ပဲသိမ်းချိန်ကာလ သတိပြုစရာများ

🔹ပဲမျိုးစုံရိတ်သိမ်းရာတွင် ပဲမျိုးအလိုက်ရိတ်သိမ်းချိန်မှန်ကန်ရသည်။ပဲတီစိမ်းကိုသီးတောင့်များဝါညိုရောင်ပြောင်းလဲချိန်တွင်ဆွတ်ခူးပါ။ မတ်ပဲကိုသီးတောင့်များမာချိန်သိမ်းပါ။ ပဲစဉ်းငုံမှ အပင်နှင့်အရွက် သီးတောင့်များဝါလာချိန်၊ ညှိုးလာချိန်သိမ်းပါ။ ကုလားပဲကိုသီးတောင့်များ ကောက်ရိုးခြောက်ရောင် ပြောင်းလဲချိန်သိမ်းပါ။ ပဲပုပ်ကိုသီးတောင့်များ ရွှေဝါရောင် ပြောင်း၍စိုက်ခင်း၏ ၉၅% အသီးများရင့်မှည့်ချိန်၊ အရွက်များတစ်ပင်လုံးဝါ၍ ညှိုးငိုက်ကျချိန် သိမ်းကြရသည်။ 

🔹 ခူးဆွတ် ရိတ်သိမ်းချိန်မှန်ကန်မှသာ သိုလှောင်ချိန်၌ပဲ၏အရည်အသွေးတက်လာမည်။ ပိုးမွှားနှင့်အပင်ရောဂါ ကျရောက်မှုသက်သာမည်။ မျိုးအဖြစ်ထားနိုင်ပြီး ပြန်လည်စိုက်ပျိုးချိန်တွင်လည်း အပင်ပေါက်အားကောင်းမည်။ 

🔹နုတ်သိမ်းပြီးလျှင်နောက်တစ်ဆင့် ချွေလှေ့ရမည်။ရိတ်ခြွေမှုကြောင့်ပဲသီး၊ ပဲစေ့ဆုံးရှုံးထိခိုက်ရသည်။ တလင်းအတွင်းပဲခြွေရာ၌ နွားဖြင့်နင်းခြင်း၊ စက်ဖြင့်နယ်ခြင်းများပြုလုပ်စဉ် လေလွင့်ဆုံးရှုံးမှုများကိုနည်းနိုင်သမျှ နည်းအောင်ဂရုပြုရပါမည်။ 

🔹ခြွေပြီးလျှင်အဖျင်း အမှော်ဖယ်ရမည်။ကျောက်ခဲ၊ သဲ၊ အရွက်ခြောက်၊ ကိုင်းခြောက်၊ ပေါင်းစေ့၊ မြေကြီးခဲ၊ အမှိုက်များဖယ်ရှင်းရသည်။ သန့်စင်မှုရှိလေ ဈေးကောင်းရလေဖြစ်သည်။ သန့်စင်ပါမှ သိုလှောင်ချိန် တွင် ပျက်စီးမှုနည်းမည်။ကြိတ်ခွဲလျှင်လည်းလေလွင့်ဆုံးရှုံးမှု သက်သာသည်။ နယ်လှေ့ရာတွင်စနစ်တစ်ကျ ပြုလုပ်မှသာ ဈေးကွက်၌ပဲသန့်ပြီးဈေးကောင်းရသည်။ ပဲမျိုးအလိုက်သီးသန့်ခွဲခြားခြွေလှေ့ ၊ နယ်လှေ့ရသည်။ 

 🔹ထို့နောက်အဖျင်းအမှော် ဖယ်ရှင်း၊ နယ်လှေ့ပြီးပဲများကို အရည်အသွေးအရ အဆင့်ခွဲခြားရသည်။စက်ဖြင့် အဆင့်ခွဲခြားပြုလုပ်ပေးနိုင်လျှင် လုံးရွယ်တူညီသည်များ သီးခြားခွဲထွက်လာသည်။ သီးနှံအခြောက်ခံစက်များ ကိုပါအသုံးပြုနိုင်ပါက ပဲဈေးကွက်တွင် သိသိသာသာဈေးကောင်းရမည့် အရည်အသွေးရှိလာမည်။ ပဲမျိုးစုံ ပြည်ပဈေးကွက်တန်းဝင်လာမည်။ ပုံမှန်အားဖြင့် ပဲမျိုးစုံကို မျက်မှန်းဖြင့်ခွဲခြားခြင်း၊ နေလှန်းအခြောက်ခံခြင်းကို ပြုလုပ်‌ပေးရမည်။ အရွယ်အစားနှင့် အရည်အသွေး သန့်စင်ပြီး၊ အခြောက်ခံပြီး ပဲများကိုသာ လိုအပ်သလို သိုလှောင် သင့်ပါသည်။ 

 🔹သို့သော်ရိတ်သိမ်းချိန်နောက်ပိုင်းနည်းပညာ ချို့တဲ့မှုကြောင့် စပါးအပါအဝင် ပဲမျိုးစုံ ၊ဆီထွက်သီးနှံ၊ ရော်ဘာမှ အစ အောက်ဈေးဖြင့် ရောင်းနေကြရသည်။ ဈေးကွက်တွင်အဆင့်ခွဲခြားရောင်းချနိုင်လျှင် အရည်အသွေးကောင်း သောသီးနှံမှန်သမျှဈေးကောင်းရပါသည်။ သီးနှံအရည်အသွေးမြင့်မားရန်လည်းလိုအပ်ပါသည်။ ထို့ကြောင့် သီးနှံစိုက်ပျိုးမှုတွင် ဂရုပြုခဲ့ကြသကဲ့သို့ ရိတ်သိမ်း၊ ခြွေလှေ့၊ သိုလှောင်သန့်စင်ရာတွင်လည်း ဂရုပြုဆောင်ရွက် ကြရန်လိုအပ်ပါသည်။ 

 မြန်မာတောင်သူကြီးများဂျာနယ်။