ပိန်းဥစိုက်ပျိုးနည်း🌱🌱

ပိန်းဥ၏ မူရင်းဒေသသည် အိန္ဒိယတောင်ပိုင်းနှင့် အရှေ့တောင်အာရှဖြစ်သည်။ စပါးစိုက် လယ်မြေများ၊ မိုးများသည်းသည့် ဒေသတွင် သဘာဝ အလျှောက် စိုက်ပျိုးဖြစ်ထွန်းသည်။ မိုးနည်းသည့် အထက် မြန်မာပြည် ယာမြေတွင်လည်း ရေသွင်း စိုက်ပျိုးပါက ကောင်းစွာ စိုက်ပျိုး ဖြစ်ထွန်းနိုင်သည်။

နှစ်သက်သောရာသီဥတု

- မိုးရေချိန်- (၈-၁၀) လက်မ အထက် ရွာသွန်းသော ဒေသများတွင် အကောင်းဆုံး ဖြစ်ထွန်းသည်။

- နေ့အပူချိန် (၂၇-၃၅) ဒီဂရီ စင်တီဂရိတ်၊ ညအပူချိန် ( ၂၀-၂၂) ဒီဂရီ စင်တီဂရိတ်တွင် ကောင်းစွာ ဖြစ်ထွန်းသည်။

မြေအမျိုးအစား

- ပိန်းဥသည် နုံးမြေနှင့် ရေစီးဆင်းမှု ကောင်းမွန်သည့် မြေအမျိုးအစားကို ကြိုက်သည်။

- မြေချဉ်ငံဓါတ် (၅.၅-၆ ) အတွင်း စိုက်ပျိုး ဖြစ်ထွန်းသည်။

- မြေအမျိုးအစား မရွေး စိုက်ပျိုးနိုင်သည်။

မျိုးရွေးချယ်ခြင်း

- ပိန်းဥ၏ဥမွှာနှင့် သားတက်(၂)မျိုးလုံး သုံးနိုင်သည်။

- ဥမွှာ၏ အရွယ်အစားပေါ် မူတည်၍ တစ်ဧက အထွက်နှုန်း ကွာခြားသည်။

အရွယ်အစား - အထွက်နှုန်း

(၂) လက်မအထက် ( ၉.၀၄) တန် / ဧက

(၁-၂) လက်မကြား (၈.၁) တန်/ ဧက

(၂) လက်မအောက် (၇.၄) တန် / ဧက

- မျိုးဥရွေးချယ်ရာတွင် ရောဂါပိုးမွှား ကင်းသော မိခင်ပင်မှ ယူရမည်။

- မှိုသတ်ဆေး ကပ်တန် (၄၀ ဂရမ် / လီတာ) တွင် (၂)မိနစ်ခန့်စိမ်ပြီး စိုက်ပါက ဥပုပ်ရောဂါ ( corn rot) ကိုကာကွယ်နိုင်သည်။

ပိန်းဥစိုက်ပျိုးနည်း

မြေသြဇာထည့်သွင်းခြင်း

- မြေသြဇာ အနေဖြင့် ဖော့စဖရပ်(စ်) မြေသြဇာ လုံလောက်ရန် လိုအပ်သည်။

- ဥပုပ်ရောဂါကို ကာကွယ်နိုင်ရန် စိုက်ဘောင်များ အတွင်းတွင် ပိုတက်ဆီယမ်ကို (၂၆ ပေါင်/ဧက) နှုန်းထည့်သွင်းပေးသင့်သည်။

- အခြား အနည်းလို အာဟာရများဖြစ်သော ဇင့်၊ ကယ်ဆီယမ် နှင့် ဆာလဖာဓါတ်များ ချို့တဲ့ပါက ပိန်းအရွက်နှင့် ရိုးတံတို့တွင် လက္ခဏာများ ထင်ရှားစွာပြနေတက်သည်။

စိုက်ခင်းကိုပြုစုခြင်း

- ပိန်းဥကို သားတက် (sucker) မှ၎င်း၊ ဥမွှာမှ ၎င်း၊ ပိန်းရိုး၏ အရင်းမှ၎င်း၊ ပိန်းဥ၏ထိပ်ဖျားမှ (ဝ.၅-၁) လက်မခန့်ဖြတ်၍၎င်း စိုက်ပျိုးနိုင်သည်။

- သားတက်မှ စိုက်ပျိုးပါက ပျိုးခင်းတွင် အညှောင့်ပေါက်စေရန် အရင်ပျိုးထောင်ပြီးမှ စိုက်ခင်းထဲသို့ချရမည်။

- မြေသားနက်၍ လေဝင်လေထွက်ကောင်းပြီး ရေမဝင်စေရန် စိုက်ခင်းဘောင်များကို စနစ်တကျ ပြင်ဆင်ရန် လိုအပ်သည်။

ရိတ်သိမ်းခြင်း

- စိုက်ပျိုးပြီး (၅-၁၁) လကြာလျှင် ( အပူပိုင်းဒေသ)

- စိုက်ပျိုးပြီး (၆-၁၅) လကြာလျှင် (မိုးများသည့်ဒေသ) များတွင် ရိတ်သိမ်းနိုင်သည်။

- လက်ဖြင့်ရိတ်သိမ်းခြင်းမှာ စက်ဖြင့်ရိတ်သိမ်းခြင်းထက် အရည်အသွေးနှင့် ထိခိုက်ဒဏ်ရာရမှုကို သက်သာစေသည်။

- အေး၍ ခြောက်သွေ့သောဒေသများတွင် (၁၂.၆) တန်/ဧကနှုန်း အထိရရှိသည်။

အာဟာရဓါတ်များဆုံးရှုံးမှု မရှိစေရန် သိုလှောင်နည်းစနစ်

- ဒေသထွက်ပစ္စည်းများဖြစ်သော လွှစာမှုံ့/ရေပေါ်စာများကို စိုစွတ်အောင်ပြုလုပ်၍ ပိန်းဥများကို ပလတ်စတစ်အိတ်ပါး(သို့) ပီနန်အိတ်ဘေးပတ်လည်တွင် ဝိုင်းရံပေးထားခြင်းဖြင့် စိုထိုင်းဆကောင်းမွန်စေသောကြောင့် ရက်သတ် (၄-၆) ပတ်ထိ အာဟာရဓါတ်များ ပျက်စီးဆုံးရှုံးမှု မရှိဘဲ သိုလှောင်နိုင်သည်။

- စိုက်ခင်းမှ တူးပြီးသော ပိန်းဥများအား အေး/မှောင်/ခြောက်သွေ့သော နေရာတွင် ကျင်းများတူ၍ အုန်းခွံ/ငှက်ပျောရွက်များအောက်မှာခင်း၍ ပိန်းဥများကို အလယ်တွင်ထားပြီး အပေါ်မှခြောက်သွေ့သော သမြေ (၆) လက်မခန့်ဖုံးအုပ်၍ သိုလှောင်ပါက (၂-၃) လခန့်အထိ အရည်အသွေးမပျက်သိုလှောင်နိုင်သည်။

Sources: MOALI

✦✦✦✦✦✦✦✦✦✦✦✦✦✦✦

ထွက်တိုး Telegram Channel ဝင်ရန် နှိပ်ပါ - https://t.me/htwettoe

စိုက်ပျိုးရေးနှင့် ပတ်သတ်သော အခက်အခဲများကို တိုင်ပင်ဆွေးနွေး အကြံဥာဏ်ရယူလိုပါက ထွက်တိုး တောင်သူအကြံပေးဖုန်း- ၀၉၉၇၇၉၁၀၀၀၀ ကို ဆက်သွယ်နိုင်ပါတယ်