ပဲခူးတိုင်း စက်တင်ဘာလ ၂၃ ရက် မှ စက်တင်ဘာလ ၂၉ ရက်အထိ မိုးလေဝသအခြေအနေ

အရှေ့/အနောက်ပင်လယ်ပြင်တို့မှ ထူးခြားသောမိုးလေဝသအခြေအနေများ စက်တင်ဘာ ၂၂ ရက် ည ၁၀ နာရီ UPDATE 

·          စက်တင်ဘာလ ၂၂ ရက် မြန်မာစံတော်ချိန် ည ၉ နာရီမှာ တောင်တရုတ်ပင်လယ်အတွင်းသို့ ဝင်ရောက်လာသည့် စူပါတိုင်ဖွန်းမုန်တိုင်း(Super Typhoon – ST)RAGASA သည် စက်တင်ဘာ ၂၃ ရက် နေ့လည်တွင် အားအလွန်ကောင်းသောတိုင်ဖွန်းမုန်တိုင်း(Very Strong Typhoon – VST)အဖြစ်အားလျော့သွားပြီး တရုတ်ပြည်တောင်ပိုင်း ဟိုင်နန်ကျွန်းကို တိုင်ဖွန်းမုန်တိုင်းအဆင့်ဖြင့် ဦးစွာဖြတ်ကျော်ပါမည်။ 

·          စူပါတိုင်ဖွန်းမုန်တိုင်း RAGASA ၏ အရွယ်အစား အချင်းမိုင် ၇၀၀ နှင့် မုန်တိုင်းမျက်စေ့အချင်း ၃၃.၂ မိုင်ရှိကြောင်း အပြည်ပြည်ဆိုင်ရာမုန်တိုင်းလေ့လာစောင့်ကြည့် ဆန်းစစ်၊ အတည်ပြုဌာနများမှ ထုတ်ပြန်ထားပါတယ်။ 

·          ဟိုင်နန်ကျွန်းကိုဖြတ်ကျော်အပြီး ဗီယက်နမ်နိုင်ငံအရှေ့မြောက်ဘက်ကမ်းခြေအား CamPha မြို့၏ အရှေ့မြောက်ဘက် ၁၀ ခန့်မှ စက်တင်ဘာ ၂၄ ရက်ညတွင် ဖြတ်ကျော်ဝင်ရောက်ပြီး ကုန်းတွင်းလေဖိအားနည်းရပ်ဝန်းအဖြစ် ချက်ချင်းအားလျော့သွားနိုင်မည်ဖြစ်ကြောင်း JTWC မှ ခန့်မှန်းထားပါတယ်။ 

·          တိုင်ဖွန်းမုန်တိုင်း RAGASA ၏အကြွင်းအကျန်များသည် လာအိုနိုင်ငံအရှေ့မြောက်ပိုင်းသို့ စက်တင်ဘာလ ၂၆ ရက် နေ့လည်ပိုင်းတွင်ရောက်ရှိလာနိုင်ပြီး အနောက်ဘက်သို့ဆက်လက်ရွေ့လျားနိုင်ကြောင်း ခန့်မှန်းရပါတယ်။ 

·          ဘင်္ဂလားပင်လယ်အော်မြောက်ပိုင်း၊ ဘင်္ဂလားဒေ့ရှ်နိုင်ငံကမ်းခြေနဲ့ မြန်မာ-ရခိုင်ကမ်းရိုးတန်းအနီးမှာဖြစ်ပေါ်နေတဲ့ လေပွေလှိုင်းသည် စက်တင်ဘာလ ၂၂ ရက်တွင် လေဖိအားနည်းရပ်ဝန်းဖြစ်လာပြီးနောက် မြောက်အနောက်မြောက်ဘက်သို့ ဆက်လက်ရွေ့လျားနိုင်ပါတယ်။ 

·          ဘင်္ဂလားပင်လယ်အော်မြောက်ပိုင်းနှင့် ဆက်စပ်နေသည့် ဘင်္ဂလားပင်လယ်အော်အနောက်အလယ်ပိုင်းမှာ နောက်ထပ်လေဖိအားနည်းရပ်ဝန်းအသစ်တခု စက်တင်ဘာလ ၂၅ ရက်‌နေ့မှာဖြစ်ပေါ်နိုင်ပြီး ဘင်္ဂလားပင်လယ်အော်အနောက်အလယ်ပိုင်း၊ ဩရိဿပြည်နယ်တောင်ပိုင်းနှင့် အန်ဒရာပရာဒက်ရှ် ပြည်နယ်ကမ်းခြေအနီးတွင် စက်တင်ဘာ ၂၆ ရက်နေ့တွင် အားကောင်းသောလေဖိအားနည်းရပ်ဝန်း(မုန်တိုင်းငယ်)အဖြစ်ပိုမိုအားကောင်းလာနိုင်ကာ စက်တင်ဘာ ၂၇ ရက်နေ့တွင် ဩရိဿပြည်နယ်တောင်ပိုင်းနှင့် အန်ဒရာပရာဒက်ရှ် ပြည်နယ်ကမ်းခြေကိုဖြတ်ကျော်ဝင်ရောက်သွားနိုင်ကြောင်း အိန္ဒိယမိုးလေဝသဌာနမှ ခန့်မှန်းထုတ်ပြန်ထားပါတယ်။ 

·          မုန်တိုင်းအကြွင်းအကျန်များ(Typhoon Remnants)နှင့် ဘင်္ဂလားပင်လယ်အော်မှ လေဖိအားနည်းရပ်ဝန်းများကြောင့် အားကောင်းနေသည့် မုတ်သုံလေတို့ကြောင့် စက်တင်ဘာလ ၂၃ ရက် မှ ၂၉ ရက်အထိ ၇ ရက်အတွင်း မြန်မာတနိုင်ငံလုံးတွင်မိုးအသင့်အတင့်မှ မိုးများနိုင်ပါမယ်။ 

·          ကချင်ပြည်နယ်၊ စစ်ကိုင်းတိုင်း၊ ချင်းပြည်နယ်၊ မကွေးတိုင်း၊ မန္တလေးတိုင်း၊ ရှမ်းပြည်နယ်၊ နေပြည်တော်တို့တွင် ၇ ရက်အတွင်း မိုးရေချိန် အများဆုံး ၅ လက်မခန့်အထိ ရွာသွန်းရရှိနိုင်ပြီး နေရာကွက်၍ မိုးသည်းထန်နိုင်ပါမယ်။ 

·          ရခိုင်ပြည်နယ်၊ ပဲခူးတိုင်း(အရှေ့+အနောက်)၊ ရန်ကုန်တိုင်း၊ ဧရာဝတီတိုင်း၊ မွန်ပြည်နယ်၊ ကရင်ပြည်နယ်နှင့်တနင်္သာရီတိုင်းတို့တွင် ၇ ရက်အတွင်း ရွာသွန်းရရှိနိုင်မည့်မိုးရေချိန် ၁၀ လက်မ မှ ၁၄ လက်မခန့်အထိရှိနိုင်ပြီး၊ မုတ်သုံမိုးအားအနည်းအများနှင့် မုန်တိုင်းအကြွင်းအကျန်များဝင်ရောက်မှု အနည်းအများပေါ်မူတည်ကာ ဒေသအလိုက် မိုးအနည်းအများကွာနိုင်ပါတယ်။ 

·          ဧရာဝတီတိုင်း၊ တနင်္သာရီတိုင်းနှင့် ရခိုင်ကမ်းရိုးတန်းတလျှောက်မှာ မုတ်သုံမိုးရွာသွန်းမှု+မုန်တိုင်းအကြွင်းအကျန်ဝင်ရောက်မှု ပိုများနိုင်ပြီး၊ ၇ ရက်အတွင်း ၁၄ လက်မခန့် အထိ ရွာသွန်းရရှိနိုင်ပါမယ်။ 

https://disasterinfo.mmweather.org/   

ပဲခူးတိုင်းအတွင်း မြို့နယ်အချို့၏ ၇ ရက်အတွင်း ရွာသွန်းရရှိနိုင်သည့် မိုးရေချိန် 

·          ပဲခူးတိုင်းအရှေ့ခြမ်း/အနောက်ခြမ်းဒေသအားလုံးမှာ မိုးအသင့်အတင့်ရွာနိုင်ပြီး နေရာကွက်၍ မိုးများနိုင်ပါတယ်။ 

·          ပဲခူးတိုင်းအရှေ့ခြမ်းမှ တောင်ငူ၊ အုတ်တွင်း၊ ဖြူး၊ ရွှေကျင်-ကျောက်ကြီး ဒေသတွေမှာ ပဲခူးရိုးမနဲ့ ကရင်-ပဲခူးနယ်စပ်တောင်ကြောများပေါ်မှ မိုးအားမြင့်စေသည့်အခြေအနေ(Orographic Lift Effect)/မိုးပြိုကျစေသည့်အခြေအနေများကြောင့် ၂၄ နာရီအတွင်း မိုးရေချိန် ၁.၆ လက်မ မှ ၃ လက်မခန့်အထိ မိုးရွာသွန်းနိုင် မိုးများနိုင်ပါတယ်။ 

·          ပဲခူးခရိုင်အတွင်းမှ ပဲခူး၊ ကဝ၊ ဝေါ၊ သနပ်ပင်မြို့နယ်တွေမှာ နေရာကွက်၍ မိုးသည်းထန်နိုင်ပြီး ၇ ရက်အတွင်း မိုးရေချိန် ၉ လက်မ ခန့်ရွာသွန်းရရှိနိုင်ပြီး မြို့တွင်း အနိမ့်ပိုင်းရပ်ကွက်အချို့မှာ ရေကြီးနိုင်ပါတယ်။ 

·          ပဲခူးတိုင်းအနောက်ပိုင်း ပြည်ခရိုင်မှ ပြည်၊ ပေါင်းတည်၊ ပေါက်ခေါင်း၊ ပန်းတောင်း မြို့နယ်တွေမှာ နေရာအနှံ့အပြားမိုးသည်းထန်နိုင်ပြီး ၇ ရက်အတွင်း မိုးရေချိန် ၇ လက်မကျော်ခန့် ရွာသွန်းနိုင်ပါတယ်။ 

·          ပဲခူးတိုင်းအနောက်ပိုင်းမှ ပဲခူး- သာယာဝတီခရိုင်နယ်နိမိတ်အနီးဒေသတွေမှာ မိုးရေချိန်ရရှိမှုနည်းနိုင်သော်လည်း နေရာကွက်၍မိုးများနိုင်ပါတယ်။ 

·          တောင်ငူ၊ ဖြူးနှင့် ကျောက်ကြီးခရိုင်/မြို့နယ်များအတွင်း မိုးရက်ဆက်ရွာသွန်းနေနိုင်ပါတယ်။ 

အပူချိန်၊ လေတိုက်နှုန်း၊ လေထုစိုထိုင်းဆနှင့် လေထုညစ်ညမ်းမှုအခြေအနေများ 

·          ပဲခူးတိုင်းတခုလုံးမှာ အမြင့်ဆုံးနေ့အပူချိန် ၃၂°C နဲ့ အနိမ့်ဆုံးညအပူချိန် ၂၅°C ရှိနိုင်ကာ၊ ခံစားရသည့်အပူချိန် temperature feels like ၄၁°C အထိရှိနိုင်ပါမယ်။ 

·          လေထုစိုထိုင်းဆအခြေအနေ နေ့လည်ဘက်မှာ ၆၀% အထိ ကျဆင်းနိုင်ပြီး နံနက်ခင်းနဲ့ ညနေ/ညအချိန်တွေမှာ ၁၀၀% ရှိနိုင်ပါမယ်။ 

·          လေထုညစ်ညမ်းမှုအညွှန်းကိန်း AQI သည် ပဲခူးတိုင်းတခုလုံးမှာ ၃၀ ဝန်းကျင်ခန့်ရှိနိုင်ပြီး အန္တရာယ်ရှိနိုင်သည့်အခြေအနေမဟုတ်ပါ။ 

·          ပဲခူးတိုင်းတောင်ဘက် မုတ္တမပင်လယ်ကွေ့အတွင်း လှိုင်းအမြင့်ဆုံး ၄ ပေခန့် ရှိနိုင်ပြီး၊ 

ကုန်းတွင်းမှာ လေတိုက်နှုန်း တနာရီ ၂၀ မိုင်ခန့်နှင့်၊ မုတ္တမကွေ့အတွင်း လေတိုက်နှုန်းအမြင့်ဆုံး တနာရီ ၂၅ မိုင်ခန့်ရှိနိုင်ပါမယ်။ 

Win Naing 

Administration Team, 

MMWEATHER, 

ငါး၊ ပုစွန်ကန်များအတွက် အကြံပြုချက်   

အခုတစ်ပတ် မိုးရွာသွန်းမှုများနိုင်သဖြင့် ငါးမွေးကန်ဘောင်များအား မြှင့်ထားရန် အကြံပြုအပ်ပါသည်။ ငါးမွေးကန်၏ ဘောင်ထိပ်မှ (၆)လက်မအကွာအောက်တွင် ‌ရေလျှံပေါက်များ ကြိုတင်တပ်ဆင်ထားသင့်ပါသည်။ ကန်ဘောင်ပေါ်မှ ‌ရေလျှံထွက်ခြင်း နှင့် ပြင်ပမှ ‌ရေကျော်ဝင်ခြင်းများ ဟန့်တားရန် သဲအိတ်များကို စီချထားသင့်သည်။ ကန်ပတ်ပတ်တွင် အမြင့် (၄)ပေရှိ ပိုက်စိမ်းများကို ခိုင်ခံ့စွာ ကာရန်ပေးထားခြင်းဖြင့် သဘာဝဘေးကို ကြိုတင်ကာကွယ်နိုင်ပါသည်။   

ရေ၏ချဉ်ဖန်နှုန်းကို တိုင်းတာပြီး pH ၅.၅ သို့ရောက်ရှိနေပါက တစ်ဧကလျှင် ထုံး ၁၅ မှ ၂၀ပိဿာအထိ ထည့်သွင်းပေးရန် အကြံပြုအပ်ပါသည်။ မိုးအုံ့သော/ မိုးရွာသောအချိန်များတွင် အစာကျွေးခြင်း မပြုလုပ်ရန် (သို့မဟုတ်) အစာကျွေးပါကလည်း ယခင်ကျွေးသောနှုန်းထက် အနည်းဆုံး ၂၀ ရာခိုင်နှုန်း လျှော့ကျွေးပေးပါရန် အကြံပြုအပ်ပါသည်။  

------  

မိုးလေဝသအဖွဲ့ဝင်ရန် - https://htwettoe.com/organization/12  

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို  

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်.  

သီးနှံပေါက်စျေးကြည့်ရှုနည်း_ https://htwettoe.com/post/50437