ထူးခြားမိုးလေဝသ မြန်မာနိုင်ငံအပေါ် သက်ရောက်နိုင်သည့်အခြေအနေ ကြိုတင်ခန့်မှန်းခြင်း⭕⭕

(စက်တင်ဘာ ၁၉ ရက် ညနေ ၆ နာရီ ၃၀ မိနစ်

=====

ဖိလစ်ပိုင်ပင်လယ်မှ စတင်ပြီး အနောက်ဘက်-တောင်တရုတ်ပင်လယ်သို့ ရွေ့လျားဝင်ရောက်လာမည့် တိုင်ဖွန်းမုန်တိုင်း RAGASA (24W)

• ဖိလစ်ပိုင်ပင်လယ်မှာဖြစ်ပေါ်နေတဲ့ အပူပိုင်းမုန်တိုင်း RAGASA (24W)သည် အနောက်ဘက်ကို ဆက်လက်ရွေ့လျားပြီး ထိုင်ဝမ်ကျွန်းနှင့် ဖိလစ်ပိုင်နိုင်ငံမြောက်ပိုင်းမှ ဖြတ်သန်း၍ တောင်တရုတ်ပင်လယ်ထဲကို စက်တင်ဘာ ၂၂ ရက် နေ့လည်ပိုင်းမှာ စတင်ဝင်ရောက်လာနိုင်ပါမယ်။

• တောင်တရုတ်ပင်လယ်သို့ စတင်ဝင်ရောက်ချိန်မှာ CAT-3 တိုင်ဖွန်းမုန်တိုင်းအဆင့်ကို အားကောင်းလာပြီး အဲ့ဒီည တောင်တရုတ်ပင်လယ်အတွင်းရောက်ရှိတဲ့အချိန်မှာ ပိုမိုကျယ်ဝန်းတဲ့ရေပြင်ကြောင့် အားပိုကောင်းလာပြီး CAT-4 အဆင့် အားအလွန်ကောင်းသောတိုင်ဖွန်းမုန်တိုင်း VIOLENT TYPHOON ဖြစ်လာနိုင်ပါမယ်။

• JTWC ခန့်မှန်းချက်အရ အနောက်-အနောက်မြောက်ဘက်ကို ဆက်လက်ရွေ့လျားပြီး စက်တင်ဘာ ၂၄ ရက် မြန်မာအချိန် နေ့လည်ပိုင်းမှာ တရုတ်ပြည်ကမ်းခြေကို ဟောင်ကောင်ရဲ့ အနောက်ဘက်မှ CAT-3 တိုင်ဖွန်းမုန်တိုင်းအဆင့်(လေတိုက်နှုန်း တနာရီ ၁၁၅ မိုင်နှုန်းဖြင့်)ဖြတ်ကျော်ဝင်ရောက်နိုင်မယ်လို့ ခန့်မှန်းထားပါတယ်။

• ဥရောပ ECMWF Model ခန့်မှန်းချက်မှာတော့ ဟောင်ကောင်အနောက်ဘက် တရုတ်ပြည်ကမ်းခြေအတိုင်း အနောက်ဘက်ကို ရွေ့လျားပြီး၊ ဟိုင်နန်ကျွန်းကိုဦးစွာဖြတ်ကျော်ဝင်ရောက်ပြီးမှ တုံကင်ပင်လယ်ကွေ့မှတဆင့် ဗီယက်နမ်ကမ်းခြေကို စက်တင်ဘာ ၂၅ ရက်နေ့ည၊ ၂၆ ရက်နေ့အစောပိုင်းမှာ မြေပုံညွှန်းမှတ် 20.293, 106.556 မှ ဖြတ်ကျော်ဝင်ရောက်နိုင်မယ်လို့ ခန့်မှန်းထားပါတယ်။

• မုန်တိုင်းရဲ့ လက်ရှိအရွယ်အစား အချင်းမိုင် ၂၅၃ မိုင်ခန့်(220 nautical miles)ရှိနေပြီး၊ တောင်တရုတ်ပင်လယ်ထဲကို ဝင်လာပြီးတဲ့အခါ အရွယ်အစား(အချင်းမိုင်)ပိုမိုကြီးမားလာနိုင်ပါမယ်။

မြန်မာနိုင်ငံဘက်တွင် မုတ်သုံမိုးနှင့်မုန်တိုင်းအကြွင်းအကျန်သက်ရောက်နိုင်မည့်အခြေအနေ ကြိုတင်ခန့်မှန်းချက်

လက်ရှိအချိန်အထိ ရရှိပြီး ကြိုတင်ခန့်မှန်းချက်များအရ - 

• တိုင်ဖွန်းမုန်တိုင်းအရှိန်သက်ရောက်မှုနှင့် ဘင်္ဂလားပင်လယ်အော်မှာ စက်တင်ဘာ ၂၅/၂၆ ရက်နေ့များတွင် အားပိုကောင်းလာနိုင်သော မုန်တိုင်းငယ်၏သက်ရောက်မှုနှင့် အားကောင်းလာသည့် အနောက်တောင်မုတ်သုံလေတို့ ကြောင့် ရခိုင်ကမ်းရိုးတန်းတလျှောက်နှင့် ဧရာဝတီမြစ်ဝကျွန်းပေါ်ကမ်းရိုးတန်း၊ မွန်-တနင်္သာရီကမ်းရိုးတန်းတလျှောက်မှာ မိုးသက်လေပြင်းကျနိုင်ပြီး လှိုင်းကြီးနိုင်ပါမယ်။ မိုသက်လေပြင်းကျစဉ် ရေပြင်မြေပြင်လေတိုက်နှုန်း တနာရီ မိုင် ၃၀ မှ မိုင် ၄၀ ခန့်နှင့်၊ လှိုင်းအမြင့် ၉ ပေမှ ၁၁ ပေခန့်အထိ ရှိနိုင်ပါမယ်။ 

• စက်တင်ဘာ ၁၈ ရက်နေ့က ကမ်းနီးပင်လယ်ပြင်ရေလုပ်သားများသို့ အသိပေးခြင်း၊ သတိပေးခြင်း ကြိုတင်ထုတ်ပြန်ပေးခဲ့ပြီးဖြစ်ပါတယ်။

 https://www.facebook.com/uwinnaing/posts/pfbid025t3sigQzGRAKR71mCV1ZHQMtQJaReyFX8seMoJBeKWEX87iGDdjRXdGqJBzqo56Gl

• #မုန်တိုင်းအကြွင်းအကျန်များနှင့် အားကောင်းလာနိုင်မည့်မုတ်သုံမိုးတို့ကြောင့် ရခိုင်ပြည်နယ်၊ ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ ရှမ်းပြည်နယ်၊ ကယားပြည်နယ်၊ ကရင်ပြည်နယ်၊ မွန်ပြည်နယ်၊ တနင်္သာရီတိုင်းတွေမှာ မိုးအသင့်အတင့်မှ မိုးများနိုင်ပါမယ်။ 

• #ကျန်ပြည်နယ်တိုင်းတွေမှာလည်း မိုးအနည်းငယ်မှ မိုးအသင့်အတင့်ရွာနိုင်ပါမယ်။ မြန်မာနိုင်ငံအထက်ပိုင်း ကချင်ပြည်နယ်၊ စစ်ကိုင်းတိုင်းအထက်ပိုင်း၊ မကွေးတိုင်း၊ မန္တလေးတိုင်း၊ ချင်းပြည်နယ်နဲ့ ရှမ်းပြည်နယ်မြောက်ပိုင်းတွေမှာတော့ ဒီမုန်တိုင်း ၁ လုံးကြောင့် မိုးများနိုင်ချေလျော့နည်း(မိုးရေချိန်ရရှိနိုင်မှုလျော့နည်း)ပြီး ခေတ္တမျှ မိုးသည်းထန်နိုင်တာတော့ ရှိပါမယ်။

#မုန်တိုင်း RAGASA ဗီယက်နမ်ကမ်းခြေကို ဖြတ်ကျော်ဝင်ရောက်နိုင်မည့်လမ်းကြောင်းအခြေအနေပေါ်မူတည်ပြီး မြန်မာနိုင်ငံအတွင်း မိုးများနိုင်/မိုးအလွန်များနိုင်မည့်ဒေသတွေကို ဆက်လက်စောင့်ကြည့်တင်ပြပေးသွားပါမယ်။

Source: မိုးလေဝသပညာရှင် ဦးဝင်းနိုင်

---   

မိုးလေဝသအဖွဲ့ဝင်ရန် - https://htwettoe.com/organization/12   

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို   

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်.   

သီးနှံပေါက်စျေးကြည့်ရှုနည်း_ https://htwettoe.com/post/50437