ရှမ်းပြည်နယ် နိုဝင်ဘာ ၂၂ ရက် မှ နိုဝင်ဘာ ၂၈ ရက်အထိ မိုးလေဝသအခြေအနေ

ပင်လယ်ပြင်မှ ထူးခြားသည့်မိုးလေဝသအခြေအနေ 

·          ကပ္ပလီပင်လယ်ပြင်တောင်ပိုင်း၊ မာလက္ကာရေလက်ကြားတွင် စတင်ဖြစ်ပေါ်လျှက်ရှိသည့် INVEST-95B သည် နိုဝင်ဘာ ၂၂ ရက်နေ့တွင် လေဖိအားနည်းရပ်ဝန်းအဖြစ်လည်းကောင်း၊ နိုဝင်ဘာ၂၄ ရက်နေ့တွင် အားကောင်းသောလေဖိအားနည်းရပ်ဝန်းအဖြစ် ပိုမိုအားကောင်းလာကာ၊ နိုဝင်ဘာ ၂၆ ရက်မှ ၂၇ ရက်အတွင်း မုန်တိုင်းငယ်၊ ဆိုင်ကလုန်းမုန်တိုင်း SENYAR အဖြစ်ရောက်ရှိလာနိုင်ပါတယ်။ 

·          မူလလမ်းကြောင်းကြိုတင်ခန့်မှန်းချက်များအရ ဘင်္ဂလားပင်လယ်အော်တောင်ပိုင်းတွင် အနောက်-အနောက်မြောက်ဘက်သို့ ဆက်လက်ရွေ့လျားပြီး ဒီဇင်ဘာလ ၁ ရက်နေ့တွင် ဩရိဿပြည်နယ်ကမ်းခြေ Bhubaneshwar မြို့အနီးမှကုန်းတွင်းသို့ဖြတ်ကျော်ဝင်ရောက်နိုင်ကြောင်းခန့်မှန်းရပါတယ်။ 

·          မုန်တိုင်းအကြွင်းအကျန်များဆက်လက်ရွေ့လျားနိုင်မည့်လမ်းကြောင်းအရ ရခိုင်ပြည်နယ်မြောက်ပိုင်းနဲ့ ချင်းပြည်နယ်တို့တွင် မိုးအနည်းငယ်ရွာသွန်းနိုင်ပြီး ကျန်ပြည်နယ်/တိုင်းဒေသများတွင် မိုးရွာနိုင်မည့်အခြေအနေမရှိပါ။ 

ယခု ၁ ပတ်အတွင်း ရှမ်းပြည်နယ်တွင်မိုးရွာသွန်းနိုင်မည့်အခြေအနေ 

·          ရှမ်းပြည်နယ်တွင် မိုးရွာသွန်းနိုင်သည့်အခြေအနေမရှိပါ 

အပူချိန်၊ လေတိုက်နှုန်း၊ လေထုစိုထိုင်းဆနှင့် လေထုညစ်ညမ်းမှုအခြေအနေ 

·          ယခု ၁ ပတ်အတွင်း - ရှမ်းပြည်နယ်မြောက်ပိုင်းမှာ အမြင့်ဆုံးနေ့အပူချိန် ၂၃°C ရှိနိုင်ပြီး အနိမ့်ဆုံးညအပူချိန် ၁၃°C ခန့် ရှိနိုင်ပါတယ်။ 

·          ရှမ်းပြည်နယ်တောင်ပိုင်းမှာ အမြင့်ဆုံးနေ့အပူချိန် ၂၄°C ရှိနိုင်ပြီး အနိမ့်ဆုံးညအပူချိန် ၁၀°C ခန့် ရှိနိုင်ပါတယ်။ 

·          ရှမ်းပြည်နယ်အရှေ့ပိုင်းမှာ အမြင့်ဆုံးနေ့အပူချိန် ၂၉°C ရှိနိုင်ပြီး အနိမ့်ဆုံးညအပူချိန် ၂၁°C ခန့် ရှိနိုင်ပါတယ်။ 

·          ရှမ်းပြည်နယ်တခွင်မှာ ယခု ၁ ပတ်အတွင်း အရှေ့ဘက်နှင့် အရှေ့မြောက်ဘက်အရပ်များမှ လေတိုက်နှုန်းအမြင့်ဆုံး တနာရီ ၅ မိုင်ခန့်ရှိနိုင်ပါတယ်။ 

·          ရှမ်းပြည်နယ်အရှေ့ပိုင်းမှာ နေ့လည်ပိုင်းလေထုစိုထိုင်းဆ ၄၀% ဝန်းကျင် ရှိနိုင်ပြီး၊ ညနေပိုင်း/ညပိုင်းနဲ့ မနက်အစောပိုင်းအချိန်တွေမှာ ၈၀% ရှိနိုင်ပါတယ်။ 

·          ရှမ်းပြည်နယ်မြောက်ပိုင်းနဲ့ တောင်ပိုင်းတွေမှာတော့ နေ့လည်ပိုင်းလေထုစိုထိုင်းဆ ၅၀% ခန့် ရှိနေနိုင်ပြီး ညနေပိုင်း၊ ညပိုင်းနဲ့ မနက်အစောပိုင်းအချိန်တွေမှာ ၁၀၀% ရှိနေနိုင်ပါမယ်။ 

·          နေ့လည်ပိုင်းလေထုစိုထိုင်းဆမြင့်မားတဲ ဒေသတွေမှာ ခံစားရတဲ့အပူချိန် (Feels Like Temperature) က ၂၈°C ခန့်ရှိနေနိုင်ပါမယ်။ 

·          ရှမ်းပြည်နယ်တောင်ပိုင်း တောင်ကြီးမြို့ရဲ့ လေထုညစ်ညမ်းမှုအခြေအနေ (AQI Value) သည် 50 ရှိနိုင်ပြီး ရှမ်းပြည်နယ်အရှေ့ပိုင်း တာချီလိတ်မှာ 80 ရှိနိုင်ပါတယ်၊ ရှမ်းပြည်နယ်မြောက်ပိုင်းမှာ 30 ဝန်းကျင်သာရှိနိုင်ပြီး လေထုညစ်ညမ်းမှုအညွှန်းကိန်း အနည်းဆုံးဖြစ်ပါမယ်။ 

·          ရှမ်းပြည်နယ်တခုလုံးမှာ ယခုတပတ်အတွင်း လေထုညစ်ညမ်းမှုအန္တရာယ် မရှိပါ။ 

Win Naing 

Administration Team, 

MMWEATHER,  

ရှမ်းပြည်နယ်အတွင်း မုန်ညင်း/မုန်လာစိုက်ပျိုးတောင်သူများအတွက် စိုက်ပျိုးရေးအကြံပေးချက် 

ရှမ်းပြည်နယ်အတွင်း မုန်ညင်း/မုန်လာစိုက်ပျိုးတောင်သူများအနေဖြင့် စိန်ကွက်ဖလံပိုး ကြိုတင်ကာကွယ်နိုင်စေရန် အကြံပြုချက် 

မုန်ညင်း/မုန်လာများတွင် စိန်ကွက်ဖလံ ပိုးကျရောက်ပါက လောက်ကောင်အဆင့်မှာ အရွက်၏ အပြင် ပိုင်းအလွှာတို့ကို စားသုံးပြီး သေးငယ်သောအပေါက်ငယ်တွေ ဖြစ်ပေါ်လာပါသည်။ လောက်ကောင်ကြီး လာသည်နှင့်အမျှ ပိုကြီးမားတဲ့ အပေါက်တွေ ဖြစ်လာစေကာ အရည်အသွေးကျဆင်းပြီး ရောင်းတန်း မဝင်ခြင်းများဖြစ်ပေါ်စေပါသည်။

စိန်ကွက်ဖလံပိုးကို ကာကွယ်နှိမ်နင်းနည်းလမ်းများမှာ - 

• နိုက်ထရိုဂျင်(ပုလဲ) ပမာဏ အလွန်အကျွံ အသုံးပြုခြင်းကို ရှောင်ပါ။ 
• ပိုးကျနေသော အရွက်များကို ဖယ်ရှားပါ။ 
• ခိုအောင်းရာပေါင်းမြက်များအားဖယ်ရှားရှင်းလင်းပေးပါ။ 
• ဓာတုဆေးများဖြင့် ကာကွယ်နှိမ်နင်းလိုပါက Emamectin Benzorate Lambda cyhalothrin  
• Indoxacarb၊ Cypermethrin ကဲ့သို့သောဆေးအဆိပ်များပါဝင်သည့် ပိုးသတ်ဆေး တစ်မျိုးမျိုးကို အသုံးပြု၍နှိမ်နင်းနိုင်ပါသည်။ 

 ငါး/ပုစွန် ကန်များအတွက်အကြံပြုချက် 

ဒီတစ်ပတ်မှာ အအေးပိုလာနိုင်တာမို့ ငါး/ပုစွန်မွေးတောင်သူကြီးများအနေဖြင့် အောက်ပါအချက်တွေကို ဆောင်ရွက်ဖို့ အကြံပြုလိုပါတယ်ခင်ဗျာ 

• ငါးများ စိတ်ဖိစီးပြီး ရောဂါဝင်လာနိုင်တာမို့ ခုခံအားကောင်းစေတဲ့ အစာများကျွေးရန်၊ 
• ဗိုက်တာမင်စီဓါတ်ပါသော အစာများကိုထည့်ကျွေးရန်၊ 
• အနီစက်ကဲ့သို့သော ဘက်တီးရီးယားရောဂါများကျရောက်လျှင် အစား တစ်ကီလိုဂရမ်တွင် အောက်ဆီ တက်ထွာဆိုဒ်ကလင်း (Oxytetracycline) သို့မဟုတ် အီရီသရိုမိုင်စင် (Erythromycin) သို့မဟုတ် ဆာဖာ မီသောက်ဇိုး (sulfamethoxazole)ကို ၃ ဂရမ်မှ ၅ ဂရမ်အထိ ထည့်ကျွေးပေးရန်၊ 

----------- 

မွေးမြူရေးနှင့် ကုသရေးပညာရှင် - ဒေါက်တာစောထွန်းထွန်း 

🔗 ဉာဏ်စမ်းဖြေဆိုရန် လင့် - https://htwettoe.com/post/59297 

🔗 ဆော့ဝဲလ်ဒေါင်းရန် – https://download.htwettoe.com 

🔗 ထွက်တိုးဆော့ဝဲလ်ရှိ မွေးမြူရေးဂရု – https://htwettoe.com/organization/4 

🔗 FB မွေးမြူရေးတောင်သူများဂရု – https://www.facebook.com/groups/4200052776702483