အိမ်နောက်ဖေး စျေးဆိုင်တည်ပါ
အိမ်ခြံဝင်းအတွင်းသီးနှံများတစ်ပိုင်တစ်နိုင်စိုက်ပျိုးခြင်းနှင့် ဥယျာဉ်ခြံများအား ဝါသနာအရ ပြုစုစောင့်ရှောက်ခြင်းသည် လူသားများ၏ကျန်းမာရေးနှင့် စိတ်ပျော်ရွှင် မှုအတွက် များစွာအထောက်အပံ့ပြုကြောင်း သိရှိလာကြပြီဖြစ်သည်။ ထို့ပြင် အိမ်နောက်ဖေးစျေးဆိုင်တည်ဆိုသည့်ဆိုရိုးအတိုင်း ကိုယ်တိုင်စိုက်ပျိုးခြင်းဖြင့် မိသားစု ၏ အစားအစာများအတွက် ကုန်ကျစရိတ်ကို များစွာလျှော့ချနိုင်ပါသည်။ ကိုယ်တိုင် စိုက်ပျိုးခြင်းဖြင့် လတ်ဆတ်သည့်သီးနှံများအား ဘေးကင်းစွာစားသုံးရခြင်း ဆိုသည့် ကောင်းချီးပေးမှုကိုလည်း မိသားစုဝင်များအားလုံး ရရှိလာမည်ဖြစ်သည်။
လူသားများကျန်းမာရေးအတွက် အာဟာရများစွာကြွယ်ဝသည့် အစားအစာမျိုးစုံ နေ့စဉ်စားသုံးပေးရန်လိုအပ်သည်။ သို့မှသာ ခန္တာကိုယ်ဖွံ့ဖြိုးကြံ့ခိုင်ခြင်း၊ ရောဂါကပ်ဆိုး များမှ ကျော်လွှားနိုင်ခြင်း၊ မိသားစုနှင့်အများကောင်းကျိုးအတွက် စွမ်းဆောင်နိုင်ခြင်း စသည့်အကျိုးကျေးဇူးများ ရရှိမည်ဖြစ်သည်။ ထို့ကြောင့်အဆိုပါအစားအစာများအား လိုအပ်သည့်အချိန်တွင် အလွယ်တကူလက်လှမ်းမီစွာရရှိနိုင်ရန်လိုအပ်သကဲ့သို့၊ ကုန်ကျ စရိတ် သက်သာခြင်းနှင့် အစားအစာများ၌ ဓါတုဆေးအကြွင်းအကျန်များနှင့် အီကို လိုင်းကဲ့သို့ ရောဂါဖြစ်စေသည့် အဏုဇီဝများဖြင့် ညစ်ညမ်းနေခြင်းကဲ့သို့သော ဘေးအန္တရာယ်များ ကင်းရှင်းနေစေရန်လည်း အရေးကြီးပါသည်။
ထို့ကြောင့် ဟင်းသီးဟင်းရွက်ကဲ့သို့သောသီးနှံများအား စိုက်ပျိုးထုတ်လုပ်ရာတွင် ဂရုတစိုက်မဆောင်ရွက်ပါက စတင်စိုက်ပျိုးချိန်မှ ခူးဆွတ်ချိန်၊ သိုလှောင်ချိန်၊ ထုတ်ပိုး ချိန်၊ ပို့ဆောင်ချိန်နှင့် စားသုံးသူများလက်ဝယ်ရောက်ရှိသည့်အချိန်အထိ လူသားတို့ ၏ကျန်းမာရေးကိုထိခိုက်နိုင်သော ညစ်ညမ်းမှုနှင့် အဆိပ်သင့်မှုများ ဖြစ်ပေါ်လေ့ရှိပါ သည်။ ထို့ပြင်သယ်ယူပို့ဆောင်စဉ် စနစ်မကျခြင်း၊ ခရီးဝေးကွာလွန်းခြင်းနှင့် ရာသီ ဥတုအခြေအနေတို့ကြောင့် လတ်ဆတ်မှုမရှိတော့ဘဲ အာဟာရဓါတ်များစွာ ဆုံးရှုံးရလေ့ ရှိပါသည်။ ထို့ကြောင့် မိမိတို့၌အိမ်ခြံဝင်းအတွင်း မြေလွတ်များရှိပါက သီးနှံများအား တပိုင်တနိုင်စိုက်ပျိုးခြင်းအားဖြင့် အောက်ပါအကျိုးကျေးဇူးများကို ခံစားရရှိနိုင်မည် ဖြစ်ပါသည်။
က။ စိတ်ချမ်းမြေ့ကြည်နူးခြင်း၊ ပီတိဖြစ်ခြင်း၊ စိတ်ကျေနပ်မှုရှိခြင်းစသည်ဖြင့် စိတ်ပိုင်း ဆိုင်ရာ တိုးတက်မှုဖြစ်စေခြင်း၊ စိတ်ဖိအားများခြင်းနှင့် အထီးကျန်မှုကို ဖြေဖျောက် ပေးနိုင်ခြင်း၊
ခ။ မီးဖိုချောင်ကုန်ကျစရိတ်လျော့နည်းစေခြင်း၊
ဂ။ မိသားစုဝင်ငွေရရှိစေခြင်း၊
ဃ။ လတ်လတ်ဆတ်ဆတ်ခူးဆွတ်စားသုံးရ၍ ဘေးကင်း၍ အာဟာရများ ပိုမိုရရှိခြင်း၊
င။ မိသားစုအားလပ်ချိန်တွင် ဝိုင်းဝန်းလုပ်ဆောင်ခြင်းဖြင့် ရင်းနှီးချစ်ခင်မှု၊ နွေးထွေးမှု၊ ဆက်ဆံရေးတိုးတက်လာစေခြင်း၊
စ။ ပိုလျှံသည့် သီးနှံများကို အိမ်နီးချင်းများနှင့် ဝေမျှစားသုံးနိုင်ခြင်းဖြင့် ကောင်းမွန်သည့် အသိုက်အဝန်းတစ်ခုဖန်တီးနိုင်ခြင်း၊
ဆ။ မိမိစိုက်ပျိုးသည့်သီးနှံနှင့်ပက်သက်၍ ရပ်ရွာအတွင်း အတွေ့အကြုံများ ဖလှယ်နိုင် ခြင်းနှင့် လူမှုရေးဝင်ဆန့်လာခြင်း။
ယေဘူယျအားဖြင့် သီးနှံများစီးပွားဖြစ်စိုက်ပျိုးခြင်းနှင့် အိမ်ခြံဝင်းအတွင်း စိုက်ပျိုးခြင်းအား အောက်ပါအချက်များဖြင့် ခွဲခြားနိုင်သည်။
-စိုက်ခင်းသည်အိမ်အနီးတွင်ရှိရမည်။ စိုက်ခင်းသည် အိမ်နောက်ဖေးတွင်ရှိလျှင် အိမ်သာ၊ အမှိုက်ပုံ၊ နွားတင်းကုတ်စသည့် သီးနှံများအား ညစ်ညမ်းစေနိုင်သည့် နေရာများနှင့် ဝေးကွာရမည်။
-မြေဧရိယာအားဖြင့် တစ်ဧကထက် နည်းရမည်။
-သီးနှံတစ်ခုထက် ပို၍စိုက်ပျိုးရမည်။
-ရာသီအလိုက် သီးနှံပင်များ ဖြစ်ရမည်။
-မိသားစုလုပ်အားဖြင့် ဆောင်ရွက်လေ့ရှိရမည်။
-စက်ကိရိယာများသုံးရန်မလိုဘဲ မိသားစုဝင်များ၏ ခွန်အားဖြင့်သာ ဆောင်ရွက်ရမည်။ ပေါက်တူး၊ တူရွင်း၊ ထွန်ခြစ်တို့ကိုသာ သုံးလေ့ရှိရမည်။
-အိမ်အတွက်သုံးသည့် ရေကိုသာ စိုက်ခင်းတွင်အသုံးပြုသည်။
အိမ်ခြံဝင်းအတွင်း သီးနှံများစိုက်ပျိုးရာတွင် ယေဘူယျလိုက်နာသင့်သည့် အခြား အချက်များမှာ အောက်ပါအတိုင်းဖြစ်ပါသည်။
-စိုက်ပျိုးမြေသည် ရေကောင်းစွာ ထုတ်နိုင်၊ သွင်းနိုင်သောမြေဖြစ်သင့်သည်။
-မိသားစုဝင်များဖြတ်သန်းသွားလာသည့် မာကျောသည့်လမ်းမြေ၊ ရေဝပ်နေသည့်မြေ၊ အဆိပ်သင့်စေနိုင်သည့်မြေများမဖြစ်စေရပါ။
-သဲနုန်းမြေသည် ရေထုတ်ရလွယ်ကူပြီး အလွယ်တကူလုပ်ကိုင်နိုင်သဖြင့် အကောင်းဆုံး ဖြစ်သည်။
-သီးနှံပင်ကြီးထွားမှုကောင်းရန်နှင့် အရည်အသွေးကောင်းထွက်ကုန်ရရှိစေရန် ရေသွင်း/ ဖျန်းပေးရမည်။ အဓိကရေအရင်းအမြစ်အဖြစ် မိုးရေ၊တွင်းရေနှင့် ကန်ရေတို့ကို အသုံးပြုနိုင်သည်။
-အပင်များအတွက် နေရောင်ခြည်လုံလောက်သည့် နေရာဖြစ်ရမည်။ နေရောင်ခြည် အပြည့်အဝ၊ တိုက်ရိုက် (သို့) တစ်စိတ်တစ်ပိုင်း ရရှိရမည်။ အလင်းရောင်၊ အာဟာရ ဓါတ်များနှင့် ရေများကို သီးနှံပင်များအစား လုယူစားသုံးနိုင်သည့် အပင်ကြီးများနှင့် အလွန်နီးကပ်သည့် နေရာကို မရွေးချယ်ရ။
-အိမ်ခြံဝင်းအတွင်း ဟင်းသီးဟင်းရွက်များစိုက်ပျိုးပါက လေကာပင်များ (သို့) ခြံစည်းရိုး အကာများ ပြုလုပ်ထားသင့်သည်။
အကယ်၍ အိမ်ခြံဝင်းအတွင်း စိုက်ပျိုးမြေဧရိယာအနည်းငယ်သာရှိပါက
ဟင်းသီး ဟင်းရွက်များကို ပျိုးအိတ်၊ ပျိုးခွက်များဖြင့် စိုက်ပျိုးခြင်း၊ အဆင့်လိုက်စိုက်ပျိုးခြင်း၊ အာဟာရရည်ဖြင့်စိုက်ပျိုးခြင်းစသည့်နည်းလမ်းများဖြင့်လည်းစိုက်ပျိုးနိုင်သည်။ စိုက်ပျိုး ရာတွင်လည်း တိုက်ရိုက်စိုက်ပျိုးခြင်း၊ ပျိုးထောင်စိုက်ပျိုးခြင်းစသည်ဖြင့် သီးနှံအလိုက် သင့်တော်သည့် နည်းစနစ်များဖြင့် စိုက်ပျိုးရမည်။
စိုက်ပျိုးမည့်ဟင်းသီးဟင်းရွက်များအား ရွေးချယ်ရာတွင် မိသားစုအတွက် အမှန် တကယ်လိုအပ်သော ကျန်းမာရေးနှင့်ညီညွှတ်ပြီး သန့်ရှင်းလတ်ဆတ်သော အာဟာရ ဓါတ်ပြည့်ဝသည့် အမျိုးအစားများကို ရွေးချယ်စိုက်ပျိုးသင့်သည်။ စိုက်ပျိုးသင့်သည့် ဟင်းသီးဟင်းရွက်အမျိုးအစားများမှာ-
(က) ရွက်စားဟင်းသီးဟင်းရွက်များ (ဟင်းနုနွယ်၊ ကန်စွန်း၊ ဆလတ်၊ မုန်ညင်း)
(ခ) အပွင့်စား ဟင်းသီးဟင်းရွက်များ (ပန်းမုန်လာ၊ ဘရိုကိုလီ)
(ဂ) အသီးစားဟင်းသီးဟင်းရွက်များ ( ခရမ်းချဉ်သီး၊ ခရမ်းသီး၊ ရုံးပတီသီး၊ ငရုတ်သီး)
(ဃ) အမြစ်/ဥစားသီးနှံများ (မုန်လာဥ၊ ခါကြက်ဥ)
(င) ပင်စည်စားဟင်းသီးဟင်းရွက်များ ( အာလူး၊ ဆလတ်ရိုး)
ဟင်းသီးဟင်းရွက်များကို စိုက်ပျိုးရာတွင် ပိုးမွှားရောဂါကျရောက်မှုကို ကာကွယ် ထိန်းချုပ်နိုင်ရန်အတွက် သီးနှံအလှည့်ကျစိုက်ပျိုးခြင်း၊ သီးနှံရောနှော စိုက်ပျိုးခြင်း၊ မိတ်ဖက်အပင်များနှင့် ယှဉ်တွဲစိုက်ပျိုးခြင်း၊ ထောင်ချောက်ပင် စိုက်ပျိုးခြင်း (ဥပမာ ဂေါ်ဖီထုပ်နှင့် မုန်ညင်း)၊ ဖျက်ပိုး ကျရောက်မှုမှကာကွယ်ရန် ပိုးမွှားရောဂါတွန်းလှန် သတ္တိရှိသည့် အပင်များ (ပင်စိမ်း၊ စပါးလင်၊ ချစ်တီးပန်းပင်)များကို စိုက်ခင်း ပတ်လည်တွင် စိုက်ပျိုးခြင်း စသည့်နည်းစနစ်များဖြင့် ဆောင်ရွက်ပါ။ထို့ပြင် အပင်ထွက် ပိုး/ရောဂါသတ်ဆေးများ(ဥပမာ တမာပိုးသတ်ဆေး) ကိုအသုံးပြု၍၊ ရောဂါဒဏ်ခံနိုင်ရည် ရှိသည့် သီးနှံမျိုးများကို စိုက်ပျိုးပါ။
သဘာဝမြေသြဇာများကို အိမ်ခြံဝင်း၊ စိုက်ခင်းနှင့် စားဖိုဆောင်စွန့်ပစ် ပစ္စည်းများ ဖြင့် ပြုလုပ်ပါ။ ငါးအမိုင်နိုအက်ဆစ်၊ အသီးအချဉ်ဖောက်ရည်၊ ဒေသတွင်း အကျိုးပြု အဏုဇီဝပိုးများဖြင့်ပြုလုပ်သည့်မြေဆွေးများကို ပြုလုပ်ထည့်သွင်းပါ၊ တီကောင်များ မွေးမြူ၍ တီကျစ်စာများမြေဆွေးများပြုလုပ်ထည့်သွင်းပါ။ သို့သော် တိရစ္ဆာန်စွန့်ပစ် ပစ္စည်းများနှင့် မြေဆွေးများကို ကောင်းစွာ ဆွေးမြည့်ချိန်မှသာ စိုက်ခင်းအတွင်း ထည့်သွင်းအသုံးပြုပါ။
အိမ်ခြံဝင်းအတွင်း စိုက်ပျိုးနိုင်သည့် မြေနေရာများတွင်လည်းကောင်း၊ မြေနေရာ အနည်းငယ်သာရှိသော နေရာများတွင်လည်း ပျိုးအိတ်၊ ပျိုးအိုးများဖြင့်စိုက်ပျိုးခြင်းကို ဖော်ပြပါနည်းလမ်းများအတိုင်း မိသားစုနှင့်အတူ စိုက်ပျိုးခြင်းဖြင့် ဘေးအန္တရာယ် ကင်းရှင်းပြီး အာဟာရပြည့်ဝသော ဟင်းသီးဟင်းရွက်များကို စားသုံးနိုင်မည် ဖြစ်ပါသည်။
ယခုအခါတွင် ကမ္ဘာ့နိုင်ငံအသီးသီးတွင်ဖြစ်ပွားနေသည့် Covid-19 ကဲ့သို့သော ကပ်ရောဂါများအား ကာကွယ်နိုင်ရေးအတွက် အသားငါးနှင့် ဟင်းသီးဟင်းရွက်များကို ခန္ဓာကိုယ်ခုခံအားကောင်းစေရန် မျှမျှတတ စားသုံးရန် လိုအပ်သည်။
ထို့ကြောင့် အိမ်ခြံဝင်းအတွင်း တစ်ပိုင်တစ်နိုင်ဟင်းသီးဟင်းရွက်စိုက်ပျိုးခြင်းဖြင့် ဘေးအန္တရာယ်ကင်းရှင်းပြီး အာဟာရပြည့်ဝသော ဟင်းသီးဟင်းရွက်များကို လိုအပ်သည့် အချိန်တွင် လိုအပ်သလောက် အလွယ်တကူလတ်လတ်ဆတ်ဆတ် ခူးယူစားသုံးနိုင်ခြင်း၊ အကြိမ်ကြမ် ခူးဆွတ်စားသောက်နိုင်ခြင်း၊ စားဖိုဆောင်ကုန်ကျစရိတ်လျှော့ချနိုင်ခြင်း၊ ကိုယ်လက်လှုပ်ရှားကျန်းမာရေးနှင့် ညီညွှတ်ခြင်း၊ မိမိ၏စိုက်ခင်းကို အစဉ်တစိုက် ကြည့်ရှု၍ စိတ်ကြည်လင် ရွှင်လန်း ပီတိခံစားရခြင်းတို့ကြောင့် အိမ်ခြံဝင်းအတွင်း တစ်ပိုင်တစ်နိုင် ဟင်းသီးဟင်းရွက်စိုက်ပျိုးခြင်းကို မိသားစုတိုင်း ဆောင်ရွက်ကြပါရန် တိုက်တွန်းလိုက်ရပါသည်။
ဒေါက်တာဝဏ္ဏထွန်း
-------------
သီးနှံပင် စိုက်ပျိုးနည်းများ၊ ပိုး/ရောဂါကာကွယ်နှိမ်နင်းနည်းများ၊ စိုက်ပျိုးရေးသတင်းနှင့် ဆောင်းပါးသစ်များ အတွက် ထွက်တိုးကို Like, Share နှင့် Download လုပ်ထားပါ - https://htwettoe.com/download
![likes](../heart.png)
![comments](../comments.png)
![views](../views.png)