ရန်ကုန်တိုင်း စက်တင်ဘာလ ၈ ရက် မှ စက်တင်ဘာလ ၁၄ ရက်အထိ မိုးလေဝသအခြေအနေ

အရှေ့/အနောက်ပင်လယ်ပြင်များတွင် ယခု ၁ ပါတ်အတွင်းဖြစ်ပေါ်နိုင်သည့် ထူးခြားသောမိုးလေဝသအခြေအနေ 

ယခု ၁ ပါတ်အတွင်း - 

·          စက်တင်ဘာလ ၈ ရက် မြန်မာစံတော်ချိန်နေ့လည်ပိုင်းမှာ တောင်တရုတ်ပင်လယ်မှ မုန်တိုင်း TAPAH က တရုတ်ပြည်မ၊ Guangzhou ပြည်နယ်ကမ်းခြေကို ဖြတ်ကျော်ဝင်ရောက်နေပြီး အိန္ဒိယ-ပါကစ္စတန်နယ်စပ်မှ ကုန်းတွင်းမုန်တိုင်း(အမည်မရှိ)သည် အနောက်ဘက်သို့ဆက်လက်ရွေ့လျားပြီး ပါကစ္စတန်နိုင်ငံ၊ ကရာချိမြို့အနီးမှတဆင့် အာရေဗျပင်လယ်၊ ပင်လယ်ရေပြင်သို့ ဆင်းသက်ရွေ့လျားနိုင်ကြောင်း ကြိုတင်ခန့်မှန်းချက်များမှာတွေ့ရပါတယ်။ 

·          မုန်တိုင်း TAPAH သည် တိုင်ဖွန်းမုန်တိုင်းအဆင့်(လေတိုက်နှုန်း 64 knots အထက်)သို့မရောက်နိုင်တော့ပဲ “အားကောင်းသောအပူပိုင်းမုန်တိုင်း”အဆင့်ဖြင့်သာ ကမ်းခြေကိုဖြတ်ကျော်ဝင်ရောက်နိုင်မည်ဖြစ်ကြောင်း JTWC, JMA နှင့် HKO အစရှိသည့် မိုးလေဝသ/ရာသီဥတုနှင့် မုန်တိုင်းလေ့လာစောင့်ကြည့်ရေးဌာနများမှ ထုတ်ပြန်သည့်ကြေညာချက်များအရ သိရပါတယ်။ 

·          တောင်တရုတ်ပင်လယ်မှ မုန်တိုင်း TAPAH အကြွင်းအကျန်များကြောင့်လည်းကောင်း၊ အိန္ဒိယနိုင်ငံအနောက်မြောက်ပိုင်းမှ ကုန်းတွင်းမုန်တိုင်းအရှိန်ဖြင့် အားကောင်းလာမည့်အနောက်တောင်မုတ်သုံလေကြောင့်လည်းကောင်း၊ မြန်မာနိုင်ငံမှာ စက်တင်ဘာလ ၉ ရက် မှ ၁၁ ရက်အတွင်း နေရာအနှံ့အပြား မိုးရွာသွန်းနိုင်ကာ ပြည်နယ်တိုင်းဒေသအချို့တွင် နေရာကွက်၍ မိုးသည်းထန်နိုင်ပါတယ်။ 

·          အပူပိုင်းမုန်တိုင်း TS TAPAH ၏ မုန်တိုင်းအကြွင်းအကျန်များသက်ရောက်မှုကြောင့် စက်တင်ဘာလ ၉ ရက် မှ ၁၁ ရက်အတွင်း မိုးအသင့်အတင့်မှ မိုးများနိုင်သည့်ဒေသများ - 

o    မြန်မာနိုင်ငံ မြောက်/အရှေ့မြောက်ဒေသ၊ တရုတ် ယူနန်ပြည်နယ်၊ လာအိုနိုင်ငံတို့နှင့်နယ်နိမိတ်ထိစပ်ရာ ကချင်ပြည်နယ်နှင့် ရှမ်းပြည်နယ်မြောက်ပိုင်း တို့တွင် ၃ ရက်အတွင်း မိုးရေချိန် ၃ လက်မ မှ ၅ လက်မအထိ၊ 

o    ရှမ်းပြည်နယ်အရှေ့ပိုင်းနှင့် တောင်ပိုင်း၊ စစ်ကိုင်းတိုင်းအထက်ပိုင်း၊ ရခိုင်ရိုးမတောင်တန်း၊ ချင်းပြည်နယ်နှင့် ဧရာဝတီတိုင်းတို့တွင် ၃ ရက်အတွင်း မိုးရေချိန် ၂.၃ လက်မ မှ ၃.၅ လက်အထိ၊ 

o    အပူပိုင်းမိုးနည်းရေရှားဒေသများဖြစ်သည့် စစ်ကိုင်းတိုင်းတောင်ပိုင်း၊ မန္တလေးတိုင်း၊ မကွေးတိုင်းတို့တွင် ၃ ရက်အတွင်း မိုးရေချိန် ၁.၆ လက်မ မှ ၂.၇၅ လက်မအထိ ရွာသွန်းရရှိနိုင်သည်။ 

ရန်ကုန်တိုင်းအတွင်း နေ့စဉ်ပျမ်းမျှ နှင့် ၇ ရက်အတွင်းရွာသွန်းရရှိနိုင်သည့် မိုးရေချိန် 

·          တောင်ပိုင်းခရိုင်/မြို့နယ်များတွင် စက်တင်ဘာလ ၈/၉/၁၀ / ၁၂/၁၄ ရက်များတွင် နေသာချိန်နည်းပြီး မုတ်သုံမိုးအနည်းငယ်မှအသင့်အတင့် ထစ်ချုန်း၍ရွာသွန်းနိုင်ပါမယ်၊ အဲ့ဒီရက်တွေမှာ နေ့စဉ်ပျမ်းမျှမိုးရေချိန် ၀.၅ လက်မခန့် ရရှိနိုင်ပါတယ်။ 

·          အနောက်ပိုင်းခရိုင်/မြို့နယ်များတွင် စက်တင်ဘာလ ၈/၉/၁၀/၁၁ ရက်နှင့် ၁၄ ရက်တို့မှာ နေသာချိန်နည်းပြီး မိုးအနည်းငယ်မှအသင့်အတင့် ထစ်ချုန်း၍ရွာသွန်းနိုင်ပါမယ်၊ စက်တင်ဘာ ၁၁ ရက်နေ့မှာ မိုးအများဆုံး(၂၄ နာရီ မိုးရေချိန် ၀.၈ လက်မခန့်)ရွာသွန်းရရှိနိုင်ပါတယ်။ 

·          မြောက်ပိုင်းခရိုင်နှင့်မြို့နယ်များတွင် ၈/၁၀/၁၁/၁၂ နှင့် ၁၄ ရက်များမှာ နေသာချိန်နည်းပြီး မိုးအနည်းငယ်မှအသင့်အတင့် ထစ်ချုန်း၍ရွာနိုင်ပါမယ်၊ ၁၃ ရက်နေ့မှာ နေသာချိန်များပြီး မိုးရွာနိုင်မည့်အခြေအနေမရှိသလောက်ဖြစ်ပါမယ်။ ၁၁ ရက်နေ့မှာ မိုးရေချိန်အများဆုံး(၂၄ နာရီအတွင်း ၀.၆ လက်မခန့်)ရွာသွန်းရရှိနိုင်ပါမယ်။ 

·         အရှေ့ပိုင်းခရိုင်/မြို့နယ်များတွင် စက်တင်ဘာ ၁၃ ရက်နေ့တွင် မိုးရွာသွန်းနိုင်မှာမဟုတ်ပဲ၊ ၈/၉/၁၀/၁၁/၁၂/၁၄ ရက်တွေမှာ မိုးအနည်းငယ်မှအသင့်အတင့် ထစ်ချုန်း၍ရွာနိုင်ပါတယ်၊ စက်တင်ဘာ ၈ ရက်နဲ့ ၁၀ ရက်နေ့တွေမှာ မိုးအများဆုံး(၂၄ နာရီ မိုးရေချိန် ၀.၆ လက်မ မှ ၀.၇ လက်မအထိ)ရွာသွန်းရရှိနိုင်ပါမယ်။ 

·         ရန်ကုန်တိုင်းအတွင်းက ခရိုင်/မြို့နယ်များအားလုံးမှာ ၇ ရက်အတွင်းရွာသွန်းရရှိနိုင်တဲ့ မိုးရေချိန် ၃ လက်မ ဝန်းကျင်ခန့် ရှိနိုင်ပါတယ်။ 

မိုးရွာသွန်းရရှိနိုင်သည့်အခြေအနေအကျဉ်းချုပ် 

·          ရန်ကုန်မြောက်ပိုင်းခရိုင် - သောကြာ-စနေနေ့တွင် မိုးအဆက်မပြတ် ထစ်ချုန်းရွာနိုင်သည်။ 

·          ရန်ကုန်တောင်ပိုင်းခရိုင် - မိုးအသင့်အတင့်ရွာပြီး၊ ယခုသီတင်းပတ်အလယ်တွင် ပိုမိုသည်းထန်နိုင်မည်။ 

·          ရန်ကုန်အရှေ့ပိုင်းခရိုင် - အထူးသဖြင့် နေ့လည်ပိုင်းနှင့် ညနေပိုင်းများတွင် မိုးအနည်းငယ်(မိုးဖွဲဖွဲ)ရွာနိုင်သည်။ 

·          ရန်ကုန်အနောက်ပိုင်းခရိုင် - မိုးပြတ်တောင်းရွာပြီး၊ သီတင်းပါတ်အကုန်ရက်များ(စနေ+တနင်္ဂနွေရက်များ)တွင် မိုးသည်းထန်နိုင်သည်။ 

အပူချိန်၊ လေတိုက်နှုန်း၊ လေထုစိုထိုင်းဆ၊ ပင်လယ်ပြင်အခြေအနေနှင့် လေထုညစ်ညမ်းမှုအခြေအနေများ 

·          ရန်ကုန်မြို့ရဲ့ အမြင့်ဆုံးနေ့အပူချိန် ၃၂°C နဲ့ အနိမ့်ဆုံးညအပူချိန် ၂၅°C ရှိနိုင်ပြီး၊ စက်တင်ဘာ ၁၄ ရက်နေ့မှာ ခံစားရတဲ့အပူချိန်(Feels like temperature) ၃၉°C အထိရှိနိုင်ပါမယ်။ 

·          ယခု ၁ ပတ်အတွင်း တောင်/အနောက်တောင်နှင့်အရှေ့တောင်အရပ်မှ လေတိုက်နှုန်း တနာရီ ၁၅ မိုင်မှ မိုင် ၂၀ ခန့်အထိ ရှိနိုင်ပြီး၊ ရန်ကုန်မြစ်ဝ၊ ကမ်းနီးပင်လယ်ပြင်မှာ လှိုင်းအမြင့်ဆုံး ၃ ပေ ခန့်ရှိနိုင်ပါတယ်။ 

·         ရန်ကုန်တိုင်းအတွင်း နေ့လည်/နေ့ခင်းအချိန်များမှာ လေထုစိုထိုင်းဆ ၇၀% မှ ၈၀% ခန့်ရှိနိုင်ပြီး၊ နံနက်အစောပိုင်နှင့် ညပိုင်းအချိန်တွေမှာ လေထုစိုထိုင်းဆ ၁၀၀% ရှိနိုင်ပါတယ်။ 

ယခု ၁ ပါတ်အတွင်း ရန်ကုန်တိုင်း၏ လေထုညစ်ညမ်းမှုအညွှန်းကိန်း(AQI value) “35” ရှိနိုင်ပြီး အန္တရာယ်ရှိနိုင်မည့်အခြေအနေမဟုတ်ပါ။ 

Win Naing 

Administration Team, 

MMWEATHER, 

https://www.mmweather.org/home 

https://disasterinfo.mmweather.org/ 

ရန်ကုန်တိုင်းဒေသကြီးအတွင်းရှိ စပါးစိုက်တောင်သူများထံသို့ ..... 

နှံစုပ်ဂျပိုးကာကွယ်နှိမ်နင်းနည်း အကြံပြုချက် 

• နှံစုပ်ဂျပိုးကာကွယ်လိုသော တောင်သူများအနေဖြင့် စပါးဖုံးတုံးလုံးတုံးအဆင့်တွင် ပုလဲသီးသန့်မြေဩဇာထည့်သွင်းခြင်းကို မပြုလုပ်သင့်ပါ။ 
• စပါးစိုက်ခင်း ကန်သင်းပတ်ဝန်းကျင်ရှိ ပေါင်းမြက်များကိုလည်းရှင်းပေးပါ။ 
• နှံစုပ်ဂျပိုးအတွက် ကြိုတင်ကာကွယ်လိုပါက အလံရွက်ထွက်ချိန် (သို့မဟုတ်) အပိုပင်ပွားသတ်ချိန်တွင် Profenofos, Acetamiprid, Indoxacarb အဆင်ပြေရာကို မနက်ခင်းပိုင်းတွင် ရွေးချယ်ဖျန်းနိုင်ပါတယ်။  

ယင်မဲသားလောင်းများကို အသုံးပြုပြီး ငါးစာပြုလုပ်ခြင်း 

ယခုအချိန်တွင် ဖွဲနုဈေးသည်မြင့်တက်လာသလို ပဲဖတ် နှင့် ငါးပေါင်းမှုန့်သည် ပိုမိုဈေးကြီးနေကြပါ သည်။ ပဲဖတ် နှင် ငါးပေါင်းမှုန့်အစား ယင်မဲသားလောင်းများကို အစာထိုးပြီး စပ်စာအဖြစ်ဆောင်ရွက်ပါက ၊ စပ်စာတွင် ပရိုတိန်း ၂၀-၂၅ ရာခိုင်နှုန်း ရရှိလာပါမည်။ ယင်မဲ မွေးမြူရေး လုပ်ငန်းသည် စွန့်ပစ်စာများကျွေးပြီး မွေးမြူခြင်းကြောင့် ကုန်ကျစရိတ်သက်သာပါမည်။ 

ယင်မဲသားလောင်းများသည် ပရိုတိန်း ၄၀ မှ ၅၀ ရာခိုင်နှုန်းပါဝင်ကြောင်းနှင့်ယင်မဲအခြောက်တွင် ပရိုတိန်း ၅၀ မှ ၆၀ ရာခိုင်နှုန်း ပါဝင်ကြောင်းတွေ့ရှိရပါသည်။  

ပရိုတိန်း (၂၀) ရာခိုင်နှုန်းပြည့်ရန် ဖွဲနု ၆၆.၆၆ ဆ နှင့် ယင်မဲ ၃၃.၃၃ ရောစပ် ရပါမည်။ စပ်စာ တပိဿာအတွက် ဖွဲနု (၆၆.၆၆)ကျပ်သားနှင့် ယင်မဲသားလောင်း (၃၃.၃၃)ကျပ်သားရောစပ်ပေးပါ။ 

-----

မိုးလေဝသအဖွဲ့ဝင်ရန် - https://htwettoe.com/organization/12 

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို 

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်. 

သီးနှံပေါက်စျေးကြည့်ရှုနည်း_ https://htwettoe.com/post/50437