တနှစ်အတွင်း ကြက်ကောင်ရေများများရအောင် လုပ်ဆောင်နည်းများ (၂)

#ကြက်ကလေးများကိုစောစောသားခွဲပေးခြင်း

·      သာမန်အားဖြင့် ကြက်မတကောင်သည် ကြက်ကလေးများကို ၂လခန့်သားထိန်းပီးမှ ပြန်လည်ဥအုလေ့ရှိ သည်။ သားထိန်းရက်ကြာလေ နောက်တကြိမ်ပြန် အုခြင်းနောက်ကျ မည်ဖြစ်သည်။

·      ထို့ကြောင့် ကြက်မကို (၁) လအထိသာ သားထိန်းခိုင်းပီး ၁ လကျော်ပါက သားခွဲပေးခြင်းအားဖြင့် ထိုကြက် မသည် ဥ စောစောပြန်အုမည်ဖြစ်သည်။

·      ကြက်မကို ကြက်ကလေးများ၏အသံမကြားနိုင်သည့်ဝေးသော နေရာတွင် တွင်လှောင်ထားပီး အစာနှင့်ရေ ပေးထား ပါက တပတ်ခန့်အကြာတွင်ပြန်လည် ဥအုမည်ဖြစ်သည်။

·      ကြက်ကလေးများမှာ အသက်(၁)လရှိပီဖြစ်သဖြင့် အမွေးအတောင်အတော်စုံပီဖြစ်ခြင်း၊မိမိလက်ရှိနေ နေ သောနေရာ ဖြစ်သဖြင့် အစာကိုအလွယ်တကူ ရှာစားနိုင်ခြင်း တို့ကြောင့် ဆက်လက်ရှင်သန်ကြီးထွားမည်  ဖြစ်သည်။

·      သတိပြုရန်မှာ ကြက်ကလေးများကို လက်ရှိနေရာမှ အဝေးသို့သွားမထားရပါ။

#သားတင်နှုန်းမကောင်းသည့်အချိန်ကို ရှောင်ပီးသားဖောက်ခြင်း

·      မြန်မာနိုင်ငံတွင်ရာသီဥတု ၃ မျိုးရှိသည့်အနက် ကြက်သားပေါက်ကလေးများ သေဆုံးမှုအများဆုံးရာသီ သည် မိုးရာသီဖြစ်ပါသည်။

·      မိုးရာသီတွင်မိုးရေစိုသောကြောင့် ပေါက်ခါစကြက်များအအေးမိခြင်း၊ ကြက်မကြီးမှဝပ်ပေးသော် လည်း မြေကြီးအောက်မှ အစိုဓါတ်ရှိနေသောကြောင့် အအေးမိသဖြင့် မိုးရာသီတွင် ကြက်ကလေးများ သေဆုံးမှု များပါသည်။

·       ထို့ကြောင့် မိုးရာသီရောက်ချိန်တွင် ကြက်များကိုသားမဖောက်တော့ဘဲ ဥများကို ရောင်းစားခြင်းက ပိုမို အကျိုးရှိပါသည်။

·      သို့သော် မိုးမှန်သွားချိန်တွင် ကြက်ကလေး အသက် (၁) လရှိနှင့်ပီးဖြစ်ပါက အမွေးအတောင်များအတော်စုံ ပီးဖြစ်သဖြင့် သေဆုံးနိုင်ခြေနည်းပါသည်။ တွက်ချက်မှုအရ ကြက်မများသည် ဧပြီလ နောက်ဆုံးထားပီး စတင်ဝပ်ပါကပေါက်လာသောကြက်ကလေးများသည်မိုးမှန်သွားချိန်တွင်အသက်၁လခန့်ရှိနိုင်ပါသည်။

#မိုးရာသီတွင်သားပေါက်ပါက လှောင်အိမ်ထဲအနွေးပေးပီးမွေးသည့်နည်း

·      အကြောင်းအမျိုးမျိုးကြောင့် မိုးရာသီတွင် ကြက်ကလေးများပေါက်ပါက သေနိုင်ခြေများသဖြင့်သေနှုန်း အနည်းဆုံးဖြစ်စေရန် လှောင်အိမ်ထဲထည့်မွေးသည့်နည်းဖြစ်သည်။

·      ခြေတံပါသော လှောင်အိမ်ကိုဆောက်ထားပြီး ကြက်ကလေးများပေါက်လာပါက ကြက်မနှင့်အတူကြက် ကလေးများကို လှောင်အိမ်ထဲထည့်ပြီး အစာကျွေး၊ရေတိုက်ခြင်း ဖြစ်သည်။ ကြက်မကို တပတ်သာ ကြက်ကလေးများနှင့်အတူထားပြီး တပတ်ကျော်ပါက ကြက်မကို အပြင်ထုတ်ကာ ကြက်ကလေးများကို လှောင်အိမ်ထဲ အသက် (၁) လရသည်အထိ ဆက်မွေးထားပြီး အသက်(၁) လကျော်ပါက အပြင်သို့လွတ် မွေးခြင်းအားဖြင့် ကြက်ကလေးများ သေဆုံးမှုနည်းသွားမည်ဖြစ်သည်။

·      လှောင်အိမ်တွင် ပလပ်စတစ် အကာများပါရှိသဖြင့်အေးပါက ပလပ်စတစ်ကို ချထားခြင်းအားဖြင့်ကြက် ကလေးများ အအေးမိခြင်းမှ ကာကွယ်နိုင်ပါသည်။

----------

မွေးမြူရေးနှင့် ကုသရေးပညာရှင် - ဒေါက်တာစောထွန်းထွန်း

🔗 ဉာဏ်စမ်းဖြေဆိုရန် လင့် - https://htwettoe.com/post/59537

🔗 ဆော့ဝဲလ်ဒေါင်းရန် – https://download.htwettoe.com

🔗 ထွက်တိုးဆော့ဝဲလ်ရှိ မွေးမြူရေးဂရု – https://htwettoe.com/organization/4

🔗 FB မွေးမြူရေးတောင်သူများဂရု – https://www.facebook.com/groups/4200052776702483