကိုလည်း အကြံပြုဆွေးနွေးပေးလိုက်ပါတယ်။ 
• လောက်ကောင်က အပင်အမြစ်ကိုစားပြီး ကျိုင်းကောင်အကြီးက အရွက်များကို ညဘက်တွင် ကိုက်ဖြတ်စားသောက်ပါတယ်။ စားနှုန်းလည်း အလွန်မြန်ပါတယ်။  
• ကာကွယ်နည်းကတော့ ကျိုင်းကောင်တွေ့ရင် စိုက်ခင်းကို ရေ အနည်းဆုံး တစ်မိုက် (၄.၅) လက်မမှ အထက် သို့ ၃ ရက်ခန့်ထားပေးပါ။  
• အသုံးပြုနိုင်သောဓာတုဆေးများ-Fipronil, Thiacloprid, Lambda cyhalothrin စတာတွေ သုံးလို့ရပါတယ်။ 

ငါး/ပုစွန်ကန်များအတွက်အကြံပြုချက်    

မိုးရာသီမှာ ရေကြီးရေလျှံတာတွေ ဖြစ်တတ်တာမို့ ငါး/ပုစွန်တောင်သူဦးကြီးများ အနေနဲ့ အောက်ပါအချက်လေးတွေ ဆောင်ရွက်ထားဖို့ တိုက်တွန်းလိုက်ရပါတယ် ခင်ဗျာ-    

- ငါးမွေးမြူရေးကန်တွေရဲ့ ကန်ပေါင်တွေခိုင်ခံ့ဖို့အတွက် ကန်ပေါင်ပါးတဲ့ နိမ့်တဲ့နေရာတွေမှာ သဲအိတ်တွေဖို့ပြီး ကန်ပေါင်ခိုင်ခံ့အောင် ပြုလုပ်ထားရန်၊    

- ရေကြီးရေလျှံလာတဲ့အခါ ငါးတွေ လွတ်ထွက်မှုမရှိစေဖို့အတွက် ဇာပြာ ပိုက်တွေနဲ့ကာရံထားရန်၊    

- ရေစီးကြောင်းနဲ့နီးတဲ့ငါးကန်တွေမှာ ရေတိုက်စားမှုကာကွယ်ဖို့အတွက် တုတ်ရိုက်ပြီး ဝါးထရံတွေနဲ့ကာရံကာ သဲအိတ်တွေဖို့ထားရန်၊    

- ဒါ့အပြင်လိုအပ်ပါက ငါးတွေရွှေ့ပြောင်းနိုင်ဖို့အတွက် ငါးဖမ်းပိုက်တွေ၊ စက်လှေတွေနဲ့ စက်ပစ္စည်းတွေကို ကြိုတင် ပြင်ဆင်ထားရန်၊   

ရေလုပ်ငန်းနှင့်ပတ်သတ်ပြီး ဆွေးနွေးတိုင်ပင်လိုပါက ထွက်တိုးကောစင်တာ 09977910000သို့ ဆက်သွယ်နိုင်ပါသည်။  

-------- 

မိုးလေဝသအဖွဲ့ဝင်ရန် - https://htwettoe.com/organization/12 

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို 

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်. 

သီးနှံပေါက်စျေးကြည့်ရှုနည်း_ https://htwettoe.com/post/50437