ရှမ်းပြည်နယ် ဇူလိုင်လ ၅ ရက် မှ ဇူလိုင်လ ၁၁ ရက်အထိ မိုးလေဝသအခြေအနေ

ဇူလိုင်လ ၅ ရက် မှ ၁၁ ရက်အထိ ၇ ရက်တာကာလအတွင်း၊ အိန္ဒိယနိုင်ငံမြောက်ပိုင်းမှ အားပျော့သောကုန်းတွင်းလေဖိအားနည်းရပ်ဝန်းဆက်လက်တည်ရှိနေနိုင်သောကြောင့် အနောက်တောင်မုတ်သုံလေအားဆက်လက်ကောင်းနေနိုင်ခြင်းမှအပ ပင်လယ်ပြင်တွင် ထူးခြားသောမိုးလေဝသအခြေအနေဖြစ်ပေါ်နိုင်ခြင်းမရှိပါ။ 

·          ရှမ်းပြည်နယ်တောင်ပိုင်းတွင် ၇ ရက်အတွင်းရွာသွန်းနိုင်သည့်မိုးရေချိန် ၃ လက်မနှင့်အထက်ရှိနိုင်ပြီး၊ ၂၄ နာရီအတွင်းမိုးရွာသွန်းခြင်း ၀.၁ လက်မခန့် - အနည်းငယ်သာရှိနိုင်ပါမယ်။ 

·          ရှမ်းပြည်နယ်မြောက်ပိုင်းတွင် ၇ ရက်အတွင်းရွာသွန်းသည့်မိုးရေချိန် ၆ လက်မနှင့်အထက်ရှိနိုင်ပြီး၊ ၂၄ နာရီအတွင်းမိုးရွာသွန်းခြင်း ၁.၅ လက်မ ခန့်ရှိနိုင်ပါမယ်။ (တာမိုးညဲ/နမ့်ဖက်ကာဒေသ) 

·          ရှမ်းပြည်နယ်အရှေ့ပိုင်းတွင် ၇ ရက်အတွင်းရွာသွန်းသည့်မိုးရေချိန် ၇ လက်မနှင့်အထက်ရှိနိုင်ပြီး၊ ၂၄ နာရီအတွင်း မိုးရွာသွန်းခြင်း ၀.၈ လက်မ မှ ၂.၂ လက်မခန့်ရှိနိုင်ပါမယ်။ (မိုင်းပေါက်/ဟိုတောင်း/မိုင်းယန်းဒေသ) 

ရှမ်းပြည်နယ်တောင်ပိုင်း ရွာငံမြို့နယ်အတွင်း အမြင့်ဆုံးလေတိုက်နှုန်း တစ်နာရီ မိုင် ၃၀ ခန့်အထိ ရှိနိုင်ပြီး၊ ရှမ်းပြည်နယ်မြောက်ပိုင်း လားရှိုးမြို့နယ်နှင့် ရှမ်းပြည်နယ်အရှေ့ပိုင်း တာချီလိတ်မြို့နယ်အတွင်း အမြင့်ဆုံးလေတိုက်နှုန်းတစ်နာရီ ၂၅ မိုင်အထိရှိနိုင်ပါသည်။ 

ယခုရက်သတ္တပါတ်တစ်ပါတ်အတွင်း ရှမ်းပြည်နယ်တစ်ခုလုံး၏ လေထုစိုထိုင်းဆ ၉၅% မှ ၁၀၀% ရှိနေမှာဖြစ်ပြီး၊ အမြင့်ဆုံးနေ့အပူချိန် ၂၅°C နှင့် အနိမ့်ဆုံးညအပူချိန် ၂၀°C ခန့် ရှိနိုင်ပါမယ်။ 

ရှမ်းပြည်နယ်၏ ပျမ်းမျှလေထုညစ်ညမ်းမှုအညွှန်းကိန်း(AQI) အမြင့်ဆုံး “၂၀” ရှိပြီး အန္တရာယ်မရှိပါ။ 

Win Naing 

Administration Team, 

MMWEATHER, 

https://www.mmweather.org/home 

ရှမ်းပြည်နယ်အတွင်း အာလူးစိုက်ပျိုးတောင်သူများအတွက် စိုက်ပျိုးရေးအကြံပေးချက် 

ရှမ်းပြည်နယ်အတွင်း အာလူးစိုက်ပျိုးရာတွင် နှောင်းပင်နာကျရောဂါမှာ အာလူးပင်၏ အစိတ် အပိုင်းများအားလုံးနှင့် မြေအောက်အာလူးသီးအထိပါ ရောဂါလက္ခဏာတွေ့ရသည်။ အောက်ရွက်၏ အနား(သို့မဟုတ်) အဖျားတွင် ရေနာကွက်စတင်ဖြစ်ပေါပြီး ရက်အနည်းငယ်အတွင်း အညိုမည်း (သို့မဟုတ်) ခရမ်းမည်းရောင်အကွက်များ ဖြစ်ပေါ်လာတတ်ပါသည်။ နှောင်းပင်နာကျရောဂါ မြင်ရမှ ဆေးစဖျန်းလျှင် ကာကွယ်နိုင်ရန် မလွယ်ကူပါ။ 

ကာကွယ်နိုင်ရန်လိုက်နာရမည့် အချက်များမှာ - 

• ခံနိုင်ရည်ရှိမျိုးများ ပြောင်းလဲစိုက်ပျိုးပါ။ 
• မျိုးရင်းဝင်မတူညီသော သီးနှံဖြင့် သီးလှည့်စိုက်ပျိုးပေးပါ။ 
• မှိုသတ်ဆေးကို အာလူးစိုက်ပြီး မိုးဖြိုင်ဖြိုင်စရွာသည့်ကာလတွင် (#မိုးမရွာသည့် မနက်ပိုင်း၌ အချိန်လု၍) စတင်ပက်ဖျန်းပါ။ 
• မိုးအုံ့မှိုင်းခြင်း၊ မိုးဆက်တိုက်ရွာခြင်းများ ရက်ဆက်ဆိုသလို ဖြစ်ပေါ်နေပါက မိုး အခြေအနေကို ကြည့်၍ ၅ ရက်ခြားမှ ၁၀ရက်ခြားထပ်မံဖျန်းပါ။ 
• ဓာတုဆေးအနေနဲ့ အသုံးပြုရမည့်မှိုသတ်ဆေးများမှာ ပင်လုံးပြန့်အာနိသင်ရှိသည့် Metalaxyl၊Cymoxanil၊ Propamocarb hydrochloride တို့အားသုံးနိုင်ပါသည်။ 

ငါးသားပေါက်ကန်ပြုစုခြင်း အကြံပြုချက် 

ငါးသားပေါက်ပြုစုရာတွင် ကန်ပြင်ဆင်ခြင်းလုပ်ငန်းစတင်ချိန်တွင် တစ်ဧက ထုံး ၂၄၈ပိဿာ ပက်သင့်ပါသည်။ 

ကန်အတွင်းသို့ ရေစသွင်းလျှင် သဲရေစစ်ကို အသုံပြုပြီး ထည့်သွင်းပါ။ 

ရေအနက်သည် ငါးမှုန် ဘဝ တွင် (၂)ပေသာ ထားရှိရပါမည်။ 

ရက် ၂၀ ကျော်ပါက ၆လက်မခန့်ထပ်မံဖြည့်သွင်းပေးပါ။ 

ကန်အတွင်း ငါးရိုင်းများနှင့် သားစားငါးများကင်းရှင်းစေရန်သည် အဓိကကျပါသည်။ ငါးသားပေါက်မွေးရာတွင် ငါးမျိုးစိတ် တစ်မျိုးတည်းသာ ထည့်သွင်းပါ၊ ရေနှော မွေးမြူခြင်းမျိုး မဖြစ်စေသင့်ပါ။ 

--------- 

မိုးလေဝသအဖွဲ့ဝင်ရန် - https://htwettoe.com/organization/12 

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို 

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်. 

သီးနှံပေါက်စျေးကြည့်ရှုနည်း_ https://htwettoe.com/post/50437