အော်ဂဲနစ်ပိုးသတ်ဆေးများသည် အပင်ဖွံ့ဖြိုးမှုနှင့် လူသားများကို ထိခိုက်စေပါသလား?

အော်ဂဲနစ်ပိုးသတ်ဆေးဆိုတာနဲ့ အရာရာတိုင်းကို ဥုံဖွ ပျောက်စေ၊

ပိုးတွေပဲသေ‌စေ၊

ကျန်တာ‌တော့ ဘေးကင်းသဟဆိုတဲ့ ဆေးများ မဟုတ်ပါဘူး။

သူလဲပုထုဇဥ်မို့ Dark side တွေ ရှိပါတယ်။

၎င်းတို့ကို ဖျက်ပိုးများဒဏ်မှ ကာကွယ်နှိမ်နှင်းရန်အတွက် သဘာဝပစ္စည်းများကို အခြေခံထုတ်လုပ်ထား​ပေမယ့် ၎င်းတို့သည် သီးနှံအပင်များ၏ ဖွံ့ဖြိုးမှု၊ လုပ်သားများနှင့် စားသုံးသူများကို နည်းလမ်းအမျိုးမျိုးဖြင့် ထိခိုက်စေနိုင်တာတွေ ရှိပါတယ်။

• ကမ္ဘာ့ထင်ရှားသော ဖြစ်ရပ်များအနေဖြင့် ၂၀၁၈ ခုနှစ် - အိန္ဒိယနိုင်ငံ၌ အော်ဂဲနစ်ခရမ်းချဉ်သီးများစားသုံးပြီး အဆိပ်သင့်ခဲ့ပြီး၊ အကြောင်းရင်းမှာ ဆေးဂန္ဓမာ (Pyrethrin)ပိုးဆေး အလွန်အကျွံအသုံးပြုခဲ့သည့်အပြင်၊ ဆေးဖျန်းပြီး ၂၄ နာရီအတွင်း ခူးဆွတ်စားသုံးခြင်းကြောင့် လူ ၁၂ ဦး ဆေးရုံတင်ခဲ့ရသည်။

• ၂၀၁၉ ခုနှစ်တွင် အမေရိကန်နိုင်ငံ၌ အော်ဂဲနစ်ဟင်းသီးဟင်းရွက်များမှ Rotenone residue များကို ကလေး ၃ ဦးတွင် ဓာတ်မတည့်မှုဖြစ်ပွားခဲ့ပါသည်။

• ထို့ပြင် တမာဆီ + ဆပ်ပြာရည် ရောစပ်ဆေး ဆေးပြင်းအား အလွန်များခြင်းကြောင့် အော်ဂဲနစ်ဂေါ်ဖီထုပ်များစားသုံးမိပြီး မိသားစုအဆိပ်သင့်ခြင်း၊

• ငရုတ်သီးဆေး + ကြက်သွန်ဖြူဆေးဖျန်းထားသော အော်ဂဲနစ်သခွားသီးများစားသုံးပြီး ယားယံခြင်းများ ဖြစ်ပေါ်ခဲ့ကြပါသည်။

‌အော်ဂဲနစ်စိုက်ပျိုးရေးကိုအားပေးသော ဂျပန်၊ ကိုရီးယားကဲ့သို့ နိုင်ငံများ၌ပင် အော်ဂဲနစ်မြေသြဇာများ၊ ပိုးသတ်ဆေးများကို ပြုလုပ်ခြင်း၊ ကိုင်တွယ်ခြင်းများ ဆောင်ရွက်ရာ၌ ဓာတုသွင်းအားစုများကို အသုံးပြုသကဲ့သို့ အထူးဂရုစိုက်ကြရပါတယ်။

အော်ဂဲနစ်ပိုးသတ်ဆေးများ၏ သီးနှံပင်များနဲ့ လူသားများအပေါ် ဆိုးကျိုးများကို ဖော်ပြပါ့မယ်။

(က) အဆိပ်သင့်မှုများ (Phytotoxic Effects)

၁။ အရွက်များပျက်စီးခြင်း

· လက္ခဏာ- အရွက်အရောင်ပြောင်းခြင်း၊ အရွက်လောင်ကျွမ်းခြင်း

· ဖြစ်ပွားစေသောဆေးများ- ဆေးပြင်းလွန်းသော တမာဆေး၊ ဆပ်ပြာ၊ အရက်ပြန်ပါဝင်မှုများသောဆေး (ငါးအမိုင်နိုအက်ဆစ် နှုန်းထားများပါကလည်း လောင်ကျွမ်းနိုင်သည်)

၂။ အမြစ်ကြီးထွားမှု နှေးကွေးခြင်း

· လက္ခဏာ- အမြစ်ဖွံ့ဖြိုးမှု ရပ်တန့်ခြင်း၊ အပင်ကြီးထွားမှု တန့်သွားခြင်း၊ ရေငတ်သည့် လက္ခဏာတွေ့ရခြင်း

· ဖြစ်ပွားစေသောဆေးများ- ဆေးရွက်ကြီးပိုးသတ်ဆေးနှုန်းထား ပြင်းခြင်း၊ မြေဆီလွှာသို့ စိမ့်ဝင်နိုင်သော ဆေးများ၊ မြေသားအတွင်းလောင်းထည့်သော ဆေးများ

၃။ မျိုးစေ့အညှောက်ပေါက်နှုန်း ကျဆင်းခြင်း

· လက္ခဏာ- မျိုးစေ့များ အညှောက်မပေါက်ခြင်း

· ဖြစ်စေသောဆေးများ- မျိုးစေ့စိမ်ရာ၌ နှုန်းထားပြင်းလွန်းခြင်း၊ ဆေးစိမ်ချိန်ကြာမြင့်သွားခြင်း

(ခ) အပင်များ၏ ဇီဝဖြစ်ပျက်မှုဆိုင်ရာ သက်ရောက်မှုများ (Metabolic Effects)

၁။ ဓာတုဖွဲ့စည်းမှု ပြောင်းလဲခြင်း

· လက္ခဏာ- အပင်အတွင်း ဓာတ်ပစ္စည်းများ ပြောင်းလဲခြင်း

· ဥပမာ- ပရိုတင်းဓာတ်၊ ကစီဓာတ်များ ပြောင်းလဲခြင်း

၂။ ဇီဝရုပ်ဖြစ်ပျက်မှု ကမောက်ကမဖြစ်ခြင်း

· လက္ခဏာ- အပင်ကြီးထွားမှု ရပ်တန့်ခြင်း၊ အရွက်များဗိုင်းရပ်ကျသကဲ့သို့ တွန့်လိမ်ခြင်း၊ မချောမွေ့ခြင်း

· ဥပမာ- နီကိုတင်းပါသော ဆေးများ

၃။ အပင်ဟော်မုန်းများ ဟန်ချက်ပျက်ခြင်း

· လက္ခဏာ- အပင်ကြီးထွားမှု မူမမှန်ခြင်း၊ ပန်းပွင့်ချိန်ပြောင်းလဲခြင်း၊ အသီးကြွေခြင်း

· ဥပမာ- ဟော်မုန်းများကို အနှောင့်အယှက်ပေးသော ဆေးများ

(ဂ) မြေဆီလွှာကျန်းမာရေးအပေါ် သက်ရောက်မှု

၁။ မြေဆီလွှာအဏုဇီဝများ လှုပ်ရှားမှုနှေးကွေးခြင်း

· လက္ခဏာ- မြေဆီလွှာဇီဝရုပ်ဖြစ်ပျက်မှု နှေးကွေးခြင်း

· ဥပမာ- တမာပိုးသတ်ဆေး၊ ကြက်သွန်ဖြူပိုးသတ်ဆေး၊ မြေဆီလွှာနှင့် ရိုးပြတ်များ၌ ကြွင်းကျန်နိုင်သော ဆေးများ

(ဃ) အကျိုးပြုအင်းဆက်များအပေါ် သက်ရောက်မှု

၁။ ဝတ်မှုန်ကူးခြင်းလုပ်ငန်းစဉ်ကို ထိခိုက်ခြင်း

· လက္ခဏာ- အသီးအပွင့် နည်းပါးခြင်း

· ဥပမာ- ပျားများကို ထိခိုက်စေသော ဆေးများ (တမာ)၊ အနံ့ပြင်းလွန်းသောဆေးများ၊ ပန်းပွင့်ချိန်၌ ဆေးဖျန်းမိခြင်း

၂။ သဘာဝပိုးမွှားထိန်းချုပ်မှု စနစ်ပျက်စီးခြင်း

· လက္ခဏာ- ဖျက်ပိုးများ ပိုမိုတိုးပွားလာခြင်း

· ဥပမာ- အကျိုးပြုပိုးများကိုပါ သေစေသောဆေးများ

(င) လုပ်သားများကို ထိခိုက်စေနိုင်သော အော်ဂဲနစ်ပိုးသတ်ဆေးများ

၁။ ဆေးဂန္ဓမာ (Pyrethrin) ပိုးသတ်ဆေး

· အန္တရာယ်- အသက်ရှူလမ်းကြောင်း ယားယံခြင်း၊ အရေပြားယားယံခြင်း

· လက္ခဏာ- မျက်လုံးနီရဲခြင်း၊ အသက်ရှူကြပ်ခြင်း

· ကာကွယ်နည်း- မျက်မှန်နှင့် လက်အိတ်ဝတ်ဆင်ပါ

၂။ ဆေးရွက်ကြီး နီကိုတင်းဆေး (Nicotine Sulfate)

· အန္တရာယ်- အာရုံကြောစနစ်ကို ထိခိုက်ခြင်း

· လက္ခဏာ- ခေါင်းမူး၊ အန်ခြင်း၊ အသက်ရှူကြပ်ခြင်း

· ကာကွယ်နည်း- အကာအကွယ်သုံံးပါ၊ အလွန်အကျွံမသုံးပါနှင့်

၃။ ကျီးသတ်ပင်၊ ဟုန်းပင်များမှ ထုတ်ယူသည့် (Rotenone) ပိုးသတ်ဆေးး

· အန္တရာယ်-အသက်ရှူလမ်းကြောင်းကို ထိခိုက်ခြင်း

· လက္ခဏာ- ပျို့အန်ခြင်း၊ အရေပြားယားယံခြင်း

· ကာကွယ်နည်း- လေဝင်လေထွက်ကောင်းသောနေရာတွင် ဖျန်းပါ

အော်ဂဲနစ်ပိုးသတ်ဆေးများသည် သဘာဝကို အခြေခံထုတ်လုပ်ထားသော်လည်း မှန်ကန်စွာအသုံးမပြုပါက သီးနှံအပင်များ၏ ဖွံ့ဖြိုးမှုနှင့် လုပ်သားများကိုပါ ထိခိုက်စေနိုင်ကြောင်း အထူးဂရုပြုရမည် ဖြစ်ပါသည်။ နှုန်းထား မှန်မှန်ကန်ကန်သုံးပါ၊ ​ဆေးများကို မိမိသ​ဘောဖြင့် မ​ရောစပ်သင့်ပါ၊ လုပ်သားများ အကာအကွယ်ဖြင့် ဖျန်းပါ၊ ခူးဆွတ်ခါနီးတွင် မဖျန်းသင့်ပါ။ ယခုပိုစ့်သည် အော်ဂဲနစ်ပိုးသတ်ဆေးများအသုံးပြုခြင်းကို တားမြစ်ခြင်းမဟုတ်ဘဲ၊ စနစ်တကျ ဂရုတစိုက်အသုံးပြုစေရန် ဝေမျှခြင်းသာ ဖြစ်ပါသည်။

Dr.Wunna Htoon - ဒေါက်တာဝဏ္ဏထွန်း

---

ထွက်တိုး Telegram Channel ဝင်ရန် နှိပ်ပါ - https://t.me/htwettoe

စိုက်ပျိုးရေးနှင့် ပတ်သတ်သော အခက်အခဲများကို တိုင်ပင်ဆွေးနွေး အကြံဥာဏ်ရယူလိုပါက ထွက်တိုး တောင်သူအကြံပေးဖုန်း- ၀၉၉၇၇၉၁၀၀၀၀ ကို ဆက်သွယ်နိုင်ပါတယ် သို့မဟုတ် ထွက်တိုးကို follow, Like, Share နှင့် Download လုပ်ထားပြီး -https://htwettoe.com/download ထွက်တိုးမေးဖြေကဏ္ဍတွင်ဝင်ရောက်မေးမြန်းနိုင်ပါကြောင်းသတင်းကောင်းပါလိုက်ပါတယ်။