တနှစ်အတွင်း ကြက်ကောင်ရေ များများရအောင် လုပ်ဆောင်နည်းများ

(၁) ဝပ်စိတ်မရှိအောင် ပြုလုပ်နည်း

တခါတရံကြက်မများသည် ဥမရှိတော့သော်လည်း ဝပ်နေတတ်သဖြင့် ထိုသို့ကြက်မမျိုးသည် ဥအုရန် နောက်ကျမည် ဖြစ်သဖြင့် ဝပ်စိပ်မရှိစေရန် ပြုလုပ်ပေးရမည်။

·      ဝပ်ကျင်းထဲမှကြက်မကို အပြင်ထုတ်ပြီး လေဝင်လေထွက်ကောင်းသော၊ အရိပ်ရသောနေရာတွင် အစာနှင့်ရေထည့်ပြီး အုပ်ဆောင်းအုပ်ထားခြင်းဖြင့် ၇ ရက်ခန့်ကြာပါက ဝပ်စိတ်ပျောက်ပြီး ပြန်လည် ဥအုမည်ဖြစ်ပါသည်။

(၂) ဝပ်စိတ်ရှိအောင်ပြုလုပ်ခြင်း

·      အချို့သော ဥစားကြက်ထီးများနှင့်စပ်ထားသော ကပြားကြက်မများသည် တခါတရံ ဥ အုထားသော်လည်း မဝပ်ဘဲ ရှိတတ်သည်။

·      နေ့စဥ်အုနေသော ကြက်မသည် ဆက် မအုတော့ပါက ၁-၂ ရက်ကြာတွင် ဝပ်ရမည်ဖြစ်သည်။

·      မဝပ်ပါက ကြက်မကို ဥတင်းထဲထည့်ကာ မထွက်နိုင်သော အကွက်ရှိသည့်အုပ်ဆောင်းဖြင့် ပိတ်ထားပါ။ အစာကျွေးချိန်၊ ရေတိုက်ချိန် ခဏထုတ်ပြီး ပြန်အုပ်ထားပါ။ ၂-၃ ရက်ခန့် အုပ်ထားပြီး ဝပ်တာ သေချာပေါက်သိမှ အုပ်ဆောင်းကို ပြန်ဖွင့်ပေးပါ။ ကြက်မ ဆက်ဝပ်သွားမည်ဖြစ်သည်။

(၃) ကြက်ဥများပေါင်းပီး ဝပ်စေခြင်း

·       ဥအုရက် သိပ်မကွာသော ကြက်မ(၂)ကောင်တွင် အကြောင်းအမျိုးမျိုးကြောင့် ဝပ်ခါနီး တကောင်မှာ ၃-၄ လုံးသာ ရှိနေပါက ၂ ကောင်စလုံး၏ ဥများကို စုပေါင်းပေးပြီး တကောင်သာ ဝပ်စေခြင်းဖြင့် ကြက်ဥများ အလေလွင့်မရှိတော့ဘဲ အကောင်ရေများများ ပေါက်မည်ဖြစ်သည်။

·      မပေးဝပ်သော ကြက်မကို လေဝင်လေထွက်ကောင်းပြီး အရိပ်ရသော နေရာတွင် အုပ်ဆောင်းဖြင့်အုပ်ကာ အစာနှင့်ရေ ပေးထားခြင်းဖြင့် မကြာမှီ ပြန်လည် အုမည်ဖြစ်သည်။

·      သတိပြုရန်မှာ စုပေါင်းဝပ်သော ကြက်ဥ အလုံးရေသည် ၁၅-၂၀ လုံးအတွင်းသာ ရှိသင့်သည်။

(၄) ကြက်ကလေးများကို စုပေါင်းပြီး ကြက်မတကောင်ကိုသာ သားထိန်းစေခြင်း

·      ဝပ်ရက် (၁-၂) ရက်သာကွာသော ကြက်မ ၂ ကောင်အနက် စောဝပ်သော ကြက်မ မှပေါက်လာသော ကြက်ကလေးများသည် ၂-၃ ကောင်သာဖြစ်ပါက ထိုကြက်မသည် ကြက်ကလေးများကို ဆက်လက် သားထိန်းနေသည့်ကာလ တလျောက်လုံး ပြန် အုမည်မဟုတ်ပါ။

·      ထိုအခြေနေမျိုးတွင် ပထမကြက်မမှ ပေါက်လာသော ကြက်ကလေး၂-၃ကောင်ကို ဒုတိယကြက်မ ပေါက်ပေါက်ခြင်း ညအချိန်တွင် သွားရောက်ထည့်ပေးရမည်။

·      ပထမကြက်မကို အရိပ်ရသော နေရာတွင် အစာနှင့်ရေထည့်ပြီး အုပ်ဆောင်းဖြင့် လှောင်ထားပါက ၁ ပတ်ခန့် အကြာတွင် ပြန်လည် အုမည်ဖြစ်သည်။

·      သတိပြုရန်မှာ ပထမပေါက်သော ကြက်ကလေးကို ဒုတိယပေါက်သော ကြက်ကလေးများထဲ ရောထည့် ပေးရမည်။

·      ကြက်မ ၂ ကောင်ဝပ်ရက်သည် ၂ရက်ထက် ပိုမကွာရပါ။

ဆက်ရန်-

------------

မွေးမြူရေးနှင့် ကုသရေးပညာရှင် - ဒေါက်တာစောထွန်းထွန်း

🔗 ဉာဏ်စမ်းဖြေဆိုရန် လင့် - https://htwettoe.com/post/59297

🔗 ဆော့ဝဲလ်ဒေါင်းရန် – https://download.htwettoe.com

🔗 ထွက်တိုးဆော့ဝဲလ်ရှိ မွေးမြူရေးဂရု – https://htwettoe.com/organization/4

🔗 FB မွေးမြူရေးတောင်သူများဂရု – https://www.facebook.com/groups/4200052776702483