ပဲခူးတိုင်း အောက်တိုဘာလ ၁၄ ရက် မှ အောက်တိုဘာလ ၂၀ ရက်အထိ မိုးလေဝသအခြေအနေ

တောင်တရုတ်ပင်လယ်၊ ဘင်္ဂလားပင်လယ်အော်နှင့် အာရေဗျပင်လယ်တို့တွင် ဖြစ်ပေါ်နိုင်သည့် ထူးခြားမိုးလေဝသအခြေအနေ 

·          ဖိလစ်ပိုင်နိုင်ငံအရှေ့ဘက် ပစိဖိတ်သမုဒ္ဒရာအနောက်မြောက်ပိုင်းတွင် ဖြစ်ပေါ်နေသည့် လေပွေလှိုင်း (INVEST-96W) သည် အနောက်-အနောက်မြောက်ဘက်သို့ ဆက်လက်ရွေ့လျားပြီး ဖိလစ်ပိုင်နိုင်ငံအလယ်ပိုင်းနှင့်မြောက်ပိုင်းကို ချဉ်းကပ်လာစဉ် အားကောင်းသောအပူပိုင်းမုန်တိုင်း (Severe Tropical Storm – SS) ဖြစ်လာနိုင်ပါတယ်။ 

·          ယနေ့ရရှိသည့်ကြိုတင်ခန့်မှန်းလမ်းကြောင်းအတိုင်းဆက်လက်ရွေ့လျားပါက အောက်တိုဘာ ၁၉ ရက်ည ပိုင်းမှာ တိုင်ဖွန်းမုန်တိုင်းအဖြစ် တောင်တရုတ်ပင်လယ်အတွင်းသို့ ဝင်ရောက်လာနိုင်ကြောင်း ICON Model ကြိုတင်ခန့်မှန်းချက်နှင့် ECMWF စုပေါင်း model များ၏ ကြိုတင်ခန့်မှန်းချက်တွေမှာ တွေ့ရတာကြောင့် မိုးလွန်ကာလမိုး/အခါလွန်မိုး/ဖျက်မိုးများ၏အန္တရာယ် ရှိနိုင်သည့်အတွက် အထူးသတိပြုစောင့်ကြည့်ရပါမယ်။ 

·          အိန္ဒိယနိုင်ငံအနောက်တောင်ပိုင်း အာရေဗျပင်လယ်အတွင်းမှာ လေဖိအားနည်းရပ်ဝန်းတခုဖြစ်ပေါ်လာနိုင်ပြီး လေဖိအားနည်းရပ်ဝန်းကြေင့် အရှေ့လေစီးကြောင်းပိုမိုအားကောင်းလာနိုင်ကာ INVEST-96W အနောက်ဘက်သို့ရွေ့လျားနိုင်ခြင်းကို ပိုမိုအားပေးနိုင်တာကြောင့် အာရေဗျပင်လယ်က လေဖိအားနည်းရပ်ဝန်းအခြေအနေကိုလည်း စောင့်ကြည့်ရပါမယ်။ 

·          အိန္ဒိယနိုင်ငံအလယ်ပိုင်းဒေသများမှ ဆက်လက်ဆုတ်ခွာလျှက်ရှိတဲ့ အနောက်တောင်မုတ်သုံလေသည် မြန်မာနိုင်ငံမှ အောက်တိုဘာ ၁၅ ရက်နေ့နောက်ပိုင်းမှာ အပြီးသတ်ဆုတ်ခွာနိုင်မယ်လို့ခန့်မှန်းရပြီး အိန္ဒိယမိုးလေဝသဌာန-IMD ခန့်မှန်းချက်အရ နောက်လာမည့်ရက်ပိုင်းအတွင်း ဘင်္ဂလားဒေ့ရှ်နိုင်ငံမှ မုတ်သုံစတင်ဆုတ်ခွာနိုင်ကြောင်း ခန့်မှန်းထားတာကို အောက်တိုဘာ၁၁ ရက်နေ့မှာ IMD က ပြုလုပ်တဲ့ သတင်းစာရှင်းလင်းပွဲ ထုတ်ပြန်ချက် Press-Release မှာတွေ့ရပါတယ်။ 

·          ဒီအခြေအနေတွေကြောင့် မြန်မာနိုင်ငံ ပြည်နယ်/တိုင်း ဒေသအားလုံးမှာ မိုးအနည်းငယ်မှ မိုးအသင့်အတင့် ဆက်လက်ရွာသွန်းနိုင်ဦးမှာဖြစ်ပြီး အောက်တိုဘာ ၂၂ ရက်ကို ကျော်လွန်ပြီးမှသာ မိုးလျော့နည်းလာနိုင်ပါမယ်။ 

ပဲခူးတိုင်းအတွင်း မြို့နယ်အချို့၏ ၇ ရက်အတွင်း ရွာသွန်းရရှိနိုင်သည့် မိုးရေချိန် 

·          ပဲခူးတိုင်းအတွင်းမှာ ယခုတပတ်အတွင်း ၇ ရက် မိုးရေချိန်အနည်းဆုံး ၂.၂၇ လက်မ(ပြည်မြို့)နှင့် ၇ ရက်အတွင်း မိုးရေချိန်အများဆုံး ၅.၂ လက်မ(ရွှေကျင်မြို့)တွေမှာ ရွာသွန်းရရှိနိုင်ကြောင်းတွေ့ရပါတယ်။ 

·          ပဲခူးတိုင်းအရှေ့ခြမ်းနဲ့ ကရင်ပြည်နယ်နယ်စပ်တောင်ကြောများပေါ်မှာ မိုးဆက်လက်များနေနိုင်တာကြောင့် စစ်တောင်းမြစ်ဝှမ်းတလျှောက်၊ မြို့နယ်/ခရိုင်တွေအတွင်းမှ မြစ်ကမ်းဘေးအနိမ့်ပိုင်းရပ်ကွက်တွေ၊ အနိမ်ပိုင်းလယ်ကွင်းတွေ၊ စိုက်ပျိုးမြေတွေမှာ ရေလွှမ်းနိုင်မည့် အန္တရာယ် ဆက်ရှိနေနိုင်ပါတယ်။ 

·          ပဲခူးတိုင်းအရှေ့ခြမ်းမှာ ၇ ရက်အတွင်း ရွာသွန်းရရှိနိုင်တဲ့ မိုးရေချိန်က ပဲခူးတိုင်းအနောက်ခြမ်းမှာ ရွာသွန်းရရှိနိုင်မည့် မိုးရေချိန်ထက် ၁ လက်မခန့် ပိုများနေဆဲဖြစ်ပါတယ်။ 

·          ပဲခူးတိုင်းအရှေ့ဘက်ခြမ်းက ဧရာဝတီမြစ်အပါအဝင်မြစ်ရေများ ဆက်လက်ကျဆင်းနေနိုင်တာကြောင့် လွန်ကဲတဲ့ မြစ်ရေကြီးနိုင်မည့်အခြေအနေဖြစ်ပေါ်မှု မရှိနိုင်တော့ပါ၊ အနိမ့်ပိုင်းရပ်ကွက်၊ လယ်မြေများရေလွှမ်းနိုင်ခြေကိုတော့ ဆက်လက်သတိထားကြရပါမယ်။ 

·          ပဲခူးတိုင်းတခုလုံးမှာ အောက်တိုဘာ ၂၄ ရက်နေ့မှ စ တင်ပြီး မိုး/လေကင်းစင်ပြီး နေသာနိုင်မည့်ရက်များဖြစ်လာနိုင်ကြောင်း ကြိုတင်ခန့်မှန်းချက်များမှာ တွေ့နေရပြီဖြစ်ပါတယ်။ 

  အပူချိန်၊ လေတိုက်နှုန်း၊ လေထုစိုထိုင်းဆနှင့် လေထုညစ်ညမ်းမှုအခြေအနေများ 

·          ပဲခူးတိုင်းတခုလုံးမှာ အမြင့်ဆုံးနေ့အပူချိန် ၃၂°C နဲ့ အနိမ့်ဆုံးညအပူချိန် ၂၃°C ရှိနိုင်ကာ၊ ခံစားရသည့်အပူချိန် temperature feels like ၄၀°C အထိရှိလာနိုင်ပါမယ်။ 

·          လေထုစိုထိုင်းဆအခြေအနေ နေ့လည်နေ့ခင်းအချိန်များနှင့် နံနက်ခင်း/ညနေ/ညအချိန်တွေမှာ များစွာကွာဟမှုမရှိပဲ ၉၀% မှ ၁၀၀% အတွင်းရှိနိုင်ပါမယ်။ 

·          လေထုညစ်ညမ်းမှုအညွှန်းကိန်း AQI သည် ပဲခူးတိုင်းတခုလုံးမှာ 50 ဝန်းကျင်ခန့်ရှိနိုင်ပြီး အန္တရာယ်ရှိနိုင်သည့်အခြေအနေမဟုတ်ပါ။ 

·          ပဲခူးတိုင်းတောင်ဘက် မုတ္တမပင်လယ်ကွေ့အတွင်း လှိုင်းအမြင့်ဆုံး ၁ ပေခန့် ရှိနိုင်ပြီး၊ 

ယခုတပတ်အတွင်း အရှေ့/အရှေ့တောင်ဘက်အရပ်များမှ လေတိုက်နှုန်း တနာရီ ၁၀ မိုင်ခန့်နှင့်၊ မုတ္တမကွေ့အတွင်း လေတိုက်နှုန်းအမြင့်ဆုံး တနာရီ ၁၅ မိုင်ခန့်ရှိနိုင်ပါမယ်။ 

Win Naing 

Administration Team, 

MMWEATHER, 

ပဲခူးတိုင်းဒေသကြီးအတွင်းရှိ ပဲစိုက်တောင်သူများထံသို့

ယင်ဖြူကာကွယ်နှိမ်နင်းနည်း အကြံပြုချက်

• ယင်ဖြူသည် အဝါရောင်မိုဆေ့ဗိုင်းရပ်စ်ရောဂါ၏ သယ်ဆောင်ကောင်ဖြစ်တဲ့အတွက် စိုက်ခင်းထဲယင်ဖြူကျနေတယ်၊ အဝါရောင်ပြောင်းနေတဲ့ ဗိုင်းရပ်စ်လက္ခဏာလည်း တွေ့တယ်ဆိုရင် အဲ့အပင်ကိုချက်ချင်းနုတ်ပစ်ပြီးစိုက်ခင်းနဲ့ဝေးရာမှာပစ်ပေးပါ။
• နိုက်ထရိုဂျင်ရွက်ဖျန်းအားဆေးကို အလွန်အကျွံမသုံးပါနဲ့။
• ယင်ဖြူအတွက် ပိုးသတ်ဆေးအဖြစ် Spirotetramat + Pyriproxyfen၊ Fipronil+ Bifenthrin Thiamethoxam + Chlorfenapyr၊ Pymetrozine+ Nintepyram အဆင်ပြေရာကို ရွေးချယ်နိုင်ပါတယ်။
• ဆေးဖျန်းပြီး ၁ ပါတ်ကြာရင် ပိုတက်စီယမ် (K) + Amino acid ရွက်ဖျန်းကိုဖျန်းပေးပါ။

ငါးကပ်ပါးရောဂါအတွက် အကြံပြုချက်  

Ichthyophthiriasis multifiliis ရောဂါပိုးကပ်ပါးများ တွယ်ကပ်မှုများလျှင် အရေပြား(သို့) ပါးဟက်များတွင် လည်းကောင်း၊ ဆူးတောင်များတွင်လည်းကောင်း အဖြူစက်မြောက်များစွာ တွေ့ရှိရမည်ဖြစ်သည်။  

- ရောဂါကျရောက်သောငါးများသည် အစာစားနှုန်းလျော့ကျသွားပြီး မျက်စိမှာ အလင်းပိတ်သွား၍ သေဆုံးသည်အထိ ဖြစ်နိုင်ပါသည်။   

- ရောဂါပြင်းထန်သော ငါးများသည် အချွဲများထုတ်ပြီး ကန်နံရံအား ခန္ဓာကိုယ်ဖြင့် ပွတ်တိုက်ကြမည်ဖြစ်သည်။  

- ယင်းသို့ပွတ်တိုက်ခြင်းကြောင့် အနာများဖြစ်ပေါ်လာပြီး နောက်ဆက်တွဲရောဂါများအနေဖြင့်ဘက်တီးရီးယားရောဂါ၊ မှိုရောဂါများ ဖြစ်ပေါ်လာနိုင်ပါသည်။  

ထို့ကြောင့် ငါးမွေးမြူရေးနဲ့ပတ်သတ်ပြီးဆွေးနွေးတိုင်ပင်လိုပါက ကောစင်တာနံပါတ် 09977910000သို့ ဆက်သွယ်နိုင်ပါသည်။  

------      

မိုးလေဝသအဖွဲ့ဝင်ရန် - https://htwettoe.com/organization/12      

သီးနှံပေါက်စျေးနှင့် တိုင်းဒေသကြီးအလိုက် ပေါက်စျေးကြည့်ရှုလိုပါက_ https://htwettoe.com/market မှာ ကြည့်ရှုနိုင်သလိ      

ထွက်တိုး ဖုန်းဆော့ဝဲ _ https://www.htwettoe.com/download မှာ ကြည့်ရှုနိုင်ပါတယ်.      

သီးနှံပေါက်စျေးကြည့်ရှုနည်း_ https://htwettoe.com/post/50437