ကြက်သွန်နီအသစ်တွေအဝင်နည်းတာကြောင့် ဈေးကျဆင်းမှုမရှိ

ကြက်သွန်နီအသစ်တွေဈေးကွက်အတွင်း ဝင်ရောက်မှုနည်းပါးတာကြောင့် ဈေးနှုန်းတွေကျဆင်းမှုမရှိသေးဘူးလို့ မန္တလေးဒေသခံကုန်သည်တွေက ပြောပါတယ်။

အခုနှစ်ကြက်သွန်စိုက်ရာသီအတွင်း ရေကြီးနစ်မြုပ်မှုနဲ့ အခြေအနေမတည်ငြိမ်မှုတွေကြောင့် ကြက်သွန်စိုက်ခင်းအများအပြားပျက်စီးလျော့ကျခဲ့ရတဲ့အတွက် အခုလိုဈေးကွက်အတွင်း ကြက်သွန်ဝင်ရောက်မှုနည်းပါးခဲ့တာ ဖြစ်ပါတယ်။

“ဒါမျိုးတခါမှမဖြစ်ဖူးဘူး။ ပစ္စည်းအဝင်အရမ်းကိုနည်းတယ်။ ရှိတဲ့နေရာတွေကသယ်ဖို့မလွယ်တော့ ပိုဆိုးတာပေါ့။ ဈေးကတက်ဈေးပဲ ရှိသေးတယ်”လို့ မန္တလေးဒေသခံကုန်သည်တစ်ဦးက ပြောပါတယ်။

အရည်အသွေးကောင်းမွန်မှုကြောင့် ဈေးကွက်အတွင်းနာမည်ကြီးတဲ့ မြစ်သားမြို့နယ်ကကြက်သွန်နီစိုက်ခင်းတွေဟာ ပြီးခဲ့တဲ့စက်တင်ဘာလအတွင်းကဖြစ်ပွားခဲ့တဲ့ ရေကြီးနစ်မြုပ်မှုကြောင့် ပျက်စီးမှုတွေများပြားခဲ့ပြီး ကြက်သွန်ထွက်နှုန်းအဆမတန်လျော့နည်းခဲ့ရတာ ဖြစ်ပါတယ်။

အဲဒီအပြင် ကြက်သွန်ကိုအဓိကသီးနှံအဖြစ်စိုက်ပျိုးလေ့ရှိတဲ့ မကွေးတိုင်းမြောက်ပိုင်းမှာလည်း နယ်မြေအခြေအနေမတည်ငြိမ်မှုတွေကြောင့် စိုက်ဧကနည်းပါးပြီး သယ်ယူပို့ဆောင်ရေးခက်ခဲတဲ့အတွက် ဈေးကွက်ထဲကိုကြက်သွန်ဝင်ရောက်မှုလျော့နည်းကျဆင်းခဲ့တာဖြစ်တယ်လို့ ကုန်သည်တွေက ဆိုပါတယ်။

လက်ရှိအချိန်မှာ ဈေးကွက်အတွင်း ကြက်သွန်တစ်ပိဿာကို ငွေကျပ် ၅၀၀၀ ကနေ ၇၀၀၀ ကြားရှိနေပြီး ဒါဟာပြီးခဲ့တဲ့နှစ်က အလားတူကာလမှာရှိခဲ့တဲ့ဈေးနှုန်းထက် ၃ ဆနီးပါးမြင့်တက်ခဲ့တာဖြစ်ပါတယ်။

လင်းလင်း

Opinion Leaders မှ ကူးယူဖော်ပြပါသည်။

----------

သီးနှံပေါက်စျေးနှုန်းများ၊ အချိန်နှင့်တပြေးညီပြောင်းလဲနေသောသတင်းများကို ပိုမိုလေ့လာနိုင်ရန် ထွက်တိုးဆော့ဝဲလ်ကို ဒေါင်းထားပါ - https://htwettoe.com/download

ထွက်တိုး Telegram Channel ဝင်ရန် နှိပ်ပါ - https://t.me/htwettoe