ကြက်သွန်ဖြူစိုက်ပျိုးနည်း
ကြက်သွန်ဖြူမျိုးများ
ရှမ်းမျိုး(အခွံဖြူ)
ဥအရွယ်အစားမှာတရုတ်မျိုးထက်အနည်းငယ်အမွှာသေးပြီးအခွံအဖြူရောင်မျိုးဖြစ်ပါသည်။
ရှမ်းမျိုး(အခွံနီ)
ကြက်သွန်ဖြူဥအရွယ်သေးပြီးအမွှာသေးသည်။
တရုတ်မျိုး
ကြက်သွန်ဖြူအရွယ်အစားကြီးပြီးအမွှာကြီးပါသည်။
မြေအမျိုးအစား
မြေအချဉ်အငံဓါတ်(၅.၅)မှ(၆.၀)ရှိသောမြေမျိုးကိုကြိုက်နှစ်သက်သည်။မြေအချဉ်အငံဓါတ်မြင့်မားသောမြေမျိုးကိုကြိုက်နှစ်သက်မှုမရှိပါ။
ရာသီဥတု
အပူအအေးသင့်တော်သော ရာသီဥတုကို ကြိုက်နှစ်သက်သည်။ နေ့တာရှည်ခြင်းသည် ဥဖြစ်ပေါ်မှု အားပေးသည်။အပင်ကြီးထွားဖွံ့ဖြိုးမှုအတွက် အသင့်တော်ဆုံး အပူချိန် (၁၈°‒၂၀°)စင်တီဂရိတ်တွင် ဖြစ်ထွန်းပြီး ဥမှအညှောင့်ပေါက်ရန်အတွက် မြေတွင်းအပူချိန် (၂၂°‒၂၃°)စင်တီဂရိတ် လိုအပ်ပါသည်။(၂၇°)စင်တီဂရိတ်ထက်မြင့်ပါက အပင်ကြီးထွားမှု ညံ့စေပါသည်။ကြက်သွန်ဥဖြစ်ပေါ်ရန်အပူချိန်(၅°‒၁၀°)စင်တီဂရိတ်တွင်အ နည်းဆုံး(၁-၂)လရှိရန်လိုအပ်ပါသည်။
မျိုးနှုန်း
တစ်ဧကလျှင်ကြက်သွန်ဖြူဥပိဿာချိန်(၂၅၀‒၃၀၀)ခန့်လိုအပ်သည်။မျိုးဥအားအမွှာကြီးပြီးရောဂါကင်းသောမျိုးများကိုအသုံးပြုပါ။
မြေသြဇာနှုန်းထား
တစ်ဧကနှုန်းသဘာဝမြေသြဇာ(၁၀-၂၀)တန်
ယူရီးယား (၅၀)ကီလိုဝင် (၂)အိတ်
တီစူပါ (၅၀)ကီလိုဝင် (၂)အိတ်
ပိုတက်ရှ် (၅၀)ကီလိုဝင် (၁)အိတ်
စိုက်ပျိုးချိန်
အများအားဖြင့်(အောက်တိုဘာ‒နိုဝင်ဘာ)လတွင်စိုက်ပျိုး၍(ဖေဖော်ဝါရီ‒မတ်)လတွင်တူးဖော်ကြသည်။
မြေပြုပြင်ခြင်း
ထယ်ရေးနက်နက်နှင့်ထွန်ရေးညက်အောင်ထွန်ပြီးကြမ်းတုံးရိုက်၍ဘောင်ဖော်စိုက်ပျိုးလေ့ရှိပါသည်။မြေခံအဖြစ်ယူရီးယား(၁)အိတ်၊တီစူပါ(၂)အိတ်၊ပိုတက်ရှ်(၁)အိတ်ထည့်ပေးပြီးကျန်ယူရီးယား(၁)အိတ်ကိုကြားပေါင်းလိုက်ချိန်နှင့်ဥစတင်ဆင်းချိန်တွင်ထည့်ပေးပါ။
စိုက်ပျိုးခြင်း
ဘောင်အမြင့်(၈)လက်မ၊အကျယ်(၃)ပေခန့်ထား၍ဘောင်ဖော်ပြီးတစ်တန်းနှင့်တစ်တန်း(၄)လက်မခွာ၍တစ်ပင်နှင့်တစ်ပင်(၂)လက်မခြား၍စိုက်ပျိုးပါသည်။စိုက်ပြီးဘောင်အမြင့်နှင့်အညီရေပေးသွင်းရပါသည်။
အပင်ပြုစုခြင်း
ပေါင်းနှိမ်နင်းရေးလုပ်ငန်းသည်အထူးအရေးကြီးပါသည်။လက်ဖြင့်ပေါင်းနှိမ်နင်းလေ့ရှိပြီးစိုက်ပြီးတစ်ပတ်တစ်ကြိမ်ပေါင်းနှိမ်နင်းပေးရပါမည်။အပင်(၂)လသားအထိပေါင်းနှိမ်နင်းခြင်းကိုဂရုပြုဆောင်ရွက်ပေးရပါမည်။မြေအလွန်ကြပ်နေပါကနွားချေး၊မြေဆွေးထပ်မံထည့်ပေးရမည်။ကြက်သွန်ဖူးများကိုအပတ်စဉ်ချိုးပေးပါ။
ရေသွင်းခြင်း
သာမန်အားဖြင့်တစ်ပတ်လျှင်တစ်ကြိမ်ရေပေးသွင်းရမည်။ရာသီဥတုပူပြင်းပါက(၄‒၅)ရက်တစ်ကြိမ်ရေပေးသွင်းရမည်။ရေသွင်းချိန်(၈)ကြိမ်မှ(၁၀)ကြိမ်ထိလိုအပ်ပါသည်။အပင်(၂)လသားအမြင့်(၁)ပေခွဲခန့်ရှိချိန်တွင်ရေသွင်းခြင်းကိုရပ်လိုက်ရပါမည်။
ပိုးမွှားရောဂါကာကွယ်နှိမ်နှင်းခြင်း
(က)သရစ်ပိုး
ပင်လုံးပြန့်အာနိသင်ရှိသောပိုးသတ်ဆေးတစ်မျိုးမျိုးဖြင့်ကာကွယ်ပက်ဖျန်းပါ။ပိုးကျရောက်ပါကထိသေအာနိသင်ရှိသောပိုးသတ်ဆေးတစ်မျိုးမျိုးကိုဆေးဘူးတွင်ပါရှိသောအညွှန်းအတိုင်းသုံးစွဲပါ။
(ခ)ပျပိုး
ပင်လုံးပြန့်အာနိသင်ရှိသောပိုးသတ်ဆေးတစ်မျိုးမျိုးဖြင့်ပက်ဖျန်းကာကွယ်ပါ။
(ဂ)တောက်တဲ့မြီးရောဂါ
ရောဂါကင်းသောမျိုးကိုရွေးချယ်စိုက်ပျိုးပါ။မျိုးစေ့(၁)ကီလိုဂရမ်တွင်သိုင်ရမ်(Thiram)(၄)ဂရမ်နှုန်းဖြင့်ဆေးစီရင်ပါ။စိုက်ခင်းကိုရေသွင်းရေထုတ်ကောင်းအောင်ပြုလုပ်ပါ။
ရိတ်သိမ်းခြင်း
အပင်သက်တမ်းမှာ(၁၃၅‒၁၅၀)ရက်ရှိပါသည်။ပင်စည်နှင့်အရွက်(၁၅‒၂၅)ရာခိုင်နှုန်းခန့်ဝါလာလျှင်(သို့)ခြောက်လာလျှင်အပင်ကိုလက်ဖြင့်ဆွဲနုတ်၍သိမ်းယူနိုင်သည်။မျိုးအတွက်ထားပါကအပင်လိုက်လက် တစ်ဆုပ်စာခန့်စီး၍ဝါးတန်းပေါ်တွင်အခြောက်ခံထားပါ။နုတ်ယူပြီးသောအပင်များကိုအမြိတ်များဖြတ်တောက်၍နေ(၂)ရက်ခန့်လှန်းထားနိုင်ပါသည်။
အထွက်နှုန်း
တစ်ဧကပိဿာချိန်(၁၅၀၀)မှ(၃၀၀၀)ထိထွက်နိုင်သည်။နုတ်ယူပြီးသောကြက်သွန်ပင်များကိုအစည်းလေးများပြုလုပ်၍ ခြောက်သွေ့သန့်စင်သောအခန်းတွင်လေသလပ်ခံ၍သိမ်းဆည်းထားရပါမည်။စျေးကွက်သို့တင်ပို့ရောင်းချချိန်ရောက်မှအမြိတ်များကိုဖြတ်၍ရောင်းချရပါမည်။
ကြက်သွန်ဖြူအထွက်နှုန်းတိုးစေရန် ဆောင်ရွက်ရမည့် အချက်များ
၁။ရေမြေဒေသအလိုက်ကိုက်ညီမှုရှိသောမျိုးကို ရွေးချယ်စိုက်ပျိုးပါ။
၂။မြေအချဉ်အငံဓါတ်(၅.၅မှ၆.၀)ရှိသောမြေတွင်ထယ်ရေးနက်နက်၊ညက်ညက်ထွန်၍ရေသွင်းရေထုတ်မြောင်းများစနစ်တကျဖော်ပြီးဆောင်ရွက်ပါ။
၃။ရောဂါကင်းသောမျိုး၊အမွှာကြီးသောမျိုးများရွေးချယ်ပြီးတစ်ဧကလျှင်မျိုးနှုန်း(၂၅၀-၃၀၀)ပိဿာအသုံးပြုပါ။
၄။ပင်ကြား၊တန်ကြား(၂×၄)လက်မ(သို့)(၄×၄)လက်မအကွာအဝေးဖြင့်တစ်ဧကလျှင်(၂၅၀၀၀၀ - ၂၇၀၀၀၀)ဝင်ဆံ့အောင်စိုက်ပျိုးပါ။
၅။တစ်ဧကလျှင်သဘာဝမြေသြဇာ(၁၀)တန်ယူရီးယား(၂)အိတ်၊တီစူပါ(၂)အိတ်၊ပိုတက်(၁) အိတ်နှုန်းထည့်ပါ။
၆။စိုက်ပြီး(၁)လအကြာတွင်ကြားပေါင်းလိုက်ပေးပါ။သီးနှံတစ်ရာသီလျှင် ကြားပေါင်း(၃)ကြိမ် လိုက်ပေးပါ။
၇။စိုက်ခင်း၌အစိုဓါတ်လုံလောက်မှုရှိစေရန်အမြဲဂရုပြုပါ။
၈။ပန်းမပွင့်မီကြက်သွန်ဖူးများကိုမဖြစ်မနေချိုးပေးပါ။
၉။ပိုးမွှားရောဂါကျရောက်ပါကသင့်တော်သောပိုးသတ်ဆေး၊မှိုသတ်ဆေးများကိုအညွှန်းပါအတိုင်းပက်ဖျန်းကာကွယ်နိုင်ပါသည်။
၁၀။အပင်သက်တမ်း(၄)လမှ(၅)လအကြာကြက်သွန်ဖြူပင်စည်နှင့်အရွက်(၁၅-၂၅) ရာခိုင်နှုန်းဝါလာလျှင်ရိတ်သိမ်းပါ။
၁၁။ကြက်သွန်ဖြူဥများနှုတ်သိမ်းရာတွင်မြေကြီးထဲ၌ ဥများမကျန်ခဲ့စေရန်သတိပြုပါ။
Source: DoA
![likes](../heart.png)
![comments](../comments.png)
![views](../views.png)