ကျွဲကောစိုက်ပျိုးနည်း
အင်္ဂလိပ်အမည် - POMELO
ရုက္ခဗေဒအမည် - Citrus maxima
မျိုးရင်းအမည် - Rutaceae
မြေအမျိုးအစား
မြန်မာနိင်ငံတွင်ကျွဲကောမျိုးများကိုမြန်မာမျိုးများ(ပန်းရောင်(၁)၊ပန်းရောင်(၂)၊ပန်းရောင်(၃)၊ကျောက်စိမ်း၊ခွံပါး၊အဖြူ)၊ရှမ်းမျိုးများ၊ထိုင်းမျိုးများ(ခွန်သောင်ဒီ၊ပျားရည်ဆမ်း၊ ပတ္တမြားနီ)စသည်ဖြင့်အများအပြားတွေ့နိုင်ပါသည်။
မူရင်းဒေသ
အမေရိက၊တောင်အာဖရိကနှင့် ဩစတြေးလျ။
ရာသီဥတု
နေ့အချိန်တွင်ပူနွေးပြီးညအချိန်တွင်အေးမြခြင်းသည်အကောင်းဆုံးဖြစ်သည်။သင့်တော်သောအပူချိန်မှာ(၂၀°C‒၃၀°C)ဖြစ်သည်။အပူချိန်နိမ့်လွန်းပါကအသီးမှည့်ရန်အချိန်ကြာခြင်း၊အသီးအရည်မရွှမ်းခြင်း၊အသီးအရွယ်အစားငယ်ခြင်း၊အရောင်မလှခြင်းများဖြစ်တတ်သည်။အထူးသဖြင့်နံနက်ပိုင်းတွင်စိုထိုင်းဆမြင့်ပါကအသီးအရွယ်အစားကြီးခြင်း၊အခွံပါးပြီးအရည်ရွှမ်းစေပါသည်။အသင့်တော်ဆုံးမိုးရေချိန်မှာ(၁၅၀‒၂၀၀)စင်တီမီတာဖြစ်သည်။ကျွဲကောသည်အမြစ်ဖွဲ့စည်းပုံတိမ်သဖြင့်မိုးများပါကအမြစ်ပုပ်စေနိုင် သည်။ရေများလွန်းပါကအသီးအရည်အသွေးကိုထိခိုက်စေနိုင်သည်။ကျွဲကောကိုသစ်ဆွေးဓာတ်များပါသောနှုံးမြေများတွင်စိုက်ပျိုးသင့်ပါသည်။မြေစေးပါကရေနှုတ်မြောင်းများသေချာပြုလုပ်ထားရမည်။မြေအောက်ရေမျက်နှာပြင်လေးပေထက်ပိုမမြင့်သင့်ပါ။ကျွဲကောစိုက်ပျိုးမည့်မြေအားထယ်ထိုး၊ထွန်မွှေခြင်းကိုသေချာစွာပြုလုပ်ရမည်။ကျွဲ ကောသည်အမြစ်ဖွဲ့စည်းမှုတိမ်သောသီးနှံဖြစ်ခြင်းကြောင့်အပင်စိုက်ပြီးနောက်စိုက်ခင်းအတွင်းထယ်ထိုးခြင်းကိုဖြစ်နိုင်သမျှရှေုာင်ကျဉ်ရမည်။မြေချဉ်ငံဓာတ်Ph(၅.၅‒၆) သည်အသင့်တော်ဆုံးဖြစ်သည်။
စိုက်ပျိုးနည်းစနစ်
ကျွဲကောပင်အားမိမိစိုက်ပျိုးလိုသောမျိုး၊ရေမြေ၊ရာသီဥတုအပေါ်မူတည်၍စိုက်ကျင်းအကွာအဝေးကို(၂၅'x၂၅')၊(၂၀'x၂၀')၊(၁၅'x၂၀')စသည်ဖြင့်ထားရှိနိူင်ပါသည်။စိုက်ကျင်းအားကျွဲကောမစိုက်ပျိုးမီတစ်လကြို တင်၍(၂)ပေပတ်လည်တစ်ပေခွဲအနက်တူးရမည်။စိုက်ကျင်းအတွင်းသို့နွားချေးတစ်တင်း၊ကျောက်မှုန့်(၁)ကီလိုဂရမ်အားအပေါ်ယံမြေသားဖြင့်ရော၍စိုက်ကျင်းအတွင်းသို့ထည့်ပြီးမြေနှပ်ပါ။
စိုက်ပျိုးခြင်း
မိုးဦးကျဇွန်၊ဇူလိုင်လများတွင်ကြိုတင်၍မြေနှပ်ထားသောစိုက်ကျင်းအတွင်းသို့မြေအောင်းပိုးသတ်ဆေးထည့်ပြီးစနစ်တကျစိုက်ပျိုးပါ။အပင်ခြေပတ်လည်အမြစ်လေဟာမှုမရှိှစေရန်မြေသားအားသေချာစွာဖိသိပ်ပါ။
အပင်ပြုစုခြင်း
ပေါင်းရှင်းခြင်းကိုတစ်နှစ်(၃)ကြိမ်မဖြစ်မနေဆောင်ရွက်ရမည်။စိုက်ခင်းအတွင်းထယ်ထိုးခြင်းကိုရှောင်ကျဉ်ပြီးမြက်ဖြတ်စက်ဖြင့်ပေါင်းရှင်းခြင်း၊ပေါင်းသတ်ဆေးဖြင့်ပေါင်းနှိမ်နင်းခြင်းကို ဆောင်ရွက်နိုင်သည်။ ရေဝပ်ကျင်းဖော်ခြင်းကို ဇန်နဝါရီလတွင် ပြုလုပ်ပေးပါ။ ရေသွင်းခြင်းအားဒီဇင်ဘာလမှစတင်ပြီးမေလကုန်အထိ တစ်ပတ်တစ်ကြိမ်ဆောင်ရွက်ပါ။ပန်းပွင့်ချိန်သည်ရေအလိုအပ်ဆုံးအချိန်ဖြစ်သည့်အတွက် ရေသွင်းခြင်းကိုဂရုတစိုက်ဆောင်ရွက်ရမည်။ ကိုင်းရှင်းခြင်းကိုအသီးခူးပြီးချိန် ဒီဇင်ဘာလတွင်ဆောင်ရွက်ရပါမည်။ကျွဲကောပင်သည်(Heavy Pruning)ပြုလုပ်ပေးရန်မလိုအပ်သော်လည်းကိုင်းခြောက်များ၊အဖျားပိုင်းမှအပေါ်သို့ထောင်တက်နေသောကိုင်းများနှင့်အပင်အတွင်းပိုင်းမှထွက်လာသောရေတက်(Water Shoot)များကိုရှင်းလင်းပြီးနေရောင်ခြည်အပြည့်အဝရရှိရန်နှင့်လေဝင်လေထွက်ကောင်းစေရန်ဆောင်ရွက်ရပါမည်။ အကိုင်းများရှင်းလင်းပြီးနောက် ကိုင်းဖြတ်ရာများနှင့်ပင်စည်အား မြေပြင်မှ(၅)ပေအထိဘော်ဒိုဆေးရည်(၅꞉၅꞉၅၀)အချိုးဖြင့်ဖျော်၍သုတ်လိမ်းပါ။
မြေဩဇာကျွေးခြင်း
အရွယ်ရောက်ကျွဲကော(၄‒၅)နှစ်သားတစ်ပင်အားနွားချေး(၂)တင်းနှင့်(၁၅꞉၁၅꞉၁၅)ကွန်ပေါင်းမြေဩဇာ(၂)ကီလိုဂရမ်အားအသီးခူးပြီးနောက်ပိုင်းပင်ခြေပတ်လည်တွင်ပတ်မြောင်းတူး၍ထည့်သွင်းပါ။အသီးများသံပုရာသီးအရွယ်တွင်(၁၅꞉၁၅꞉၁၅)ကွန်ပေါင်းမြေဩဇာ(၂)ကီလိုဂရမ်အားထပ်မံထည့်သွင်းပါ ။အသီးခူးရန်တစ်လအလိုတွင်ပိုတက်ဓာတ်မြေဩဇာ(၁)ကီလိုဂရမ်အားထည့်သွင်းပါ။အဖူးထွက်ချိန်၊ပန်းပွင့်ချိန်နှင့်သီးကင်းနုချိန်တို့တွင်အနည်းလိုအဟာရဓာတ်ပါသောဆေးများပက်ဖျန်းပေးပါ။
ပိုးမွှားရောဂါကာကွယ်နှိမ်နှင်းခြင်း
သီးထိုးယင်၊ပိုးစေးနှဲ၊လှေးပိုး၊ရွက်ထွင်းပိုးနှင့်အကြေးပိုးများသည်ကျွဲကောတွင်အများဆုံး ကျရောက်သဖြင့်ပင်လုံးပြန့်ဆေးတစ်မျိုးမျိုးဖြင့်ကာကွယ်နှိမ်နင်းနိင်ပါသည်။အသီးမခူးမှီ(၃၀‒၄၅)ရက်အလိုတွင်အသီးအိတ်စွပ်ခြင်းသည်သီးထိုးယင်ကိုကာကွယ်နိင်သည့်အပြင်အသီးအရောင်လှပြီးအသီးအရည်ရွှမ်းစေပါသည်။အမြစ်ပုပ်၊ပင်စည်ပုပ်ရောဂါ၊ကိုင်းခြောက်ရောဂါ၊မှည့်ပြောက်စွန်းရောဂါနှင့်အစေးထွက်ရောဂါများကျရောက်သည့်အတွက်မက်တက်လက်ဇီ၊မန်ကိုဇက်၊ဘီနိုမိုင်းစသောမှိုသတ်ဆေးများဖြင့်ကာကွယ်နှိမ်နင်းနိုင်ပါသည်။
သီးကင်းခြွေခြင်း၊သီးကိုင်းထောက်ခြင်း
သီးကင်းခြွေခြင်းကိုအသီးများသံပုရာသီးအလုံးကြီးအရွယ်တွင်ပြုလုပ်ပေးရမည်။သီးကင်းခြွေခြင်းအားဖြင့်အသီးအရွယ်အစားညီခြင်း၊အသီးကြီးခြင်း၊ရင့်မှည့်ချိန်ညီခြင်း၊အသီးခူးချိန်တွင်အပြစ်အနာနှင့်ရောဂါပါသောအသီးများကင်းစင်ခြင်းစသောအကျိုးကျေးဇူးများရရှိပါသည်။ကိုင်းထောက်ခြင်းကိုအသီးအညှာမြဲချိန်တွင်ဆောင်ရွက်ပါ။သီးကိုင်းများကျိုးခြင်း၊အသီးထိခိုက်မှုမရှိစေရန်နှင့်အပင်နှင့်အသီးအရေအတွက်မျှတစေရန်သီးကိုင်းထောက်ခြင်းကိုစနစ်တကျပြုလုပ်ပေးပါ။
Source: DOA
![likes](../heart.png)
![comments](../comments.png)
![views](../views.png)