ရာသီဥတုပြောင်းလဲခြင်းအပေါ် ငါး၊ ပုစွန်မွေးမြူသူများ သတိပြုရမည့် အချက်များ

                   လာနီညာရာသီဥတု၏ သဘောသဘာဝမှာ အေးပြီးစွတ်စိုတတ်ပါသည်။ တခါတရံ မိုးရွာခြင်းများလည်း ရှိတတ်ပါသည်။ ထို့ကြောင့် မြန်မာနိုင်ငံ၏ ရာသီဥတုအရ နိုဝင်ဘာနှင့် ဒီဇင်ဘာများသည် ဆောင်းရာသီအဖြစ် သတ်မှတ်ထားသဖြင့် အဆိုပါလများတွင် ကန်ရေအပူချိန်ကျဆင်းခြင်း နှင့် နောက်ဆက်တွဲတွင် ပျော်ဝင် အောက်စီဂျင် လျော့နည်းခြင်းများ ကြုံတွေ့နိုင်ပါသည်။ အဆိုပါအချက်ကို သတိပြုရပါမည်။ အထူးသဖြင့် ပုံမှန် ထက်အေးသော နေ့ရက်များတွင် ညအချိန်တွင် ကန်အတွင်း အောက်စီဂျင် ပြတ်တောက်ခြင်းများကို ကြုံတွေ့ ရပါမည်။ နှင်းများစွာ ကျရောက်သော မနက်ပိုင်းတွင်လည်း ငါးများ ကန်ရေမျက်နှာပြင်အထိ တက်ရောက် အသက်ရှူခြင်းများ တွေ့ရှိရပါမည်။

           အဆိုပါအခြေအနေမျိုးတွင် ကြုံတွေ့ပါက ည (၁၂)နာရီကျော်လွန်သော အချိန်တွင် ငါး၊ ပုစွန်မွေးမြူရေး ကန်ရေကို လှုပ်ရှားပေးရန် လိုအပ်ပါသည်။ ကန်အောက်ခြေရှိရေကို စုပ်ယူပြီး ရေပြန်ချခြင်းလုပ်ငန်းများကို ဆောင်ရွက်ပေးနိုင်မှသာ ကန်အတွင်း ပျော်ဝင်အောက်စီဂျင်ရရှိနိုင်ပါမည်။

           အစာကျွေးခြင်းကိုလည်း ဂရုပြုရန် လိုအပ်ပါသည်။ ငါး၊ ပုစွန်များသည် သတ်မှတ်ထားသော အပူချိန်ရှိမှ သာ အစာစားခြင်းကို ဆောင်ရွက်လေ့ရှိသဖြင့် အပူချိန် ၂၅ မှ ၃၂ ဒီဂရီစင်တီဂရိတ်အတွင်းမှသာ အစာကျွေးရန် အကြံပြုပါသည်။ ကန်ရေအပူချိန် ကျဆင်းနေပါက အစာကျွေးခြင်းကို ဆင်ခြင်ရန်လိုအပ်ပါသည်။ ထို့အတူ မိမိ ကြွေးသော အစာများ ကုန်၊မကုန်ကို စစ်ဆေးပေးသင့်ပါသည်။ အစာမကုန်ပါက အစာကျန်များရှိနေပါက နောက်တနေ့တွင် အစာလျော့ကျွေးခြင်းကို ဆောင်ရွက်ပေးပါရန် အကြံပြုအပ်ပါသည်။

ဦးစန်းအောင်

ထွက်တိုး

--------------

ငါးမွေးမြူရေးနှင့်ပတ်သတ်သောဆောင်းပါးများ၊ မွေးမြူရေးနည်းလမ်းများ၊ ငါးမွေးမြူရာတွင်သိထားသင့်သော အချက်များကို ပိုမိုလေ့လာလိုပါက

ထွက်တိုးစိုက်မွေးဖုန်းဆော့ဝဲ -https://htwettoe.com/download

ထွက်တိုး၏စီးပွားဖြစ်ငါးမွေးမြူရေးအဖွဲ့ - https://www.facebook.com/groups/4200052776702483

တွင် လေ့လာနိုင်ပြီး ဝင်ရောက်ဆွေးနွေး နိုင်ပါကြောင်းသတင်းကောင်းပါးအပ်ပါသည် ခင်ဗျာ။