ဧရာဝတီတိုင်း ဩဂုတ်လ ၂၁ ရက် မှ ၂၇ ရက်အထိ မိုးလေဝသအခြေအနေ

ဩဂုတ်လ ၂၃ ရက် ည မှာ ဖိလစ်ပိုင်နိုင်ငံအနောက်ဘက်၊ ကမ်းခြေအနီး၊ တောင်တရုတ်ပင်လယ်မှာ လေဖိအားနည်းရပ်ဝန်းစတင်ဖြစ်ပေါ်လာပြီး အနောက်ဘက်ကို ဆက်လက်ရွေ့လျားကာ ဩဂုတ် ၂၅ ရက် နံနက်အစောပိုင်းမှာ အပူပိုင်းမုန်တိုင်းဖြစ်လာနိုင်ကြောင်း၊ ၂၅ ရက်နေ့ ညပိုင်းမှာ ဟိုင်နန်ကျွန်းတောင်ပိုင်းကိုဖြတ်ကျော်ပြီး ဗီယက်မ်နိုင်ငံအရှေ့ဘက် တုံကင်ပင်လယ်ကွေ့မှာ တိုင်ဖွန်းမုန်တိုင်းဖြစ်လာနိုင်ကြောင်း ECMWF နှင့် Meteoblue NEMS-Global model များမှ ကြိုတင်ခန့်မှန်းချက်မှာ တွေ့ရပါတယ်။ GFS နဲ့ ICON model တွေမှာတော့ ဩဂုတ် ၂၆ ရက်အထိ ဟိုင်နန်ကျွန်းအရှေ့ဘက်တောင်တရုတ်ပင်လယ်မှာရှိနေနိုင်ပြီး ၂၉ ရက်နေ့မှာ တုံကင်ပင်လယ်ကွေ့မှတဆင့် ဗီယက်နမ်နိုင်ငံမြောက်ပိုင်းကို ဦးတည်ရွေ့လျားနိုင်ကြောင်းတွေ့ရပါတယ်။ 

** သင်္ချာပုံစံပြု model များ၏ မုန်တိုင်းအား၊ လမ်းကြောင်းနှင့် ရက်/အချိန်ကြိုတင်ခန့်မှန်းချက်များ တပြေးညီမဖြစ်သေးပါ။ 

လက်ရှိကြိုတင်ခန့်မှန်းချက်တွေအရ ဩဂုတ်လ ၂၇-၂၈ ရက်တွေမှာ လာအိုနဲ့ထိုင်းနိုင်ငံမြောက်ပိုင်းတွင် ၂၄ နာရီအတွင်း မိုးရေချိန် ၅ လက်မအထက်ရွာနိုင်ပြီး မိုးများနိုင်ကြောင်းတွေ့ရပါတယ်။ 

တောင်တရုတ်ပင်လယ်မှ မုန်တိုင်းအရှိန်သက်ရောက်မှုကြောင့် - 

·          မြန်မာနိုင်ငံအရှေ့ပိုင်းဒေသတွေဖြစ်တဲ့ ရှမ်းပြည်နယ်အရှေ့ပိုင်း၊ တောင်ပိုင်း၊ ကယားပြည်နယ်နဲ့ ပဲခူးတိုင်းအရှေ့ပိုင်း-စစ်တောင်းမြစ်ဝှမ်းဒေသတွေနဲ့ ကရင်ပြည်နယ်၊ မွန်ပြည်နယ်၊ တနင်္သာရီတိုင်းမြောက်ပိုင်း(ထားဝယ်မြို့အထက်ဘက်)တွေမှာ ဩဂုတ်လ ၁၇ ရက် နောက်ပိုင်းမှ ဩဂုတ်လ-လကုန်ရက်တွေအထိ မိုးအသင့်အတင့်မှမိုးများလာနိုင်ပါမယ်။ 

·          ဩဂုတ် ၂၉ ရက်နဲ့နောက်ပိုင်းမှာ အရှေ့ဘက်မှလေပွေလှိုင်း/မုန်တိုင်းအကြွင်းအကျန်များက အလယ်ပိုင်းမိုးနည်းရေရှားဒေသတွေဖြစ်တဲ့ မန္တလေးတိုင်းတောင်ပိုင်း၊ နေပြည်တော်၊ မကွေးတိုင်း၊ ပဲခူးတိုင်းအနောက်ခြမ်းမှ ရခိုင်ပြည်နယ်မြောက်ပိုင်း၊ ချင်းပြည်နယ်တောင်ပိုးဒေသတွေအထိရောက်ရှိပြီး အဲ့ဒီဒေသတွေမှာ မိုးပိုလာနိုင်ပါတယ်။ 

ဧရာဝတီတိုင်းအတွင်း မိုးရွာသွန်းနိုင်သည့်အခြေအနေ 

·          ဧရာဝတီတိုင်းရဲ့မြို့နယ်တော်တော်များများမှာ ၂ ရက်-၃ ရက် ဆက်ပြီး၊ နေ့စဉ် ၂၄ နာရီအတွင်း မိုးရေချိန် ၁.၂ လက်မအထက်(မိုးအသင့်အတင့်) ရွာသွန်းရရှိနိုင်ပါတယ်။ 

·          ပုသိမ်၊ ဟိုင်းကြီးကျွန်း၊ ပြင်စလူ၊ ဆားမလောက် မြို့နယ်တွေမှာ ၂၃-၂၄-၂၅ .. ၃ ရက် ဆက်တိုက်၊ 

·          ကျောင်းကုန်း၊ ဟင်္သာတ၊ ပန်းတနော်၊ ညောင်တုန်းမြို့နယ်တွေမှာ ၂၃-၂၅-၂၆ .. ၃ ရက်ဆက်တိုက်၊ 

·          လပွတ္တာမှာ ဩဂုတ် ၂၃-၂၄ .. ၂ ရက်၊ ငွေဆောင်-ချောင်းသာနဲ့ ငရုတ်ကောင်း ကမ်းခြေတွေမှာ ၂၃-၂၅ .. ၂ ရက်၊ 

·          ဧရာဝတီတိုင်းမြောက်ပိုင်းက မြန်အောင်/ကြံခင်း/အင်္ဂပူ အပါအဝင် အချို့မြို့နယ်တွေမှာ ၇ ရက်အတွင်း ရွာသွန်းရရှိနိုင်မည့် မိုးရေချိန်ပမာဏ ၆ လက်မခန့်ရှိနိုင်တာကြောင့် နေ့စဉ် ၂၄ နာရီအတွင်း ရွာသွန်းရရှိနိုင်မည့် မိုးရေချိန်က ၁ လက်မ အောက်၊ ၁ လက်မ ဝန်းကျင်မှာသာရှိနိုင်/မိုးနည်းနိုင်ပါတယ်။ 

အပူချိန်၊ လေတိုက်နှုန်း၊ လေထုစိုထိုင်းဆနှင့် လေထုညစ်ညမ်းမှုအခြေအနေကြိုတင်ခန့်မှန်း 

ဧရာဝတီတိုင်းတခုလုံးမှာ ပျမ်းမျှအမြင့်ဆုံးနေ့အပူချိန် ၃၀°C နဲ့ အနိမ့်ဆုံးညအပူချိန် ၂၅°C ရှိနိုင်ပြီး လေထုစိုထိုင်းဆ ၈၅% ရှိနိုင်ပါမယ်၊ လေထုစိုထိုင်းဆမြင့်မားချိန် ခံစားရတဲ့အပူချိန်က ၄၁°C အထိ ရှိနေနိုင်ပါတယ်။ 

လေထုညစ်ညမ်းမှုအညွှန်းကိန်း(AQI Value)က 20 ဝန်းကျင်မှာသာရှိပြီး အန္တရာယ်ရှိသည့်အခြေအနေမဟုတ်ပါ။ 

Win Naing 

Administration Team, 

MMWEATHER, 

https://www.mmweather.org/home 

ဧရာဝတီတိုင်းဒေသကြီးအတွင်းရှိ မိုးစပါးစိုက်တောင်သူများထံသို့ 

နှံစုပ်ဂျပိုးကာကွယ်နှိမ်နင်းနည်းအကြံပြုချက် ...  

• စိုက်ခင်းစိုထိုင်းဆ ၈၀ % နှင့်အပူချိန် ၃၀ ဒီဂရီဝန်းကျင်အခြေအနေတွင် စပါးနို့ရည်တည်ချိန်၊ နှံစပြူချိန်နှင့်တိုက်ဆိုင်ပါက နှံစုပ်ဂျပိုးကျရောက်နိုင်ကြောင်း သတိပြုစေဖို့နဲ့ နှံစုပ်ဂျပိုးကျရောက်ပါက ပြုလုပ်နိုင်မယ့် ကာကွယ်နှိမ်နင်းနည်းများကို အကြံပြုဆွေးနွေးပေးလိုက်ပါတယ်။ 
• အရွက်အပေါ်မျက်နှာပြင်ပေါ်မှာ တန်းစီပြီးအုထားတဲ့ ဂျပိုးဥတွေကိုတွေ့ပါက သေချာပေါက်ကောက်ယူပြီး အိတ်ထဲထည့်လာပါ။ 
• နှံစုပ်ပိုးက နေ့လည်ဘက်မှာ စပါးပင်ခြေ၊ အောက်မျက်နှာပြင်မှာခိုအောင်းနေတတ်ပါတယ်၊ မနက်ခင်းနေရောင်ခြည်မထွက်ခင် အပင်၊ အနှံကိုစုပ်ယူဖျက်ဆီးပြီး ညနေဘက်မှာ မိတ်လိုက်ပါတယ်။ 
• ဒါကြောင့် ဓာတုဆေးအနေနဲ့ Acetamiprid, Profenofos, Indoxacarb တို့လိုဆေးမျိုးကိုမနက်ခင်းပိုင်းဖျန်းပေးပါ။ 
• ပေါင်းမြက်တွေကိုလည်းသေချာရှင်းပေးပါ။ 

ငါးဒန်အစာကျွေးခြင်းဆိုင်ရာ အကြံပြုချက် 

ငါးဒန်သည် ငါးကြင်းအုပ်စုဝင်ငါးများထက် သဘာဝအစာဖြစ်သော အပင်မျှောလှေးနှင့် အကောင် မျှောလှေးများတွင် အကောင်မျှောလှေးကို ပိုမိုကြိုက်နှစ်သက်ပါသည်။ 

ထို့အပြင် ငါးကြင်းအုပ်စုဝင်ငါးများထက် အစာစားနှုန်းများပါသည်။ ငါးဒန်သည် အစုံစားသတ္တဝါဖြစ်ပြီး အသားဓါတ်ပါသော အစာကို ကြိုက်နှစ်သက်ပါသည်။ 

ဖြည့်စွက်စာကျွေးပါက ပရိုတိန်း ၂၅ရာခိုင်နှုန်းအထက်ပါသော အစာတောင့်ကိုကျွေးပါက ပိုပြီး ကောင်းမွန်ပါသည်။ ငါးဒန်သည် အစာကောင်းစွာ စားသုံးရပါက ကြီးထွားနှုန်းမြန်သော ငါးမျိုးစိတ် ဖြစ်ပါသည်။   

ဖြည့်စွက်စာကျွေးနည်းလေ့လာရန် လင့်ကို နှိပ်ပါ - https://htwettoe.com/post/44817 

စိုက်ပျိုးရေး၊ မွေးမြူရေး နည်းပညာများနင့် ပတ်သတ်ပြီး ဆွေးနွေးတိုင်ပင်လိုပါက ထွက်တိုးကောစင်တာ 09977910000သို့ ဆက်သွယ်နိုင်ပါသည်။      

--------------             

မိုးလေဝသအဖွဲ့ဝင်ရန် - https://htwettoe.com/organization/12               

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလို                

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်.               

သီးနှံပေါက်စျေးကြည့်ရှုနည်း_ https://htwettoe.com/post/50437