ယင်ဖြူ ကျရောက် ဖျက်ဆီးမှု လက္ခဏာများ

- ယင်ဖြူကျရောက် ဖျက်ဆီးခြင်းကြောင့် အဖြူရောင် ဖယောင်းချပ်များ ကဲ့သို့သော အရာများကို ပဲတီစိမ်းရွက်များ ပေါ်တွင် တွေ့ရတတ်ပါသည်။- ယင်ဖြူများမှ ထုတ်သော စစ်ထုတ်ရည်များနှင့် ၎င်းတို့မှ တဆင့် ဖြစ်ပေါ်လာသော ကြပ်ခိုးမှိုများကိုလည်း ပဲတီစိမ်းရွက်များပေါ်တွင် တွေ့ရနိုင်ပါသည်။

ယင်ဖြူ ဖျက်ပိုး၏ သွင်ပြင်လက္ခဏာ

- အရွယ်ရောက် ယင်ဖြူကောင်သည် အဝါရောင် ကိုယ်ထည်ရှိပြီး အဖြူရောင် တောင်ပံ လေးခု ပါရှိပါသည်။

- ယင်ဖြူအမများသည် အရွက်၏ အောက်ဘက်မျက်နှာပြင်တွင် ဥများ ဥလေ့ရှိသည်။

- ပိုးမမည် ကောင်လေးများသည် အများအားဖြင့် အရွက်အောက်ဘက် မျက်နှာပြင်တွင် မရွေ့လျားဘဲ ရှိနေတတ်ပါသည်။

ယင်ဖြူဖျက်ပိုးအား ကာကွယ်နှိမ်နှင်းခြင်း

ဘက်စုံနည်းလမ်းဖြင့် ကာကွယ်နှိမ်နှင်းခြင်း

- စိုက်ပျိုးရာသီအစတွင် ယင်ဖြူများ ကျရောက်မှုမှ ကာကွယ်ရန် အဝါရောင် စေးကပ်ထောင်ချောက်များကို အပင်များ၏ အပေါ်တွင် ချိတ်ဆွဲထားကာ ဖမ်းယူလေ့ရှိပါသည်။

- ယင်ဖြူကျရောက်နေသည့် စိုက်ခင်းကို ရေပြင်းအားများသည့် ဆေးဖျန်းခေါင်းဖြင့် ပက်ဖျန်းခြင်းဖြင့် ယင်ဖြူများနှင့် ဥများကို အပင်ပေါ်မှ ဖယ်ရှားနိူင်ပါသည်။

- ရောင်ပြန် ပလတ်စတစ် သို့မဟုတ် ရောင်ပြန် အလူမီနီယံပြာများကို ယင်ဖြူကျနိုင်ခြေရှိသည့် အပင်များ ပတ်ဝန်းကျင်တွင် ဖြန့်ကျက်ထားပါ။ ၎င်းတို့သည် ယင်ဖြူများအား အပင်များပေါ်တွင် နေထိုင်ရန် ခက်ခဲစေသည့်အပြင် ဥရာတွင်လည်း ခက်ခဲစေပါသည်။

- ယင်ဖြူရန်မှ ကာကွယ်ရန် စိုက်ချိန်မှန် စိုက်ပျိုးပေးရန် လိုအပ်ပါသည်။ (ဆောင်းစိုက်ခင်း-အောက်တိုဘာလကုန်-နိုဝင်ဘာလဆန်းအတွင်း စိုက်ပျိုးပေးရမည်။)

- ငှက်များ၊ ပင့်ကူများ၊ ဇာတောင်ပိုး၊ ပျစားယင်၊ ကျိုင်းကောင်စသည်တို့သည် ယင်ဖြူများကို စားသုံးနှိမ်နင်းပေးသော မိတ်ဆွေပိုးများ ဖြစ်ကြပါသည်။ လိပ်ခုံးကျိုင်းများသည်လည်း ယင်ဖြူများကို စားသောက်ပစ်လေ့ရှိပါသည်။

- စိုက်ခင်းအတွင်းနှင့် ပတ်ဝန်းကျင်တွင် ယင်ဖြူများ များပြားမှုကို နှိမ်နင်းရန်အတွက် ပေါင်းပင်များကို ရှင်းလင်းဖယ်ရှားပစ်ပါ။

- ပိုးကျရောက် ဖျက်ဆီးထားသော အရွက်များနှင့် အကိုင်းများကို ဖယ်ရှားပါ။

- စိုက်ခင်း အနီးအနားကို လမ်းဖြတ်လျှောက်သည့် အခါ အရွက်အောက်မှာ ပုန်းနေတဲ့ အကောင်တွေ ဖွေးခနဲ ပျံသန်းသွားခဲ့ရင် စိုက်ခင်းမှာ ယင်ဖြူကျရောက်နေပြီ ဆိုတာသိနိုင်ပါတယ်။

- ထိုအခြေအနေမှာ စိုက်ခင်းမှာ ကျရောက်နေတဲ့ ယင်ဖြူကို ပိုးသတ်ဆေးသုံးပြီး ကာကွယ်နှိမ်နင်း နိုင်ပါတယ်။ ဤနည်းဖြင့် ယင်ဖြူ၏ အကောင်ငယ် အဆင့်မှ အကောင်ကြီး အဆင့်ထိကို ထိရောက်စွာ နှိမ်နင်းပေးနိုင်ပါတယ်။

- အဝါရောင်သည် ယင်ဖြူကို ဆွဲဆောင်နိုင်သောကြောင့် မိမိစိုက်ပျိုးတဲ့တဲ့ သီးနှံ၏ စိုက်ခင်းဘေးမှာ အဝါရောင်ရှိတဲ့ သီးနှံတစ်မျိုးမျိုးကို လက်ခံလွှဲပင် အဖြစ်စိုက်ပျိုးခြင်းဖြင့် ယင်ဖြူကျရောက်မှုကို ဟန့်တားနိုင်ပါတယ်။

- စိုက်ခင်းဘေးနားမှာ ရှိတဲ့ ပေါင်းမြက်တွေမှာ ယင်ဖြူခိုအောင်း နေထိုင်နိုင်တာကြောင့် ပေါင်းမြက်များကို ရှင်းလင်း ထားရပါမည်။

- ယင်ဖြူ မလာစေရန် စိုက်ခင်းဘေးနားမှာ ချစ်တီးပန်းများ စိုက်ပျိုးထားနိုင်ပါသည်။

- စိုက်ခင်းကို ရေပုံမှန်ဖျန်းပေးပါ။ အရွက်၏ အောက်မျက်နှာပြင်ကို ဂရုစိုက်ပြီး ဖျန်းပေးဖို့ လိုအပ်ပါတယ်။ ဤနည်းလမ်းက အကောင်ကြီးအဆင့်ကိုသာ နှိမ်နင်းနိုင်ပါတယ်။ (၃-၄) ရက်ခြား တစ်ခါ ပြုလုပ်ပေးမယ်ဆိုရင် ရုပ်ဖုံး အဆင့်ကနေ ထွက်လာတဲ့ ယင်ဖြူ အကောင်ကြီးမျာကို ဖယ်ရှားပေးနိုင်မှာ ဖြစ်ပါတယ်။

- ရေ၄ဂါလံဝင် ဆေးဖျန်းပုံးတပုံးအတွက် တမာ ပိုးသတ်ဆေး အဇာဒီရာ ခိုင်တင်(Azadirchtin 0.03% EC) စားပွဲတင်ဇွန်း ၈ဇွန်းကို ပက်ဖြန်းပေးခြင်းဖြင့် ယင်ဖြူကျရောက်မှုမှ ကာကွယ်နိုင်ပါသည်။

- ပိုးကျရောက်မှုပေါ် မူတည်၍ တစ်ဧကလျှင် ဆေးဖျန်းပုံး ၄ပုံး-၅ပုံး အသုံးပြုနိူင်ပါသည်။

- ပိုးကျနေသော အပင်များရှိ ဥများကို ရှာဖွေဖျက်ဆီးပစ်ပါ။

ယင်ဖြူရန်မှ ကာကွယ်ရန် ဖော်ပြပါ ပိုးသတ်ဆေးများကို အသုံးပြုနိုင်ပါသည်။

၁။ ရေ ၄ ဂါလံဝင် ဆေးဖြန်းပုံးတစ်ပုံးလျှင် ထရိုင်ဇိုဖော့ ၁၆.၇% w/v +ကလိုရို ပယ်ရီဖော့ ၈.၃ w/v စားပွဲတင်ဇွန်းဝက် (၆-၁၀) ဇွန်းနှုန်း

၂။ ရေ ၄ ဂါလံဝင် ဆေးဖြန်းပုံးတစ်ပုံးလျှင် အစီတာမီပရစ်ဒ် ၁.၈% အီးစီ စားပွဲတင်ဇွန်း (၄-၅) ဇွန်းနှုန်း

၃။ ရေ ၄ ဂါလံဝင် ဆေးဖြန်းပုံးတစ်ပုံးလျှင် အစီတာမီပရစ်ဒ် ၂၀% w/v + လမ်ဘဒါ ဆိုင်ဟေလိုသရင် ၅% w/w စားပွဲတင်ဇွန်း (ဝ.၅-၁) ဇွန်းနှုန်း

သို့မဟုတ် ဈေးကွက်အတွင်း ဝယ်ယူရရှိနိုင်သာ ပိုးသတ်ဆေးထုတ်များတွင် ပါရှိသည့် မြန်မာစာ အညွှန်းအတိုင်း အသုံးပြုနိုင်ပါသည်။ (မြန်မာစာဆေးညွှန်းကို သေချာဖတ်ပြီး လိုက်နာဆောင်ရွက်ပါ)