လှေး (သရစ်ပိုး) အကြောင်းသိကောင်းစရာ

လှေးပိုး (သရစ်ပိုး) ဆိုသည်မှာ အလွန်သေးငယ်သည့် အင်းဆက်ဖြစ်ပြီး ကမ္ဘာတစ်ဝန်းရှိ အပင်ပေါင်းများစွာကို စားသောက်ဖျက်ဆီးလျက်ရှိပါသည်။ အကောင်၏ အရောင်သည် အဝါမှ အညို၊ အနက်ရောင်ထိ ရှိနိုင်သည်။

လှေးပိုးသည် စုပ်စားပိုးဖြစ်ပြီး အပင်ကို တိုက်ရိုက်ထိခိုက်နိုင်သလို၊ ဗိုင်းရပ်စ် သယ်ဆောင်လာခြင်းအားဖြင့်လည်း ထိခိုက်စေနိုင်ပါသည်။

လှေးပိုး၏ ဘဝစက်ဝန်းသည် မျိုးရိုးဗီဇ၊ တည်နေရာ၊ လက်ခံပင်နှင့် အခြားသော အကြောင်းအရာများပေါ် မူတည်၍ ပြောင်းလဲနိုင်သည်။ ပုံမှန်ဘဝစက်ဝန်းသည် ၂၂ ရက် ကြာနိုင်ပါသည်။

လှေးအရွယ်ရောက်အကောင်ကြီးများသည် အပင်အကြွင်းအကျန်များ ၊ ပင်စည်အခေါက်များကြားတွင် ဆောင်းခို၍ နေထိုင်ကြသည်။ လှေးပိုးများသည် တစ်နှစ်တွင် မျိုးဆက် ၁၅ ဆက်ထိ ပြန့်ပွားနိုင်ပြီး အရွယ်ရောက်အကောင်ကြီးတစ်ကောင်သည် ၁လလောက်ထိ ရှင်သန်နိုင်ပါသည်။

လှေးပိုးသည် စိုက်ခင်းပေါ်တွင် သေးသွယ်၍ ငွေရောင်တောက်တောက်အရောင်ရှိသည်။ မှန်ဘီလူးမပါဘဲ ကြည့်လျှင် ၎င်းတို့၏ ခန္ဓာကိုယ်ကို မြင်နိုင်ရန် ခဲယဉ်းသော်လည်း အသေးစိတ် အနားကပ်ကြည့်မှ ထင်ထင်ရှားရှားမြင်နိုင်သည်။ လှေးပိုးကို သေချာမြင်နိုင်ရန် အဖြူရောင်အခင်းပေါ်တွင် ခါချ၍လည်း ကြည့်နိုင်ပါသည်။

ဖျက်ဆီးမှု လက္ခဏာများ

လှေးကျရောက်ထားသော အပင်၏ အရွက်ထိပ်ပိုင်းများသည် အစိမ်းရင့်ရောင်ပြောင်းလာပြီး နောက်ပိုင်းတွင် အပေါ်ဘက် မျက်နှာပြင်၌ ငွေဖြူရောင် အရောင်ပြောင်းလဲမှုများ ဖြစ်ပေါ်လာနိုင်ပါသည်။

အရောင်ပျက်နေသော အရွက်မျက်နှာပြင်ပေါ်တွင် သေးငယ်သော အနက်ရောင် မစင်အစက်များကို မြင်နိုင်သည်။

ကြီးထွားဆဲ အပင်အညွှန့်ထိပ်ပိုင်းများ (သို့) ပန်းအဖူးများတွင် လှေးပိုးကျရောက်ပါက အပင်ကြီးထွားမှုများ ရပ်တန့်သွားနိုင်သည်။

ခေါင်ညွှန့်သေးခြင်း၊ အရွက်ကုပ်ခြင်းများ ဖြစ်နိုင်သည်။

ပန်း ပွင့်ရွက်များ အရောင်ပျက်သွားပြီး အဖြူရောင်အစက်အပြောက်များ ပေါ်လာနိုင်သည်။

ဆိုးရွားစွာ ကျရောက်ပါက ပန်းပွင့်အာမှုကိုပါ ထိခိုက်စေနိုင်သည်။

ကာကွယ်နှိမ်နင်းနည်း

ခံနိုင်ရည်ရှိသော မျိုးများကို စိုက်ပျိုးပါ။

အပင်၏ အနီးနားတွင် အပြာရောင်စေးကပ်သော ထောင်ချောက်များထား၍ လှေးပိုးကျရောက်မှု ရှိမရှိ စစ်ဆေးနိုင်သည်။

လှေးပိုးခိုအောင်းမှုများ မရှိစေရန် စိုက်ခင်းအတွင်းနှင့် အနီးတစ်ဝိုက်ရှိ ပေါင်းမြက်များ၊ ချုံပုတ်များ ရှင်းလင်းပေးပါ။

ပင်ကြွင်းပင်ကျန်များကို မီးရှို့ဖျက်ဆီးပေးပါ။

နိုက်ထရိုဂျင်မြေဩဇာ အလွန်အကျွံ သုံးစွဲခြင်းကို ရှောင်ပါ။

ပိုးသတ်ဆေးအသုံးပြုလိုပါက Fipronil, Acetamiprid, Thiamethoxam, Spinosad စသည်တို့ကို အသုံးပြုနိုင်ပါတယ်။

-------

ထွက်တိုး Telegram Channel ဝင်ရန် နှိပ်ပါ - https://t.me/htwettoe

စိုက်ပျိုးရေးနှင့် ပတ်သတ်သော အခက်အခဲများကို တိုင်ပင်ဆွေးနွေး အကြံဥာဏ်ရယူလိုပါက ထွက်တိုး တောင်သူအကြံပေးဖုန်း- ၀၉၉၇၇၉၁၀၀၀၀ ကို ဆက်သွယ်နိုင်ပါတယ် သို့မဟုတ် ထွက်တိုးကို follow, Like, Share နှင့် Download လုပ်ထားပြီး - https://bit.ly/htwettoev2 ထွက်တိုးမေးဖြေကဏ္ဍတွင်ဝင်ရောက်မေးမြန်းနိုင်ပါကြောင်းသတင်းကောင်းပါလိုက်ပါတယ်။