ဧရာဝတီတိုင်း မေလ ၂၉ ရက် မှ ဇွန်လ ၄ ရက် မိုးလေဝသအခြေအနေ

မေလ ၂၈ ရက် နေ့မှာ ဘင်္ဂလားပင်လယ်အော်အနောက်မြောက်ပိုင်းမှ အားကောင်းသောလေဖိအားနည်းရပ်ဝန်း(Well Marked Low Pressure Area)သည် မေလ ၂၉ ရက် နံနက်ပိုင်းမှ စတင်ပြီး အိန္ဒိယနိုင်ငံနှင့် ဘင်္ဂလားဒေ့ရှ်နိုင်ငံ နယ်စပ်အနီးမှ ကုန်းတွင်းကို ဖြတ်ကျော်ဝင်ရောက်စဉ် - 

ဧရာဝတီတိုင်းအတွင်း အများအားဖြင့် မိုးအားလျော့နည်းသွားနိုင်ပြီး ဇွန်လ ၂ ရက်နေ့မှာ မိုးပြန်များနိုင်သည်မှအပ မုတ်သုံမိုးပုံမှန်ရွာသွန်းနိုင်ခြင်းသာရှိတော့မည်ဖြစ်ကြောင်း တွေ့ရပါတယ်။ ဇွန်လ ၂ ရက်နေ့နှင့် ၃ ရက်နေ့တွေမှာ ၂၄ နာရီအတွင်းမိုးရေချိန် 40mm(၁.၆ လက်မခန့်) ရွာသွန်းနေနိုင်ပါမယ်။ 

ဒီတစ်ပတ်အတွင်း အားကောင်းနေတဲ့ မုတ်သုံလေကြောင့် ဧရာဝတီတိုင်းအတွင်းကဒေသအားလုံးမှာ လေတိုက်နှုန်း တစ်နာရီ မိုင် ၂၀ မှ ၃၀ ဝန်းကျင် တိုက်ခတ်နေနိုင်ပါတယ်။ နေသာချိန်ပြန်ရှိလာနိုင်ပြီး နေ့အပူချိန် အမြင့်ဆုံး ၃၂ °C နဲ့ ညအပူချိန်အနိမ့်ဆုံး ၂၆°C ခန့် ရှိနေနိုင်ပါမယ်။ ပြီးခဲ့ရက်များအတွင်းမှာ မိုးရွာသွန်းခဲ့ပြီး မုတ်သုံမိုးအနည်းငယ်ဆက်လက်ရွာသွန်းနေဦးမှာဖြစ်တာကြောင့် မိုးလယ်ကာလပြီးဆုံးချိန်(ဩဂုတ်လ ကုန်သည်အထိ)မြေဆီလွှာစိုထိုင်းဆ ၁၀၀% ဆက်ရှိနေမှာလဲ ဖြစ်ပါတယ်။ 

Win Naing 

Administration Team, 

MMWEATHER, 

https://www.mmweather.org/home 

 တောင်သူဦးကြီးများအတွက် မိုးစပါးစိုက်ပျိုးနည်းတွင် မြေဩဇာစနစ်တကျထည့်သွင်းနည်းကို အကြံပြုဆွေးနွေးပေးလိုက်ပါတယ်။ 

• လိုအပ်သော ပေါင်းနှိမ်နင်းခြင်းများကိုပြုလုပ်ပြီးမှ မြေဩဇာကိုထည့်သွင်းပေးပါ။ 
• တိုက်ရိုက်မျိုးစေ့ချစိုက်ခင်းများ အရွက် (၅ ရွက်) ထွက်ချိန်မှာ ပုလဲယူရီးယား(N) မြေဩဇာတစ်အိတ်ရဲ့ ၃ပုံ၁ပုံကို တစ်ကြိမ်၊ ပျိုးထောင်စိုက်ခင်းဆိုရင် ကောက်ပင်လှန်ချိန်မှာအဲ့အချိုးအတိုင်း တစ်ကြိမ် ထည့်ပေးပါ။ 
• ပင်ပွားစီးချိန်တွင် ပုလဲယူရီးယား(N) နောက်တစ်ကြိမ်၊ ဗိုက်ဖောင်းချိန်တွင် ပိုတက်ရှ်(K)တစ်ကြိမ်၊ အလံရွက်ထွက်ချိန်တွင် ကျန်တဲ့ယူရီးယားပုလဲ (N)+ ပိုတက်ရှ်(K) တစ်ပုံကိုကျွေးပေးပါ။ 
• အဓိက ပုလဲယူရီးယားနိုက်ထရိုဂျင်မြေဩဇာများကို တစ်ကြိမ်တည်း အလွန်အကျွံသုံးခြင်းထက် အကြိမ်ရေခွဲပြီး စနစ်တကျထည့်သွင်းခြင်းသည် အဓိကဖျက်ပိုးဖြစ်တဲ့ (ဖြုတ်ပိုး) ကျရောက်မှုကို အတော်အသင့်ကာကွယ်နိုင်မှာဖြစ်ပါတယ်။ 

ငါးပုစွန် တောင်သူများအတွက် အကြံပြုချက် 

· ငါးကန်သို့ စီးဝင်လာသော မိုးရေတွင် ပတ်ဝန်းကျင်မှ အညစ်အကြေးများပါဝင်လာနိုင်သကဲ့သို့ ဩဇာဓာတ်များလည်း ပါဝင်လာနိုင်သဖြင့် သတိထားသင့်ပါသည်။ 

. ရေချဉ်ဖန်နှုန်း (၆) နှင့် (၆) အောက်ရောက်ရှိပါက မွေးမြူထားသော ငါးများသည် ကျန်းမာရေး မကောင်းခြင်း၊ အစာမစားခြင်းများ ရှိလာတတ်ပါသည်။ ထိုအချိန်တွင် အစာကျွေးပါကလည်း အစာမစားနိုင်ကြပါ။ 

· ငါးများ ပုံမှန်ကြီးထွားမှုရှိရန် ရေတွင်ပျော်ဝင်သောအောက်ဆီဂျင်ပမာဏသည် (5 ppm) နှင့် အထက်တွင်ရှိရန် ဂရုပြုသင့်ပါသည်။ 

·  ကန်ရေအရည်အသွေး အနည်းနှင့်အများပြောင်းလဲခြင်းသည် ငါးများကိုဒဏ်သင့်စေပြီးလွယ်ကူစွာ ရောဂါကူး စက်ဖြစ်ပွားစေနိုင်ပါသည်။ 

. ထို့ကြောင့် ( က) ရေတွင်ပျော်ဝင်လျက်ရှိသောအောက်ဆီဂျင်ပမာဏ (Dissolved Oxygen-DO), (ခ) ရေ၏ချဉ် ဖန်ဓာတ် (pH), (ဂ) ရေကြည်ခြင်း / ရေနောက်ခြင်း (Turbidity), (ဃ) ရေအပူချိန် (Water temperature) တို့ကို (နာရီပိုင်း/ နေ့စဉ်/ အပတ်စဉ်) တိုင်းတာခြင်းဖြင့် ငါးကန်ရေအရည်အသွေးပြောင်းလဲမှု လက္ခဏာ နှင့်ထုတ်လုပ်နိုင်မှုကို ခန့်မှန်းသိရှိနိုင်ပါမည်။ 

---------- 

မိုးလေဝသအဖွဲ့ဝင်ရန် - https://htwettoe.com/organization/12 

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို 

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်. 

သီးနှံပေါက်စျေးကြည့်ရှုနည်း_ https://htwettoe.com/post/50437