ဝဥစိုက်ပျိူး ဝင်ငွေတိုး”

➤မူရင်းဒေသ

ဝဥ၏ မူရင်းဒေသမှာ အရှေ့တောင်အာရှဒေသဖြစ်ပြီး အပူပိုင်းအာရှဒေသနှင့် အာဖရိကဒေသများတွင် သဘာဝအလျောက် ပေါက်ရောက်ကြပါတယ်။ မြန်မာနိုင်ငံတွင် တောင်ပေါ်ဒေသများနှင့် ရန်ကုန်-ပြည် တစ်ကြော၊ ရန်ကုန်- မန္တလေးကြား၊ ကချင်၊ ကရင်၊ ရခိုင်၊ ရှမ်းပြည်နယ်၊ စစ်ကိုင်း၊ ဧရာဝတီ၊ ပဲခူးနှင့် တနင်္သာရီဒေသများတွင် သဘာဝအလျောက်ပေါက်ရောက်လျက်ရှိကြပါတယ်။ ကမ္ဘာမှာ ဝဥမျိုးပေါင်း ၁၃၀ ကျော်ရှိပြီး ၁၂ မျိုး ခန့်ကိုသာ လူတို့အတွက် အသုံးပြုလျက်ရှိပါတယ်။

➤မျိုးယူခြင်း

၃၀ ကျပ်သားရှိ ဥများကို တိုက်ရိုက်ချ၍ စိုက်ပျိုးခြင်း။

၁ ပိဿာခန့်ရှိ ဥများကို ၄ စိတ်အညီ ခွဲခြမ်း၍ စိုက်ပျိုးခြင်း။

ပန်းခိုင်မှ ရရှိသော မျိုးစေ့များကို သဲအစိုဘောင်ဖြင့် စိုက်ပျိုးခြင်း။

မြေကြီးထဲမှ ပင်မ ဥမကြီးမှ အဖုများကို ဖဲ့၍ စိုက်ပျိုးခြင်း။

အရွက်မှအသီးများကို ပျိုးထောင်၍ စိုက်ပျိုးခြင်း။

➤စိုက်ပျိုးရန် မြေပြုပြင်ခြင်း

ခြုံနွယ်၊ ပေါင်းမြက်များရှင်းလင်းပြီး ထယ်တစ်လွှာ ထွန် ၂ လွှာ ထွန်ရပါမယ်။ ထို့နောက် စိုက်တန်း၊ စိုက်ကျင်းများ ပြင်ရပါမယ်။

စိုက်ပျိုးခြင်း

တန်းကြား ၄ ပေ၊ ပင်ကြား ၂ ပေ ထား၍ စိုက်ပါ။ တစ်ဧကလျှင် ၅၄၄၅ ပင် ဝင်အောင်စိုက်သင့်ပါတယ်။

➤မြေချခြင်း

မိုးဦးရာသီမေလမှာ စတင်စိုက်ပျိုးသင့်ပါတယ်။ ၆ လက္မပတ်လည် စိုက်ကျင်းပြင်ပြီး အပေါ်ယံမြေ ၂- ၃ လက္မ ခန့် မြေဖုံးရုံ စိုက်ပျိုးနိုင်ပါတယ်။ မြေကြီးထဲ လွန်စာ နစ်မြုပ်အောင်မစိုက်ရပါဘူး။

➤အပင်ပြုစုခြင်း

အညွှန့်ထွက်ပြီး မြေပေါ်အပင်ပိုင်းကြီးထွားလာလျှင် ပေါင်းသင်မြေဆွ ဘောင်လုံးပေးရပါမယ်။ ရေမဝပ်ရန် အထူးဂရုစိုက်ဖို့လိုပါမယ်။ အရိပ်မရှိပါက ဖြစ်နိုင်ရင် အရိပ် ၆၀ % ရအောင်ဆောင်ရွက်ပေးသင့်ပါတယ်။

➤ရိတ်သိမ်းခြင်း

ဆောင်းဦးရာသီ၊ နိုဝင်ဘာ- ဒီဇင်ဘာလ တွင် မြေပေါ်ပင်ပိုင်းညှိုးခြောက်သွားချိန်၌ တူးဖေါ်ရိတ်သိမ်းရပါမယ်။ ရိတ်သိမ်းချိန်တွင် ဥများထိခိုက်ဒါဏ်ရာမရစေရန် ဂရုစိုက်ရပါမယ်။ တစ်ဧက စိုက်ပါက ဝဥအစို ၁၀ တန်မှ ၁၅ တန် အထိရနိုင်ပါတယ်။ တူးဖော်ပြီး ၃ ရက်ထက်ပို၍ အခြောက်ခံမထားသင့်ပါ။ အရိပ်ရသော လေသလပ်ရာနေရာတွင် သိုလှောင်ထားရပါမယ်။ အခြောက်ခံပါက ဝဥအခြောက် တန် ၂ တန်မှ ၃ တန် ရနိုင်ပါတယ်။

ကိုးကာချက်။။ စိုက်ပျိုးရေးဦးစီးဌာန။

-----

ထွက်တိုး Telegram Channel ဝင်ရန် နှိပ်ပါ - https://t.me/htwettoe

စိုက်ပျိုးရေးသတင်းနှင့် ဆောင်းပါးသစ်များ၊ စိုက်ပျိုးနည်းများ၊ ကာကွယ်နှိမ်နင်းနည်းများ အတွက် ထွက်တိုးကို follow, Like, Share နှင့် Download လုပ်ထားပါ - https://bit.ly/htwettoev2