ဒူးရင်းစိုက်ပျိုးသူများ သတိထားရမည့် ဒူးရင်းပင်စည်ထိုးပိုး

ဒူးရင်းပင်စည်ထိုးပိုး ဆိုသည်မှာ Batocera rufomaculata ဟုခေါ်သော နှာတံရှည်ကျိုင်းကောင် တစ်မျိုးဖြစ်ပါသည်။ နှာတံရှည်ကျိုင်းကောင်အမျိုးအစား ရာနှင့်ချီရှိသည့်အနက် ဒူးရင်ပင်ကို အဓိက ဖျက်ဆီးစားသောက်တဲ့ နှာတံရှည်ကျိုင်းကောင်မှာ ၃-၄ စင်တီမီတာရှိပြီး မီးခိုးရောင်ကျောပေါ်တွင် လိမ္မော်ရောင်အစက် ၄ စက်နှင့် ဂုတ်ပေါ်တွင် ကျောက်ကပ်ပုံသဏ္ဍန် လိမ္မော်ရောင်အစက် ၂ စက် ပါရှိပါသည်။ အကောင်ကြီးအဆင့်တွင် ပင်စည်ကိုဖျက်ဆီးခြင်း မရှိနိုင်သော်လည်း အရွယ်ရောက် အမ အကောင်ကြီးမှ ဒူးရင်းပင်စည်အေခါက်ကို ဦးစွာ လှိုင်ခေါင်းသဖွယ်ဖောက်၍ သစ်ခေါက်အောက်တွင် ဥအုခဲ့ပါသည်။ ဥအုရာတွင် အကောင်ကြီး ၁ ကောင်လျှင် ဥ ၂၅၀ အထိ ဥအုနိုင်ကြသည့်အတွက် အကောင်ကြီးများတွေ့ရှိသည်နှင့် တပြိုင်နက် ကြိုတင်ကာကွယ်ပေးပါ။ ထို့နောက် ဥမှ ပေါက်ဖွားလာသော သားလောင်း ပိုးလောက်ကောင်သည် သစ်ခေါက်များကို စားသောက်ကာ ဒူးရင်ပင်၏ အစာကြောများထိခိုက်စေသည်အထိ ဖျက်ဆီး စားသောက် တတ်ကြပါသည်။ ပင်စည်အတွင်းလှည့်လည်စားသောက်ကာ ၎င်း၏ပိုးရုပ်ဖုံးကို ဒူးရင်း ပင်စည် အတွင်းပိုင်းတွင် ပြုလုပ်လေ့ရှိတတ်ကြပါသည်။ ဥအဆင့်တွင် ၇-၁၃ ရက်၊ ပိုးလောက်ကောင်အဆင့် မှာ ၁၇၀-၂၀၀ ရက်၊ ပိုးရုပ်ဖုံးအဆင့်မှာ ၂၀-၃၀ ရက် နှင့် အကောင်ကြီးအဆင့်မှာ ၆၀-၁၀၀ ရက်အထိ ကြာအောင် ရှင်သန်နေထိုင်သည့်အတွက် အထူးသတိပြုကာကွယ်သင့်သည့် ပိုးတစ်မျိုးဖြစ်ပါသည်။  

စားသောက်ဖျက်ဆီးထားသည့် လက္ခဏာများမှာ ပင်စည်အပြင်ပိုင်းတွင် အနည်းငယ်ဖုနေပြီး သစ်ခေါက်အနည်းငယ်ခွာကြည့်ပါက ပိုးချေးနှင့် သစ်မွစာများကို တွေ့ရှိရမည်ဖြစ်ပါသည်။ စားသောက်ဖျက်ဆီးရာ လမ်းကြောင်းကို တွေ့ရှိသည်နှင့် လမ်းကြောင်းတစ်လျှောက် လိုက်လံခွာကြည့်ကာ ပိုးလောက်ကောင်အားဖယ်ရှားခြင်း၊ ဆေးထိုးအပ်ဖြင့် ပိုးသတ်ဆေးများထိုးသွင်းခြင်းများ လုပ်ဆောင်ပေးရန်လိုအပ်ပါသည်။ ဖျက်ဆီးခံထားရသော ဒူးရင်းပင်မှာ ကိုင်းဖျားများစတင်ခြောက်လာပြီး နောက်ပိုင်းတွင် တစ်ပင်လုံးခြောက်ကာ သေသွားတတ်ကြပါသည်။  

ကာကွယ်နှိမ်နင်းနည်းလမ်းများမှာ -  

• ပိုးကျဖျက်ဆီးထားသော အပင်သေများရှိပါက ခြံနှင့်ဝေးရာသို့ ဖယ်ရှားဖျက်ဆီးပေးပါ။ 
• အကောင်ကြီး ကျိုင်းကောင်များအား မီးထောင်ခြောက်ဖြင့် ဖမ်းဆီးကာကွယ်ပါ။ 
• ပိုးဖောက်ရာလမ်းကြောင်းတွေ့ရှိသည်နှင့် အရွယ်ရောက်ကျိုင်းကောင်များ၏ဥအုခြင်းကို ကြိုတင် ကာကွယ်ရန် လျော့တိလျော့ရဲဖြစ်နေသော သစ်ခေါက်များကို ခြစ်ထုတ်ကာ ပိုးလောက်ကောင်အားဖယ်ရှားပါ၊ လမ်းကြောင်းအတွင်းသို့ ဒိုင်မီသိုရိတ်၊ ကာဗာရိုင် စသော ပိုးသတ်ဆေးများကို ရေနဲ့ရော၍ ထိုးသွင်းပေးပါ။ 
• ကျရောက်ဖျက်ဆီးမှုဆိုးဝါးပါက ကော့ပ်ဆိုက် (Copper oxychloride) ကို ရေဖြင့် ခပ်ပျစ်ပျစ်ဖျော်၍ ပင်စည်ပေါ်သို့ သုတ်လိမ်းပေးပြီးကြိုတင်ကာကွယ်ပေးပါ။ 

--------- 

ထွက်တိုး Telegram Channel ဝင်ရန် နှိပ်ပါ - https://t.me/htwettoe 

စိုက်ပျိုးရေးနှင့် ပတ်သတ်သော အခက်အခဲများကို တိုင်ပင်ဆွေးနွေး အကြံဥာဏ်ရယူလိုပါက ထွက်တိုး တောင်သူအကြံပေးဖုန်း- ၀၉၉၇၇၉၁၀၀၀၀ ကို ဆက်သွယ်နိုင်ပါတယ် သို့မဟုတ် ထွက်တိုးကို follow, Like, Share နှင့် Download လုပ်ထားပြီး -http://download.htwettoe.com/ ထွက်တိုးမေးဖြေကဏ္ဍတွင်ဝင်ရောက်မေးမြန်း နိုင်ပါ ကြောင်းသတင်းကောင်းပါလိုက်ပါတယ်။