မန္တလေးတိုင်းဒေသကြီးအတွက် မိုးလေဝသခန့်မှန်းချက်နှင့် အကြံပြုချက်

မန္တလေးတိုင်း မေလ ၂ ရက်မှ မေလ ၈ ရက်အထိ မိုးလေဝသအခြေအနေ ကြိုတင်ခန့်မှန်း 

လာမည့်ရက် သတ္တပါတ် ၁ ပါတ်အတွင်း မန္တလေးတိုင်းတခွင်လုံးနီးပါးမှာ မေလ ၄ ရက်နေ့ထိ မိုးဆက်ရွာနိုင်ပြီး မေလ ၅ ရက် မှ မေလ ၁၀ ရက်နေ့အထိ ခေတ္တမိုးပြတ်သွားနိုင်ပါတယ်။ အနောက်တောင်မုတ်သုံလေ အစပျိုးလာချိန် မေလ ၁၁ ရက်နောက်ပိုင်းမှာတော့ မိုးအနည်းငယ်ပြန်ရွာလာနိုင်ပါတယ်။ 

မေလ ၂ ရက် နဲ့ ၃ ရက်နေ့တွေမှာ မန္တလေးတိုင်းနဲ့ ရှမ်းပြည်နယ်တောင်ပိုင်း နယ်စပ်အနီး၊ မန္တလေးမြို့တောင်ဘက်ဒေသတွေနဲ့ ဝမ်းတွင်းမြို့အရှေ့ဘက် တောင်ပေါ်ဒေသ(ရွာငံ)တွေမှာ မိုးဆက်ရွာနေနိုင် မိုးများနေနိုင်ပါတယ်။ သဲတော+ဝမ်းတွင်းမြို့နဲ့ အနီးပါတ်ဝန်းကျင်ဒေသတွေမှာလဲ မိုးရေချိန် ၄၀ မီလီမီတာအထက်(၁ လက်မခွဲကျော်ခန့်)မိုးရွာနိုင် မိုးများနိုင်ပါတယ်။ 

မိုးဦးမကျမီ အချိန်အခါမဟုတ်မိုးရွာသွန်းခြင်း၊ မိုးတိမ်များဖြစ်ထွန်းပြီး မိုးအုံနေခြင်းတို့ကြောင့် မန္တလေးတိုင်းအတွင်းနေ့အပူချိန်များလျော့နည်းကျဆင်းနေနိုင်ပြီး အမြင့်ဆုံးအပူချိန် ၃၅°C နဲ့ အနိမ့်ဆုံးအပူချိန် ၂၄°C ခန့်ရှိနိုင်မည်ဖြစ်ကြောင်းခန့်မှန်းရပါတယ်။  

မိုးကျပြီးတဲ့နောက် လေထုစိုထိုင်းဆတွေ မြင့်တက်နေမှာကြောင့် ခံစားရတဲ့အပူချိန်(Apparent Temperature or Feels Like Temperature ကတော့ ၄၀°C အထက်မှာ ရှိနေနိုင်တာကြောင့် အခုလိုရာသီအကူးအပြောင်းကာလမှာ သက်ကြီးရွယ်အိုများနဲ့ ကလေးများအထူးသတိထားသင့်ပါတယ်။ 

Win Naing 

Administration Team, 

MMWEATHER, 

https://www.mmweather.org/home 

မန္တလေးတိုင်းဒေသကြီး ဂန္ဓမာပန်းစိုက်ပျိုးတောင်သူများအတွက် စိုက်ပျိုးရေးအကြံပေးချက် 

မန္တလေးတိုင်းဒေသကြီးအတွင်း ဂန္ဓမာပန်းစိုက်ပျိုးရာတွင် ပူနွေးစိုစွတ်လာသည်နှင့်အမျှ ဂန္ဓမာ အစက်အပြောက် ရောဂါများကျရောက်လေ့ရှိသည်။ မိုးစက်များနှင့်သွင်းရေများမှ တစ်ဆင့်ကူးဆက်တတ်သဖြင့်အောက်ဆုံး အရွက်မှစတင်၍ ဖြစ်ပေါ်တတ်သည်။ ရောဂါပြင်းထန်ပါက အရွက်များညှိုးနွမ်းသွားပြီး အပင်တွင် ကြာရှည်တွဲလဲရှိနေတတ်သည်။ ပန်းပွင့်များကိုပါ ကူးဆက်၍ အပွင့်များပုပ်စေပြီး အထွက်နှုန်းကို ထိခိုက်စေတတ်ပါသည်။ ကာကွယ်နှိမ်နင်းနည်းလမ်းများမှာ- 

၁။ ရောဂါရပင်ကြွင်းပင်ကျန်များကို ဖယ်ရှားပါ။ 

၂။ ရေအလွန်အကျွံသွင်းခြင်း ရှောင်ကြဉ်ပါ။ 

၃။ ရောဂါပြင်းထန်ပါက Mancozeb၊ Difenoconazole၊ Propiconazole၊ Thiophanate-methyl၊ Chlorothalonil ဓာတုဆေးတစ်မျိုးမျိုးဖြင့် ကာကွယ်နှမ်နင်းနိုင်ပါသည်။ 

ငါး/ပုစွန် ကန်များအတွက်အကြံပြုချက်   

• မန္တလေးတိုင်း မိုးရွာချိန် သတိပြုသင့်သည်များ -  
• မိုးရေတွင် အက်စစ်ပါသောကြောင့် ငါးမွေးကန်အတွင်း ရေချဉ်ဖန်နှုန်းကျတတ်ပါသည်။ 
• ကန်ပြင်ဆင်ချိန်တွင် ကန်အတွင်း ထုံးထည့်သွင်းခြင်းမရှိပါက ရေချဉ်ဖန်နှုန်းကျဆင်းခြင်းများလာပြီး ငါးများသေစေနိုင်သည့်အဖြစ် ရောက်ရှိပါသည်။ 
• ရေချဉ်ဖန်နှုန်း (၆) နှင့် (၆) အောက်ရောက်ရှိပါက မွေးမြူထားသော ငါးများသည် ကျန်းမာရေး မကောင်းခြင်း၊ အစာမစားခြင်းများ ရှိလာတတ်ပါသည်။ ထိုအချိန်တွင် အစာကျွေးပါကလည်း အစာမစားနိုင်ကြပါ။ 
• ထို့ကြောင့် ကန်ရေ၏ချဉ်ဖန်နှုန်း ကို နေ့စဉ် ဖြစ်စေ၊ (၃)ရက်တစ်ကြိမ်ဖြစ်စေ စစ်ဆေးပြီး ကန်ရေချဉ်ဖန်နှုန်း (၆)အောက်ရောက်နေပါက တစ်ဧက လျှင် ထုံး(၁၅)ပိဿာခန့် ထည့်သွင်းပေးရပါမည်။ 
• ထုံးထည့်သွင်းရာတွင်လည်း ကန်အတွင်း တိုက်ရိုက်ပက်ခြင်းကို မပြုလုပ်ရပါ။ ထုံးကို တစ်ညအိပ် ရေစိမ်ပြီးမှ နောက်တစ်နေ့မနက် (၈)နာရီခန့် နေပူချိန်တွင်ထည့်သွင်းပေးပါရန် တင်ပြအပ်ပါသည်။ 

--------------- 

မိုးလေဝသအဖွဲ့ဝင်ရန် - https://htwettoe.com/organization/12 

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို 

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်. 

သီးနှံပေါက်စျေးကြည့်ရှုနည်း_ https://htwettoe.com/post/50437